Hatutan.com (12 Agostu 2022), Díli-Maske Governu Timor-Leste (TL) liuhosi Ministériu Justisa (MJ) selebra ona kontratu arrendamentu ho empreza Pertamina Internasional Timor SA (PITsa) ho valor $10,000.00 kada fulan, maibé Governu la aplika bá Pertamina atu selu arrendamentu retroativa dezde nia operasaun iha Timor-Leste hosi 1999-2022.

Lee Mós : Kada Fulan, Pertamina iha Obrigasaun Selu $10,000 Bá Estadu Durante Tinan-30

Baze Partamina Internasional Timor SA iha Díli. Foto/Hatutan.com

Hatutan.com konfirma ho Ministru Justisa (MJ), Tiago Amaral Sarmento,  kona-bá Pertamina Internasional Timor SA (PITsa) dezde operasaun iha TL hosi 1999 to’o tinan 2022 la selu arrendamentu nu’udár arrendator bá rai no bens sira Estadu Timor-Leste nian ne’e. Nia afirma katak,   Pertamina Internasionál Timor SA laiha obrigasaun atu selu arrendamentu hosi 1999-2022 (retroativu) tanba antes ne’e Governu laiha kontratu arrendamentu ho parte Pertamina.

Ministru Tiago Sarmento esplika katak bazeia bá prinsípiu legalidade hateten bainhira iha kontratu maka foin bele aplika sansaun kuandu parte sira ka arrendator  la kumpre, maibé durante tinan barak, dazede operasaun Pertamina Internasionál Timor SA (PITsa) nian iha Timor Leste laiha kontratu ho nune’e laiha obrigasaun bá Pertamina hodi kumpre tanba Pertamina la sala.

“Kuandu parte rua hakerek kontratu no la kumpre maka bele simu sansaun no iha konsekuénsia legal, maibé komesa tinan 1999 to’o 2022 laiha kontratu no ita atu fó sala ema ne’e susar, no ida ne’e husu bá sira ne’ebé antes ne’e iha ne’e tanbasá sira la halo, tanba iha ha’u nia mandatu ida-ne’e prioridade no konsege iha ona akordu arrendamentu,”  Ministru Justisa Tiago Amaral Sarmento haktuir,  Sesta (12/08/2022).

Lee Mós : Pertamina Internasionál Sei Kumpre Lei TL ba Arrendamentu no Prontu Selu Dívidas

MJ Tiago Amaral Sarmento akompaña hosi Pertamina Internasionál Timor SA ko’alia bá jornalista sira hafoin estabelese akordu arrendamentu rai Estadu. Foto/Hatutan.com

Ministru Tiago Amaral Sarmento esklarese katak iha akordu arrendamentu ne’ebé estabelese entre Governu Timor-Leste ho empreza Pertamina Internasionál Timor SA hodi   aplika valor arrendamentu $10,000 kada fulan ho razaun primeiru maske Pertamina nia naran internasionál maibé bazeia ba dokumentu ne’ebé iha katak Pertamina refere halo parseria ho Timoroan.

Segundu, traballadór Timor oan 95%, maske sasán inklui mina mai hosi Indonézia. Ho nune’e valor arrendamentu ne’ebé aplika tanba konsidera mós bá Timoroan ne’ebé join venture tanba fó mós servisu bá Timoroan barak, maibé karik ema internasionál de’it maka valor oin seluk.

Lee Mós : Pertamina Hetan Tratamentu Espesiál, Ramos-Horta Sei Haruka Nota Bá Governu “Hasai” Husi Pantai Kelapa

Kona-bá Pertamina Internasional Timor SA

Sita hosi pertamina.com katak Pertamina Internasional Timor SA ne’e nu’udar joint venture (parseria) entre Pertamina ho 4 Consorsio Timor Progressso   (4CTP) ne’ebé ofisializa sira-nia kooperasaun iha Wisma Tugu 2, Jakarta, iha loron 03 fulan-Setembru 2015.

Akordu kooperasaun entre parte sira tempu ne’ebá asina direta hosi Prezidente Diretór Pertamina Patra Niaga (PPN), Gandhi Sriwidodo, Prezidente Diretór  Pertamina Retail, Toharso ho Prezidente Diretór  4 Consorsio Timor Progresso (4CTP) Adolfo António Belo.

Nu’udar informasaun adisionál katak na’in bá sósiu Per­tamina International Timor SA kompostu husi  PPN ho nia asaun (saham) 50%, Pertamina Retail 45%, no 4CTP 5%.

Daudaun ne’e, Per­tamina nia atividade negósiu prinsipál iha Timor-Leste, fornese ka supply kombustivel hanesan gazóleu, gazolina, Avtur,  lubrikante sira (Pelumas) no GLP ka Elpiji.  

Jornalista: Carmelita Isaac