Hatutan.com, (23 Jullu 2022), Díli—Prezidente Timor-Leste, José Ramos-Horta, hamutuk ho Governadór Nusa Tenggara Timur (NTT) Repúblika Indonézia (RI) Viktor Laiskodat diskute asuntu estabelesimentu zona Komérsiu Livre (Free Trade Zone) iha área fronteira RI-TL, illa Timor nian.

Prezidente Timor Leste, Jose Ramos-Horta (karuk) ho Governadór Nusa Tenggara Timur, Viktor Bungtilu Laiskodat hala’o enkontru iha Labuan Bajo, NTT, Sesta (22/7/2022). Foto/ANTARA.

“Estabelesimentu Free Trade Zone sei lori benefísiu boot ba área akonomia Timor-Leste nian ho Indonézia, espesialmente iha fronteira nasaun rua nian iha NTT,” Hatutan.com sita deklarasaun Governadór NTT, Viktor Laiskodat ne’ebé publika hosi Agénsia Notísia ANTARA, Sábadu (23/07/2022).

Lee Mós: Jokowi Promete Rezolve Disputa Fronteira Naktuka ho Bijaele-Sunan

Diskusaun ba Estabelesimentu zona komérisiu livre ne’e hala’o durante vizita ofisiál liu hosi enkotru formal iha Labuan Bajo, Sesta (22/07/2022), iha ámbitu vizita Prezidente Repúblika Indonézia Joko Widodo iha fatin hanesan.

Laiskodat konsidera Illa Timor hanesan illa kiik liu ho nia fronteira sira rai maran no marítima ba nasaun rua nian, hanesan Indonézia no Timor Leste. Tanba ne’e, fronteira nasaun rua nian iha de’it área polítika no territoriál la’ós fronteira ba kultura, sosiál no ekonomia.

Tanba ne’e, Governandor ne’e hakarak atu dezenvolve aspeitu sosiál, kultura, ekonomia, komérsiu, nune’e ho estabelesimentu zona komérsiu livre ne’e bele lori duni benefísiu boot ba nasaun rua nian.

“Ha’u ko’alia ona ho Prezidente Jokowi no Prezidente rasik konkorda ona,” Governadór ne’e hateten.

Governnadór ne’e agradese tebes ba Prezidente Joko Widodo ne’ebé dezenvolve ona infraestrutura iha postu fronteira nian ho kualidade no luxu. Planu ba dezenvolvimentu ekonomia iha fronteira la’ós haree ba merkadu de’it, maibé jeralmente haree mós ba zona komérsiu livre.

Kona-bá ne’e, Prezidente Repúblika Timor Leste, José Ramos-Horta konkorda, apresia no simu desizaun kona-bá planu estabelesimentu zona Komérsiu Livre.

Ramos-Horta fiar no iha esperansa katak, desizaun ba estabelesimentu ne’e bele dudu kresimentu ekonomia populasaun hosi nasaun rua nian, liuliu populasaun ne’ebé hela iha área fronteira nasaun rua nian.

“Mai ita implementa planu ida ne’e atu bele lori vantajen di’ak ba nasaun rua nian, nune’e mós sai hanesan zona ekonomia foun,” nia hateten.

Jornalista: Vito Salvadór