Hatutan.com, (19 Setembru 2022), Díli—Diplomata Francisco Branco hala’o hela misaun diplomasia iha Mosambique ne’ebé akumula mós servisu hanesan Embaixadór Timor Leste (TL) nian ba Áfrika Súl no Ángola.

Embaixadór Francisco Branco.

Tarrefa serbisu diplomasia ne’e atribui hosi desizaun Kosnellu Ministru (KM) ne’ebé dekreta hosi Prezidente Repúblika no rezidénsia iha Mosambique.

Lee Mós: Diplomasia Tenke Responde ba Nesesidade TL

Francisco Branco  konsidera Áfrika Súl hanesan país importante ida iha G20 no Ángola mós importante, tanba uluk TL iha administrasaun diplomátika iha nasaun rua ne’e, maibé TL kansela tiha  misaun diplomátika iha nasaun rua. Agora desizaun husi Estadu Timor-Leste nia misaun diplomátika ne’e iha Mosambique, ne’e halo kobertura mós ba nasaun rua ne’e.

“Ita nia diplomasia ne’e diplomasia ekonomia, tuir ita nia polítika agora, ita misaun diplomátika iha mundu nia misaun mak ida-ne’e, halo mobilizasaun rekursu atu investidór sira mai Timor Leste,” nia hateten hafoin asina termu posse hosi Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Segunda (19/09/2022).

Embaixadór ne’e sei servisu no halo esforsu tomak iha servisu diplomata ne’ebé nia asume hodi dada investór sira mai Timor-Leste iha área barak liu-liu iha área Turizmu, infraestrutura no seluk tan.

Hafoin simu posse, Prezidente Repúblika José Ramos-Horta husu servisu di’ak liu tán hodi mobiliza rekursu atu investór sira hosi rai liur bele mai investe iha TL.

Tuir oráriu, Embaixadór Francisco Branco sei dezloka ba Mosambique iha Kuarta (21/90/2022) no mandatu ne’ebé embaixadór  iha depende ba desizaun polítika nasionál.

Jornalista: Vito Salvadór