Hatutan.com, (01 Setembru 2022), Díli—Tribunál Distritál Díli (TDD) iha Kinta 01 fulan ne’e liu hosi primeiru interrogatóriu ne’ebé prezide hosi juiza Albertina Neves deside aplika medida koasaun Termu Identidade Rezidénsia (TIR) ba arguidu na’in 12 ho inisiál SD, JD, NM, FY, ZD, ZH, AS, ED, ZS, FG, DC no YE relasiona ho konfrontu no asaltu ne’ebé akontese iha Metiaut.

Konfrontu. Foto Ilustarasaun Google.

Razaun Tribunál aplika medida koasaun ne’e, tanba laiha provas sufisiente atu lori arguidu sira ba prizaun preventiva, maske arguidu sira ne’e involve direta iha konfrontasaun ne’ebé akontese iha loron 22 fulan Agostu.

Lee Mós:Konfrontu Becusse PNTL Detein Autór Na’in-Lima

Advogadu privadu, Gil Amaral aseita ho medida koasaun ne’e, tanba iha alegasaun hosi parte Advogadu husu aplika TIR tanba konsidera medida koasaun ne’e merese ba arguidu sira ho objetivu atu asegura de’it arguidu sira nia prezensa durante prosesu investigasaun.

Iha primeiru interrogatóriu ne’e, Ministériu Públiku (MP) ne’ebé reprezenta hosi Prokuradór Nelson Carvalho promove arguidu sira ba krime ofensas integridade fízika grave ne’ebé previstu iha artigu 146 hosi kódigu penál Timor Leste (TL).

Jornalista: Carmelita Isaac