Hatutan.com, (10 Agostu 2022), Díli-Lori povu Timor-Leste nia naran, Governu hato’o kondolénsia bá família no belun vítima sira inundasaun nian ne’ebé kauza husi udan forte liu ne’ebé afeta ona Seoul, kapitál Korea du Súl nian, hanesan akontese iha tinan 80 liubá.

Lee Mós : Inundasaun iha Korea du Súl, Ema Mate Aumenta Bá Na’in-sia

Inundasaun iha Korea du Súl, Segunda (08/08/2022). Foto/Foti husi Twitter

Durante Segunda-feira kalan boot, oras lokál, udan komesa boot ona, iha Seoul no iha sidade viziñu sira hodi rezulta ema mate pelumenus na’in-ualu no ema atus bá atus maka tenke evakua.

Udan ne’ebé makas tebes halo estragu barak materiál sira, hanesan edifísiu, veíkulu, estrada no infraestrutura sira seluk, provoka mós rai-halai no obriga tenke taka ahi elétriku no suspende servisu komboiu no metro nian.

Liuhosi komunikadu imprensa ne’ebé Hatutan.com asesu husi Governu, Kuarta (10/08/2022), portavós Governu Konstitusionál VIII, Ministru Fidelis Magalhães, lori Governu tomak nia naran, hato’o katak Governu Timor-Leste nia sentidu kondolénsia ne’ebé kle’an bá família sira ne’ebé lakon sira-nia ema ne’ebé sira hadomi.

Iha loron difisil sira-ne’e, Timor-Leste hato’o ninia solidariedade bá Governu no populasaun tomak Repúblika Korea nian. 

Lee Mós : Inundasaun iha Seoul, Na’in-Hitu Mate no Na’in-Hitu Lakon

Jornalista : Rogério Cárceres