Hatutan.com, (02 Agostu 2022), Díli—Hahú hosi Janeiru to’o Jullu 2022, Sekretáriu Estadu Terras no Propriedade (SETP) konsege kobre reseita millaun $2,195,980.50 hosi arrendatáriu, ne’ebé tama ona ba kofre Estadu.

Embaixada Indonézia iha Faról-Díli. Foto/Embaixada Indonézia.

Reseita ne’e kobre hosi arrendatáriu ne’ebé aluga rai no uma Estadu inklui rezidénsia no embaixada sira iha Timor Leste (TL).

Lee Mós: Ministru Justisa Husu CAC Involve iha Monitorizasaun ba Arrendamentu Rai Estadu

“Maioria hirak ne’ebé la selu bainhira ami notifika mak sira tauk hodi kumpre no selu. Bainhira notifika dala tolu mak la kumpre sei halo despezu administrativa bazeia ba desizaun Ministru Justisa, nune’e reseita ne’ebé hatama ba kofre Estadu montante bo’ot kompara ho tinan kotuk,” Sekretáriu Estadu Terras no Propriedade, Eldino Rodrigues dos Santos ba Hatutan.com iha ninia knaar fatin Mandarin, Tersa (02/08/2022).

Hosi rai no uma Estadu ne’ebé aluga, maioria Embaixada sira iha Timor mak selu ho montante ne’ebé bo’ot liu hanesan embaixada Amérika kuaze selu kada fulan $11.000 no ba arrendatáriu sira seluk másimu $10.000 mai karaik.

Iha TL, situasaun rua mak SETP enfrenta primeiru arrendatáriu sira la selu, segundu kontratu arrendamentu inválidu maibé arrendatáriu sira la mai fó hatene.

Tanba ne’e, SETP kontinua notifika dala tolu nune’e sira bele kumpre dever hanesan arrendatáriu no bele renova kontratu arrendamentu hodi kontinua selu ba Estadu.

Hosi notifikasaun ne’ebé SETP halo maioria arrendatáriu sira tauk hodi mai renova hikas kontratu no kontinua selu fali ba Estadu, maibé ba hirak ne’ebé seidauk kumpre dever hanesan arrendatáriu maka SETP sei kontinua notifika.

Bainhira la kumpre, maka ho autorizasaun no despaixu MJ sei halo dispezu administrativa nune’e bele fó fali ba ema ne’ebé hakarak aluga tanba pedidu tama iha SETP barak.

Jornalista: Carmelita Isaac