Hatutan.com, (19 Agostu 2022), Díli—Hafoin Ministériu Públiku (MP) simu relatóriu rezultadu investigasaun ba kazu projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P), konsidera seidauk iha konkluzaun ba provas, tanba-ne’e iha posibilidade sei kontinua halo investigasaun liu hosi delegasaun kompeténsia ba Comissão Anti Corrupção (CAC).

Antenna Set-top Box/dexodificador Rádiu Televizaun Timor Leste, Empreza Públiku (RTTL,E.P) ne’ebé instaladu iha komunidade nia uma, aldeia Caicassavou,Suku Guisu, Postu Administrativu Maubara, Munisípiu Liquiça. Foto/Hatutan.com.

“Iha distribuisaun ba prosesu, ha’u mak sai titular. Normalmente sei halo despaixu ruma atu halo saida ba prosesu ne’e liu-liu halo dilijénsia ka rekolla provas ruma hodi delega fali ba CAC, tanba prosesu ne’e foin mak inisia. Nune’e, presiza tán investigasaun lubuk ida hodi konklui no iha tán aktu seluk atu hatutan kona-bá kazu ne’e. CAC maki ha papél atu halo investigasaun ba kazu ne’ebé relativamente mai ho krime korrupsaun ne’ebé komete hosi servidór Estadu,” Fontes kredível hosi MP haktuir ba Hatutan.com, Sesta (19/08/2022).

Lee Mós: Kazu Projetu Instalasaun Set-top Box RTTL,E.P, PGR Simu Ona Relatóriu Investigasaun Hosi CAC

Daudaun ne’e parte MP seidauk halo buat ruma ba kazu ne’e, tanba iha hela férias judisiáriu nia laran, maibé depois de férias judisiáriu mak foin bele iha aktu ruma ne’ebé MP sei foti ba kazu ne’e.

Advertisement

Tanba ne’e, nia parte seidauk bele fó detallu kona-bá ninia andamentu tanba konsidera sei iha prosesu investigasaun nia laran.

Antes ne’e iha konteúdu relatóriu CAC konsege identifika prejuizu direta ba Estadu ho montante $7,680.00 ne’ebé identifikadu liu hosi Set top Box hamutuk 256 ne’ebé kompañia indikadu seidauk halo installasaun.

Maibé, prezuizu ne’e sei aumenta makás bainhira kontinua halo inspesaun no kontinuasaun ba benefisiáriu hirak ne’ebé simu ona STB iha Suku atus ida resin iha Munisípiu lima hanesan Díli, Aileu, Ermera, Liquiça no Bobonaro, tanba STB barak mak seidauk halo instalasaun no benefisiáriu rasik mak halo installasaun la’ós kompañia.

Prejuizu indireta seluk ne’ebé Estadu sofre hamutuk $ 674,581.7 no prejuizu ida-ne’e hetan bainhira halo komparasaun entre estimasaun kustu ba instalasaun STB ne’ebé halo hosi RTTL.EP ho valór $225.400 ho valór kontratu ba projetu ne’ebé mak asina hosi Ministériu Asuntu Parlamentár no Komunikasaun Sosiál (MAPKOMS) ho kompañia DILI ETERNAL INNOVATION INFORMATION (DEII) Lda ho valór $ 899.981.70.

Projetu instalasaun Set-top Box/dexodificador RTTL,E.P ne’e ho nia kustu $900.000, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza DILI ETERNAL INNOVATION INFORMATION, Lda nudár sósiu husi Melánia da Silva Fernandes Capela nu’udár Sekretária iha Gabinete Prezidente FFTL.

Advertisement

Jornalista: Carmelita Isaac