Hatutan.com, (01 Setembru 2022), Díli– Primeiru-Ministru (PM), Taur Matan Ruak, halo  apelu bá foin-as’e sira atu pasiénsia no aguenta iha Timor-Leste hodi labele monu bá ajénsia  ilegal sira ne’ebé la garante servisu iha rai-li’ur ba timoroan sira.

Primeiru-Ministru (PM), Taur Matan Ruak. Foto/Hatutan.com

 “Hanesan ita haree timoroan balun ne’ebé deporta mai, balun sei deporta tan, ne’e tanba ita halai, la hatene tuir atu bá ne’ebé, risku saida ita la haree, ne’ebé ha’u husu joven sira pasiénsia uitoan no se bele hatene loloos bá ne’ebé, iha kondisaun ka lae, ne’e mak ba, labele naran bá arbiru de’it.” Taur Matan Ruak hateten hafoin hala’o enkontru semanal ho Prezidente Repúblika José Ramos-Horta iha Palásiu prezidensiál, Kinta (01/08/2022).

Nia afirma katak loos dunik joven sira laiha pasiénsia atu aguenta tan, maibé nafatin husu bá joven sira iha pasiénsia uitoan tanba iha risku balun ne’ebé nesesáriu loos, liuliu sira ne’ebé bá fatin sira ne’ebé laiha serteza katak sira bele hetan servisu tamba ne’e mos bele prejudika fali sira nia situasaun.

Governu sei halo esforsu atu hadi’a situasaun iha rai laran, atu bele kria kampu traballu. Maibé ho númeru joven ne’ebé kada tinan aumenta, Governu laiha kapasidade fó servisu bá hotu-hotu, maibé sei halo esforsu, bele fó servisu bá sira.

Governu iha projetu fatin sira seluk tan, mezmu hanesan ne’e Governu sei laiha kapasidade fó servisu bá timoroan sira tanba ne’e negosia ho Austrália atu kada vez mais aumenta númeru traballadór bá iha Austrália no daudaun ne’e mós negósia ho Japaun, Brunei Darussalam no nasaun sira iha mediu oriente no fatin-fatin ne’ebé sira presiza nia traballadór husi Timor Leste.

Taur hateten, Governu iha ona polítika atu hadi’a sentru formasaun sira atu traballadór sira ne’ebé haruka ba li’ur iha abilidade tanba pratikamente kapasidade sentru formasaun mínimu loos tanba ne’e traballadór timoroan sira ne’ebé bá ne’e kuaze maioria unskill katak sira laiha abilidade maximu atu bele kompete.

Governu Naturalmente halo esforsu hotu para  kria kondisaun hodi atrai setór privadu sira atu bele investe iha Timor Leste no foin lalais Timor Leste simu setór privadu lubuk ida ne’ebé mai hodi manifesta sira-nia interese atu investe iha Timor-Leste no ne’e sinal di’ak no pozitivu.

Xefe Governu ne’e hatutan iha tinan lima mai oin, iha sidade Díli de’it investimentu besik billaun $ 1, Aeroportu Dili besik billaun $ 3 resin, Timor Leste asina ho MCC husi Estadus Unidus Amérika millaun $484 ne’e bá bee no saneamentu. Ho Banku ADB, banku mundiál ne’e kuaze millaun $200 liu.

Jornalista   : Vito Salvadór