Hatutan.com, (02 Agostu 2022), Díli—Ministru Justisa (MJ), Tiago Amaral Sarmento preokupa ho Servisu Diresaun Terras no Propriedade Munisípiu Covalima, tanba estatutu rai no uma Estadu ne’ebé husik hela iha tempu Portugés no Indonézia kuaze lakon ka sai fali rai privadu komunidade nian.

Ministru Justisa (MJ), Tiago Amaral Sarmento. Foto/MJ.

Ministru ne’e husu ba Diresaun Terras no Proriedade iha kada Munisípiu atu servisu ho loloos no tenki hatama relatóriu kada fulan kona-bá arrendamentu rai no uma Estadu iha munisípiu sira.

Lee Mós: Janeiru-Jullu, SETP Hatama Reseita Millaun $2-resin Hosi Arrendatáriu

“Relatóriu hosi munisépiu Covalima seidauk tama iha ha’u nia fatin kona-bá rai privadu, Estadu, disputa liu-liu kona-bá arrendamentu rai no uma Estadu sira iha dívidas ka la’e,” Tiago Amaral Sarmento hateten iha knaar fatin, Tersa (02/08/2022).

Advertisement

Tuir dadus iha Ministériu katak, durante ne’e hosi munisípiu Viqueque no Díli mak ativu kada fulan no sira seluk la hatama relatóriu.

Tanba ne’e Tiago husu ba Diretór Servisu Terras no Propriedade iha kada munisípiu atu hato’o relatóriu kona-bá arrendamentu iha kada munisipiu liu-liu kompañia no negósiu ne’ebé hala’o iha ne’ebá.

“Ha’u hakarak hatene, tanba iha Suai foin lalais ha’u ba, iha kontratu arrendamentu rai Estadu ho luan hektares 1, maibé montante arrendamentu $500 de’it kada fulan no iha indikasaun bo’ot rai Estadu iha Covalima kuaze laiha tanba Diretór Terras no Propriedade Suai informa katak edifísiu Batalliaun Orden Públiku (BOP) iha Suai, uma mak pertense ba Estadu maibé rai la’e,” nia hateten.

Tanba ne’e, nia husu ba Diretór Terras no Propriedade iha kada Munisípiu atu servisu ho loloos hodi regulariza no administra rai no uma Estadu.

Hatán ba kestaun ne’e, Diretór Servisu Terras no Propriedade Munisípiu Covalima, Helder Godinho Martins rekoñese ninia servisu durante ne’e seidauk sufisiente hodi administra no kontrola rai no uma Estadu iha Munisípiu Covalima.

Advertisement

“Buat ne’ebé Ministru hato’o ne’e loos, maibé ha’u hatene katak rai Estadu hanesan Estadu nian no ba hirak ne’ebé antes ne’e Servisu Nasional Cadastro sukat ona tenki fó fila-fali ba Estadu,” Helder hateten ba Hatutan.com via telefónika.

Totál rai no uma Estadu iha Munisípiu ne’e hamutuk 120, rai privadu ne’ebé iha disputa nia laran entre komunidade hamutuk 10.

Jornalista: Carmelita Isaac

Advertisement