Hatutan.com, (30 Juñu 2022), Díli—Prizioneiru na’in 118 hamutuk ho Guadra prizionál na’in 38 iha estabelesimentu Prizionál Suai, muda ka evakua ona ba Hangar Aeroporto Suai atu salva aan hosi inundasaun.

Prizioneiru na’in 118 hamutuk ho Guadra prizionál na’in 38 iha estabelesimentu Prizionál Suai, muda ka evakua ona ba Hangar Aeroporto Suai atu salva aan hosi inundasaun, tanba udan boot ne’ebé akontese iha Munisípiu Kovalima durante loron tomak, Kinta (30/06/2022). Foto/ANATL.

Alende ne’e, komunidade uma-ka’in hitu iha Bairru Akar Laran mós evakua ona ba Sentru Konsentrasaun hamutuk ho prizioneiru sira tanba udan boot ne’ebé akontese iha Munisípiu Kovalima durante loron tomak, Kinta (30/06/2022).

Lee Mós:Fator lima ne’ebé sai kauza prinsipál ba inundasaun iha Dili

“Iha Suai Loro bee sa’e makas. Komandante Polísia Nasionál Timor Leste (PNTL) Munisípiu Kovalima ho ekipa susar atu tama ba evakua komunidade tanba hetan lafaek barak. Kona-bá uma-ka’in hira mak hetan estragus, aban dadeer mak foin identifika loloos,” Hatutan.com sita komunikadu hosi pájina ofisiál Administração de Aeroportos e Navegação Aérea de Timor-Leste, Empresa Pública (ANATL E.P). 

Situasaun iha Suai daudaun ne’e udan boot ne’ebé hahú kedan iha oras loron nian mai to’o kalan, nune’e parte ANATL,EPautoriza ona Guarda Prizionál ho Prizioneiru sira muda ba okupa provizóriu Aeroporto Suai, tanba fatin própriu ne’ebé prizioneiru sira durante ne’e utiliza bee sa’e makaas.

Jornalista: Rogério Pereira Cárceres