Hatutan.com, (16 Setembru 2022), Díli—Prezidente Repúblika (PR), José Ramos-Horta ofisialmente simu karta kredensiál hosi Embaixadór foun Uniaun Europeia (UE), Marc Fiedrich ne’ebé substitui Embaixadór sesante Andrew Jacobs no sei hala’o missaun diplomátika iha Timor-Leste (TL) durante tinan haat.

Prezidente Repúblika (PR), José Ramos-Horta ofisialmente simu karta kredensiál hosi Embaixadór foun Uniaun Europeia (UE), Marc Fiedrich ne’ebé substitui Embaixadór sesante Andrew Jacobs no sei hala’o missaun diplomátika iha Timor-Leste (TL) durante tinan haat, iha Palásiu Prezidensiál Nicolau Lobato Bairru-Pité, Sesta (16/09/2022).

Vise-Ministru Negósiu Estranjeiru no Kooperasaun (MNEK), Julião da Silva hateten Xefe Estadu husu atu UE apoia TL nia setór privada nasionál sira hodi bele kompete iha merkadu internasionál, nune’e bele prepara adezaun TL nian ba The Association of Southeast Asian Nations (ASEAN) ho di’ak.

Lee Mós: MOE-UE Konsidera Eleisaun Prezidensiál iha TL Organizadu no Kompetitivu

“Ohin depois de entrega karta kredensiál, iha enkontru bilaterál ho Prezidente Repúblika, husu atu kontinua apoia TL. Husu mós atu servisu hamutuk ho ita-nia setór privadu sira atu dezenvolve no hasa’e kapasidade, koñsimentu ita-nia setór privadu sira, nune’e bele fasilita mós preparasaun adezaun TL ba ASEAN,” Julião da Silva hateten iha Palásiu Prezidensiál Nicolau Lobato Bairru-Pité, Sesta (16/09/2022).

Xefe Estadu mós husu ba Embaixadór Uniaun Europeia, Macr Fiedrich, atu hatun fundus empréstimu ne’ebé fó ba TL.

Liu tán ida ne’e, Xefe Estadu hakarak atu UE kontinua promove turízmu TL nian ba mundu, apoia adezaun TL nian ba Organizasaun Mundiál Komérsiu (OMK).

Embaixadór sesante Andrew Jacobs ninia mandatu iha TL remata iha fulan-jullu 2022.

Jornalista: Vito Salvadór