Hatutan.com, (06 Setembru 2022), Díli—Polísia Nasionál Timor-Leste (PNTL), iha Tersa 06 Setembru 2022, detein ona autór na’in-haat iha sela detensaun Kuartél Jerál PNTL Caicoli, tanba deskonfia involve iha kazu asalta ka baku membru FALINTIL Forsa Defeza Timor-Leste (F-FDTL) ida iha área Bidau Akadiruhun, Postu Administrativu Cristo Rei, Munisipiu Díli, Segunda (05/09/2022).

PNTL iha Tersa 06 Setembru 2022, detein autór na’in-haat iha sela detensaun Kuartél Jerál PNTL Caicoli, tanba deskonfia involve iha kazu asalta ka baku membru F-FDTL ida iha área Bidau Akadiruhun, Postu Administrativu Cristo Rei, Munisipiu Díli, Segunda (05/09/2022).Foto/PNTL.

Autór na’in-haat ne’e, kapturadu iha Tersa (06/09/2022) liuhosi atividade operasaun ne’ebé hahú kedan iha Segunda kalan, hosi ekipa konjunta kompostu hosi ekipa Investigasaun Móvel, Servisu Informasaun Polísia (SIP), Servisu Nasionál Intelijénsia (SNI) no Servisu Militár (MS/J2).

Lee Mós: Komandu PNTL Forma Ona Ekipa Hodi Investiga Kazu Mate Iha Sela Polísia Caicoli

“Sira ne’e, ohin mak ita foin kaptura no agora daudaun submete hela ba prosesu investigasaun iha Servisu Investigasaun Kriminál Nasionál (SIKN),” Portavós Komandu Jerál PNTL, Superintendente Xefe Polísia, Armando Monteiro hateten via telefónika, Tersa (06/09/2022).

Advertisement

Kazu konfrontu tuda-malu no asalta membru F-FDTL ne’e mosu, bainhira sidadaun sira ne’e fila hosi serimónia funebre matebian José Bernardo nian, iha semitériu públiku Becusse, ne’ebé mate tanba deskonfia tara-an iha sela detensaun Komandu PNTL Munisípiu Díli, iha Caicoli foin lalais ne’e.

Informasaun seluk ne’ebé Hatutan.com rekolla katak, oras-ne’e daudaun Komandu F-FDTL, liuhosi Komandante Komponente Navál, Capitão Mar e Guerra, Higino das Neves lidera hela ekipa ida iha terrenu, hodi buka-tuir sidadaun sira ne’ebé mak asalta no halo agresaun fízika hasoru nia membru iha Bidau Akadiruhun, Díli, Segunda (05/09/2022).

Jornalista: Rogério Pereira Cárceres

Advertisement