Hatutan.com, (20 Agostu 2022), Díli- Tenente Jenerál reformadu Lere Anan Timur preokupa ho desizaun Juiz singular José Gonçalves ne’ebé fó medida koasaun Termu Identidade Rezidénsia (TIR) no aprezentasaun periódika bá arguidu na’in-sia (9) ne’ebé komete kazu  ilísitu droga.

Lee Mós : Ministériu Públiku Halo Rekursu Kontra Desizaun TDD Ba Kazu Droga

Membru Comite Central FRETILIN (CCF) Segundu Jerasaun, Tenente Jenerál reformadu, Lere Anan Timur. Foto/Hatutan.com

Bá jornalista sira iha Palásiu Governu, Sábadu (20/08/2022),  Komandante FALINTIL no Segundu Jerasaun Membru Comite Central FRETILIN (CCF) ne’e afirma katak kazu droga ne’e tenke hetan nia punisaun ka aplika prizaun preventiva atu evita arguidu sira halakon evidénsia ka prova ne’ebé sira subar no konsumu.

Lere Anan Timur hateten, kazu droga ne’e Tribunál iha esperiénsia halo julgamentu. Ezemplu kazu kondenadu Afaku nian, jestór ida iha empreza nasionál ida ne’ebé Servisu Nasional Intelijénsia (SNI) ho servisu sekreta sira detein no kaptura hodi lori bá julgamentu iha TDD hetan punisaun.

Advertisement

Kazu seluk fali, Lere hateten, matebian Juga Gama ne’ebé hetan punisaun to’o mate iha prizaun laran. Tanba ne’e, tuir Lere, Tribunál presiza tetu ho didi’ak atu bele fó punisaun ida justu tuir infrasaun ne’ebé arguidu sira komete.

“Kona-bá lider balun nia família mós envolve iha laran, ida-ne’e ita labele dehan líder nasionál ne’e hanesan ha’u nia oan se envolve ha’u la hatene, tanba sira boot ona ne’ebé ida-idak ba konsumu labele fó sala. Bá ha’u, sei kiik-oan, foin tinan hitu ka tinan ualu, ne’e ha’u responsabiliza. Sira ne’e iha oan ona ne’e sala bá kastigu,” Lere Anan Timur hateten.

“Tribunál aplika TIR ho Aprezentasaun Periódika  bá iha arguidu na’in-sia (9) ne’e la justu, tanba ita haree ema ki’ik sira bainhira komete droga bá iha Tribunál hetan kastigu, maibé emboot nia oan no líder balun nia família komete erru ida-ne’e fó fali TIR bá sira ne’e mak Tribunál la justu tanba ne’e ita-nia lei sei fraku,” Lere Anan Timur preokupa.

Ba oin, Lere afirma tan, Timor Leste tenke hanoin ona harii lei metin iha  RDTL, la’ós atu halimar fali lei ne’e, mezmu membru Governu nia oan no lider partidu balun nia família maibé hotu-hotu iha lei nia okos hodi funu kombate droga.

Lere Anan Timur mós apelu ba foin-sa’e sira katak, droga ne’e buat at ida ne’ebé estraga futuru nasaun, futuru juventude ninian ne’e mak di’ak liu lalika.

Advertisement

Jornalista: Vito Salvadór