Hatutan.com, (21 Jullu 2022), Jakarta—Sekretáriu Jerál Organizasaun Rejionál Sudeste Aziátiku, Association of Southeast Asian Nations (ASEAN), Lim Jock Hoi hateten, oras-ne’e daudaun ASEAN halo hela avaliasaun ba adezaun Timor Leste nian liu hosi ASEAN Socio-Cultural Community (SOCA) no órgaun Setoriál ASEAN Socio-Cultural Community Council (ASCC) liu hosi Fact-Finding Mission (FFM) ne’ebé la’o hela iha Timor-Leste (TL).

Sekretáriu Jerál ASEAN, Lim Jock Hoi hala’o reuniaun ho Prezidente Repúblika, José Ramos-Horta iha sekretariadu ASEAN Jakarta, Kuarta (20/07/2022). Foto/Hatutan.com.

Sekretáriu Jerál ASEAN, Lim Jock Hoi hateten daudaun ne’e iha delegasaun ASEAN nian kompostu husi ofisiál Estadu membru sira hosi ASEAN Socio-Cultural Community (SOCA) no órgaun Setorial ASEAN Socio-Cultural Community Council (ASCC) nu’udár Misaun Permanente Estadu Membru sira ba ASEAN, no Sekretariadu ASEAN hala’o hela avaliasaun ba pilár Komunidade Sósiu Kulturál no kontinua ho pilár Komunidade Ekonómika ASEAN. Tanba Covid-19, ASEAN hala’o ona Fact-Finding Mission (FFM) virtuál ida hamutuk ho pilár rua seluk.

Lee Mós: Muhammadiyah Apoia Timor-Leste Nia Adezaun Bá ASEAN

Bainhira misaun ne’e remata, sei prepara relatóriu avaliasaun ASCC nian ba konsiderasaun hosi SOCA no submisaun tuir-mai ba Konsellu Koordenadór ASEAN.

“Hosi parte sekretáriadu ASEAN hein katak, relatóriu hosi Fact Finding Mission ne’e sei lori impaktu pozitivu no fó sai roadmap atu aselera Timor-Leste sai parte hosi país membru ASEAN,” Sekretáriu Jerál ASEAN, Lim Jock Hoi hateten hafoin reuniaun ho Prezidente Repúblika, José Ramos-Horta iha sekretariadu ASEAN Jakarta, Kuarta (20/07/2022).

Sekretáriu Jerál ASEAN ne’e husu atu durante prosesu adezaun, Timor-Leste kontinua servisu nafatin no hametin lasu amizade ho país membru ASEAN sira.

Sekretáriu Jerál ASEAN, Lim Jock Hoi hala’o reuniaun ho Prezidente Repúblika, José Ramos-Horta iha sekretariadu ASEAN Jakarta, Kuarta (20/07/2022). Foto/Hatutan.com.

ASEAN sei kontinua oferese kapasitasaun no asisténsia esensiál sira ba ministériu relevante atu partisipa iha atividade ASEAN nian.

“Ba Timor-Leste, ASEAN mak rejiaun ida-ne’ebé ekonomia dinámika liu iha mundu no ne’e bele benefisia mós TL. TL halo ona esforsu boot hodi nafatin prinxe rekezitu sira no iha ligasaun di’ak ho país membru sira hotu,” nia hateten.

Prezidente Repúblika, José Ramos-Horta ne’ebé akompañadu hosi Ministra Negósiu Estranjeiru no Kooperasaun, Adalzija Magno, aprezenta mós prosesu dezenvolvimentu ne’ebé daudaun ne’e la’o hela iha Timor-Leste, no kooperasaun ne’ebé TL estabelese ho país avansadu sira hanesan Estadus Unidus Amérika, Japaun, Korea Súl no Xina no mós parseiru dezenvolvimentu sira hanesan ONU.

“Prezidente ko’alia mós kona-bá integrasaun ekonómika TL nian no poténsia investimentu iha Timor-Leste, nomós TL nia prosesu adezaun ba Organizasaun Komérsiu Mundiál,” Adalzija Magno hateten.

Timor-Leste fiar katak, maski prosesu adezaun iha kompleksidade oioin maibé iha 2023 ho Prezidénsia Indonézia nian, Timor-Leste bele sai ona membru ASEAN.

Jornalista: Vito Salvadór