Hatutan.com, (18 Jullu 2022), Díli—Komandu Polísia Nasionál Timor-Leste (PNTL), Munisipiu Aileu, prende kamioneta ida no asegura joven na’in-rua, ne’ebé hatama sasan ilegál liu hosi fronteira.

PNTL detein sidadaun na’in-rua ho sasál illegal iha Aileu, Segunda (18/07/2022). Foto/PNTL.

Polisia halo aprensaun bainnhira hala’o pasa revista ba karreta no motór sira ne’ebé halo movimentu iha dalan públiku Kuartél Komandu Munisipiu Aileu nia oin, Suku Malere, Postu Aileu-Vila.

Lee Mós:PNTL Detein Eis Xefe Suku Ida Tanba Fa’an Kuda Ilegál

Komandante PNTL Munisípiu Aileu, Superintendente Polísia, Jorge Monteiro deklara timor-oan na’in-rua ne’e PNTL kaptura tanba halo transaksaun ilegál iha fronteira terrestre Timor-Leste ho Indonézia.

“Horikalan ita simu informasaun hosi komunidade katak, iha karreta kamioneta ida konsege tula sasan ne’ebé hatama ilegál hosi Indonézia mai Timor-Leste, ami mós halo hela Auto Stop ba viatura sira ne’ebé halo movimentu iha tempu kalan. Entaun, aproveita situasaun ida-ne’e ita konsege halo aprensaun ba karreta refere ho númeru matrikula A.53.60 no asegura mós joven mane na’in-rua ho inisiál JmF tinan 45 hosi Covalima, no AsA tinan 25 hosi Bobonaro,” Hatutan.com sita deklarasaun Jorge Monteiro iha komunikadu.

Sasan sira ne’e suspeitu sira hatama illegál hosi fronteira Mota-Masin iha Salele-Suai, Munisipiu Covalima no kontinua atu lori ba Dili.

Sasán ilegál hirak ne’ebé PNTL prende mak hanesan sigaru marka Gudang Garam Surya  12  hamutuk pakote 640 totál 6.600 kaixinas. Tabaku lulun  marka Pohon Sagu pakote hamutuk falun 603.200, tabaku lulun marka Matahari pakote 320 hamutuk falun 640 no-mós Supermie marka Indo Mie hamutuk kaixa 293.

Suspeitu na’in-rua ho evidénsia hirak ne’e asegura ona iha Komandu Munisipiu Aileu no kontinua halo investigasaun hodi buka-tuir na’in ba objetu hirak ne’e hafoin sei submete ba Ministériu Públiku (MP).

Jornalista: Rogério Pereira Cárceres