Hatutan.com, (27 Juñu 2022), Díli—Tribunál Distritál Díli (TDD), Segunda (27/06/2022), kontinua halo julgamentu ba krime omisídiu agravadu ne’ebé deskonfia involve arguidu na’in-18 tanba oho no soe vítima Henrique Soares iha UNPAZ.

Lee Mós : Kazu Omesídiu UNPAZ, Arguidu Kontinua Subar Informasaun

Tribunál Distritál Dili (TDD). Foto/Espesiál

Arguidu na’in-18 ne’e ho inisiál hanesan FP, FT, DIC, FdC, QB, SP, JL, JP, AV, LS, JS, JdS, DP, LdS, ZC, GP, NI ho JC.

Iha julgamentu kontinuasaun ne’e, arguida JdC nu’udár matebian nia tia laiha koñesimentu kona-bá vítima nia mate, maske arguida rekoñese partisipa iha serimónia soe osan hamutuk iha arguidu JS nia uma, maibé depois de arguida soe osan fila bá uma hodi deskansa.

Arguida rasik rona katak vítima mate tanba monu tun husi andár leten eskola UNPAZ nian, maske arguida rasik la bá haree.

“Ha’u fiar katak ha’u nia oan arguidu DP momentu ne’ebá la sai, tanba nia fen mós isin rua hela no ha’u nia oan la involve iha kazu ne’e,” arguida hateten.

Bazeia bá arguida nia deklarasaun juiz prosesu esplika katak TDD laiha intensaun bá kazu ne’e, maibé iha devér hodi buka justisa bá vítima nia mate tanba ne’e husu bá arguida atu esplika buat ne’ebé loos hodi deskobre sai se loos maka oho vítima.  Tanba ne’e juis esplika katak se maka fó deklarasaun falsa sei hetan kondenasaun bainhira Tribunál hatene.

Hafoin rona arguida juis prosesu deside adia hikas julgamentu bá loron seluk hodi kontinua rona arguidu sira seluk.

Audiénsia julgamentu prezide hosi juis koletivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.

Lee Mós : Kazu Omesídiu UNPAZ, Guarda Laiha Koñesimentu Kona-bá Matebian

 Jornalista : Carmelita Isaac