Hatutan.com, (01 Setembru 2022), Díli-Policia Ciêntífica e de Investigação Criminal (PCIC), Kinta (01/09/2022), halo tán kapturasaun no detensaun bá suspeitu ho inisiál FA iha nia rezidénsia  iha Bekaril, Metiaut, Díli, tanba deskonfia envolve mós iha rede droga.

Lee Mós : Faktus La Forte, Arguidu Na’in-rua Ne’ebé Deskonfia Involve Iha Kazu Droga Hetan TIR

Foto Ilustrasaun Droga/Dok.Google

Informasaun hosi PCIC katak suspeitu ho inisiál FA ne’e sei iha relasaun  besik tebes ho arguidu na’in-sia (9) ne’ebé  foin lalais ne’e Tribunál Distritál Dili (TDD) aplika hela Termu Identidade Rezidénsia (TIR) no Aprezentasaun Periódika bá sira.

Mandadu detensaun no kapturasaun ne’e  haktuir bá despaxu hosi TDD), kona-bá Mandado de Busca Apreencão e Detenção, bá autór FA iha ninia rezidénsia.

PCIC ezekuta mandadu ne’e bá suspeitu FA, tanba antes ne’e, liuhosi prosesu julgamentu iha TDD, arguidu na’in-sia (9) deklara no temi mós suspeitu FA nia naran.

Ho nune’e, bazeia bá deklarasaun hosi arguidu sira, no haktuir mós bá despaxu ofisial hosi TDD, ikus mai PCIC halo kedan buska apreensaun hodi haree material sira ne’ebé mak deskonfia sai hanesan objetu krime nian, iha suspeitu FA nia rezidénsia, no halo kapturasaun  ho detensaun bá suspeitu FA iha sela PCIC.

Oras ne’e, suspeitu FA detein ona iha sela detensaun PCIC durante oras 72 nia laran, hafoin submete kedan nia prosesu ba Primeiru Interrogatóriu iha TDD.

Lee Mós : Ministériu Públiku Halo Rekursu Kontra Desizaun TDD Ba Kazu Droga

Iha Lei númeru 02/2017, artigu 07, kona-bá lei konsumu bá ilísitu droga nian, katak, sidadaun sé de’it mak halo tranzasaun bá droga, fa’an no konsumu, sei hetan pena prizaun preventiva hosi tinan-rua (2) to’o  tinan-12.

Lee Mós : Tribunál Aplika TIR bá Arguidu Kazu Ilísitu Droga Hamosu Kritika iha Mundu Virtuál

Jornalista: Rogério Pereira Cárceres