Hatutan.com, (29 Juñu 2022), Díli-Tribunál Distritál Dili (TDD) liu husi alegasaun husi Ministériu Públiku (MP) ne’ebé reprezenta husi Prokuradór Jacinto Babo, husu bá Tribunál atu aplika pena ne’ebé tuir konviksaun Tribunál nian bá jerente kompañia Abanit Internasional arguidu Hance A. Nakamura tanba foti sasán konstrusaun konventu madre  sira OCD iha Hera, Díli, hafoin madre sira hapara konstrusaun.

Tribunál Distritál Dili.

Razaun MP husu bá Tribunál atu deside tuir konviksaun Tribunál nian tanba maske iha audiénsia arguidu rekoñese foti sasán iha fatin konstrusaun hanesan Paralon, besi alumíniu, baza ringan, kalén tau lixu, generator 1, besi plafon inklui odamatan tahan no arus odamatan, maibé sasan hirak ne’e poténsia bá kompañia nian.

Liuhusi audénsia julgamentu ne’ebé hala’o iha TDD, Kuarta (29/06/2022), Defensor Públiku ne’ebé fó asisténsia legal bá arguidu husu bá Tribunál atu absolve nia kliente husi krime furtu agravadu, tanba laiha indísiu forte hodi lori arguidu bá hetan kondenasaun.

Hafoin alegasaun juis prezide marka hikas audiénsia bá loron seluk hodi rona leitura sentensa.

Tuir akuzasaun husi MP bá krime furtu agravadu ho númeru  kriminál 0046/15.DIBCR katak Madre OCD Hera selebra kontratu ho arguidu ne’ebé reprezenta husi kompañia Abanit Internacional no iha kontratu deskonfia mosu inkomprimentu husi parte kompañia tanba halo konstrusaun la tuir dezeñu, tanba ne’e Madre OCD halo karta husu bá kompañia hapara kontratu konstrusaun.

Kompañia konsege hapara konstrusaun tuir orientasaun husi madre OCD, maibé iha loron 19 fulan-Marsu 2019, tuku 15h30 iha Aldeia Mota ki’ik, Suku Hera, arguidu orienta traballadór sira hamamuk fatin konstrusaun hodi tula sai arguidu nia sasán inklui sasán madre OCD nian hanesan Paralon, besi alumíniu, baza ringan, kalén tau lixu, generator 1, besi plafon, odamatan tahan inklui  arus  odamatan nian, tanba ne’e MP akuza arguidu ba pratika krime  furtu  Agravadu, ne’ebé previstu iha artigu  251 hosi kódigu penal TL.

Audiénsia julgamentu prezide husi juis koletivu Arjentino Luisa Nunes, José Gonçalves, Alvaro Freitas, MP reprezenta husi Prokuradór Jacinto Babo no arguidu hetan asisténsia legal husi Defensor Públiku.

 Jornalista : Carmelita Isaac