Hatutan.com, (17 Agostu 2022), Díli—Prezidente Repúblika (PR) José Ramos-Horta hala’o breafing ba Prezidente Parlamentu Nasionál, Aniceto Guterres ho nia komitiva atu follow up kona-bá akordu sira ne’ebé estabelese ona ho Estadu Indonézia iha vizita Xefe Estadu nian foin lalais ne’e.

Prezidente Repúblika (PR) José Ramos-Horta hala’o breafing ba Prezidente Parlamentu Nasionál, Aniceto Guterres ho nia komitiva atu follow up kona-bá akordu sira ne’ebé estabelese ona ho Estadu Indonézia iha vizita Xefe Estadu nian foin lalais ne’e. Foto/Repro.

Tuir planu, Aniceto Guterres ho ekipa sei hala’o vizita ba Parlamentu Indonézia nian iha tempu badak.

Lee Mós: Horta-Taur Konfirma Fali Akordu Sira ho Indonézia

“Prezidente Parlamentu Nasionál atu hala’o vizita ba Parlamentu Indonézia, ne’e duni hala’o breafing atu bele koalia ho nia kolega Prezidente Parlamentu Indonézia nian kona-bá relasaun Estadu rua ne’e,” Ramos-Horta hateten hafoin hala’o breafing ba Aniceto iha resintu PN, Kuarta (17/08/2022).

Buat importante ne’ebé Xefe Estadu husu atu PPN halo maka ko’alia ho kolega iha Parlamentu Indonézia nian kona-bá inisiativa fraternidade umana, tamba Timor Leste primeiru Estadu ne’ebé liu hosi PN adopta rezolusaun PN nian kona-bá fraternidade umana, dokumentu Amu Papa nian.

“Inisitiva di’ak Estadu Timor Leste nian hetan aprovasaun iha Parlamentu Nasionál Timor nian iha 19 Maiu hodi adopta rezolusaun deklarasaun Fraternidade Umana, ne’e inisitiva Amu Papa, entaun ne’e mak ami ko’alia,” nia haktuir.

Husu atu vizita ne’e bele follow up ba akordu ne’ebé Timor Leste halo ho Indonézia foin daudaun no oinsá hahú prepara ba reforsa buat ne’ebé Prezidente Indonézia Joko Widodo halo kona-bá kriasaun parke industriál iha fronteira Timor Leste ho Nusa Tenggara Timur (NTT) atu halo zona komérsiu livre iha Oekussi kilometru 10 tama territóriu Indonézia no kilometru 10 tama ba RAEOA.

Tanba Prezidente Indonézia Jokowi, la’ós ema ida ne’ebé gosta ko’alia de’it, nia simu ideas ne’e no nia hakarak haree tenke iha duni implementasaun.

Tanba prosesu ne’e rabat ba territóriu Indonézia parte NTT, entaun Governadór NTT mós ansi atu haree oinsá hahú ko’alia konkretu kona-bá prosesu ne’e.

“Ha’u ko’alia ho Ministru Prezidénsia Konsellu Ministru, Ministru Finansas no Ministru Koordenadora Asuntu Ekonómiku, halo mós breafing ba Primeiru Ministru iha semana kotuk, sei ko’alia mós ho Sekretáriu Jerál Partidu FRETILIN Marí Alkatiri, no aban hasoru maun boot Xanana Gusmão iha reuniaun regulár no sei halo breafing ba nia, tanba buat sira ne’e kestaun Estadu no interese ba Timor, ba ita nia dezenvolvementu no ba ita nia ekonómia inklui ba ita nia modernizasaun,” José Ramos-Horta hateten.

Xefe Estadu ne’e dehan, Timor Leste besik atu tama ona ba ASEAN, bainhira la halo buat ruma ho kreatividade depois Timor Leste mak sei ikus liu.

Iha fatin hanesan, Aniceto Guterres hateten sorumutu ida-ne’e hanesan bai-bain audiénsia ho Xefe Estadu, no Xefe Estadu rasik deside hakarak mai iha Parlamentu Nasionál aproveita mós vizita no haree kondisaun PN ninian.

“Reuniaun ne’e ami audiénsia bai-bain ko’alia asuntu Estadu tanba loron rua tán ha’u ho delegasaun ida atu ba Indonézia vizita DPR ne’ebé ha’u husu orientasaun no pontu ruma ne’ebé liga ba asuntu Estadu nian ne’ebé ha’u bele ko’alia mós,” Aniceto Guterres hateten.

Jornalista: Vito Salvadór