Hatutan.com, (02 Setembru 2022), Díli— Komandu Polísia Nasionál Timor-Leste (PNTL), hatun ona despaixu hodi forma ekipa ketak ida atu bele halo investigasaun própriu ba kazu José Bernardo ne’ebé mate ho kondisaun tara-aan, iha sela detensaun Caicoli, Díli.

Komandante Jerál PNTL, Komisáriu Polísia Faustino da Costa.

Objetivu hosi ekipa ne’ebé forma ona, atu halo investigasaun kle’an ba kazu insidente ne’e, karik, matebian ne’e mate tanba tara-aan rasik, ka tanba deskonfia oknum polisia ruma mak halo agresaun fízika hasoru vítima to’o tara iha sela detensaun laran.

Lee Mós: Kazu Mate iha Sela Polísia, Estrutura PSHT Apela bá Membru Sira Hakmatek

“Ha’u seidauk bele fó komentáriu, oras ida portavóz mak sei hato’o ba ita boot sira,” Komandante Jerál PNTL, Komisáriu Polísia, Faustino da Costa hateten iha kna’ar fatin Kuartél Jerál, Caicoli, Sesta (02/09/2022).

Oras ne’e daudaun, nia parte hasai ona despaixu ida hodi forma ekipa konjunta ida kompostu hosi membru superiór na’in-lima (5), atu bele halo investigasaun kle’an ba kazu insidente ne’e.

“Ha’u atu dehan de’it ba ita boot sira katak, ita prepara ona despaixu, ekipa ida atu halo investigasaun própriu ba kazu ida ne’e,” nia hateten.

MP ho PDHJ Akompaña PNTL Investiga Hela Pesoál Polísia 

Órgaun judisiál liuhosi Ministériu Públiku (PM), hamutuk ho Provedoria dos Direitos Humanos e Justiça (PDHJ), halo hela akompañamentu ba servisu Polisia Nasional Timor-Leste (PNTL) nian, hodi halo investigasaun kle’an ba kazu insidente suisídia ka tara-aan ne’ebé suspeitu José Bernardo lakon vida iha sela detensaun laran, iha Komandu Caicoli, Díli.

Portavós Komandu jerál PNTL, Superintendente Xefe Polísia, Armando Monteiro informa, kazu insidente suspeitu mate ho kondisaun tara-aan, ne’e akontese iha Kinta (01/09/2022), maizumenus iha tuku sia kalan (21:00) Otl.

Hafoin akontesimentu, Komandu PNTL liuhosi unidade Servisu Investigasaun Kriminál Nasionál (SIKN) no Departamentu Forénsika, tun kedan ba fatin insidente hodi halo ezaminasaun iha lokál krime nian.

“Kazu ida-ne’e PDHJ, Defensoria Públika, SIKN, tantu MP rasik iha ona komitmentu, hahú horikalan kedan no apoiu komandu PNTL Munisípiu, inklui família. Oras ida rezultadu ita sei halo konferénsia no transparante,”  Superintendente Xefe Polísia, Armando Monteiro hateten liuhosi konferénsia imprensa iha Kuartél Jerál PNTL, Caicoli, Díli, Sesta (02/01/2022).

Ekipa konjunta ne’ebé kompostu hosi SIKN no Departamentu Forénsika PNTL hamutuk ho PDHJ no MP ne’e, la’ós de’it halo ezaminasaun ba vítima nia isin-mate, maibé sei investiga mós ba pesoál seguransa sira PNTL nian ne’ebé mak durante asegura vítima iha sela detensaun Caicoli.

“Sira haree mós ba ita nia autoridade ne’ebé mak hala’o kna’ar iha ne’ebá, inklui lokál krime nian, tantu evidénsia ne’ebé ligadu ho akontesimentu ida-ne’e. Ita entrega ba ekipa investigasaun konjunta ida-ne’e, nune’e sira bele iha konsentrasaun ba hala’o sira nia servisu, sira sei hamutuk halo konferénsia imprensa,” Armando Monteiro, hateten.

Komandu PNTL husu ba públiku atu rona no akompaña de’it informasaun sira ne’ebé mai anunsia hosi  instituisaun relevante no kompetente, nune’e informasaun ne’ebé sai bele iha akuntabilidade ho transparante no evita rumoris ka boatus hosi ema irresponsabel atu kria fali instábilidade jerál iha país ida-ne’e.

“Oras ida prosesu investigasaun ida ne’e mak ita bele hatene. Tanba ne’e PNTL ko’alia hodi counter informasaun boatus ne’ebé mak agora daudaun ema balun lansa iha públiku. Ita hein tanba família, ho ekipa konjunta ne’ebé horkalan halo reuniaun iha komandu PNTL Munispiu Dili, ekipa ida ne’e iha ona komitmentu. Bainhira prosesu ninia finalidade sei halo konferénsia imprensa konjuntu ida,” komandante Armando hateten tán.

Matebian José Bernardo bainhira sei moris hatais kamiza organizasaun arte-marsiál PSHT no imajen ilistrasaun tara-aan iha sela polísia. Foto/Repro Espesiál

Antes ne’e, PNTL Suspeita matebian nu’udár suspeitu ba kazu konfrontu ida, tanba halo agresaun fízika hasoru vítima balun iha serimónia festa graduasaun ida iha área Audian, Postu Administrativu Na’in-Feto, Munisípiu Díli.

Ho kazu ne’e, ikus mai PNTL tun ba terrenu hodi kaptura suspeitu JB, lori ba detein iha sela detensaun Komandu Munisipiu Dili, iha Caicoli.

Infezlimente iha Kinta (01/09/2022), suspeitu mate iha sela laran ho kondisaun tara-aan no kazu suisídiu ka tara-aan ne’e rasik, iha tuku sia kalan (19:02) iha sela detensaun laran.

Hafoin akontesimentu kazu insidente ne’e, ekipa konjunta liuhosi Polisia Nasionál Servisu Investigasaun Kriminál Nasional (SIKN), Forensik PNTL, Prokuradoria Jerál Repúblika (PJR), Provedoria dos Direitos Humanos e Justiça (PDHJ), akompaña hela prosesu kazu ne’e, nune’e iha rezultadu ne’ebé transparente ba públiku.

Jornalista: Rogério Pereira Cárceres