Hatutan.com, (16 Agostu 2021), Díli – Kongresu Nasionál Federasaun Taekwondo Timor-Leste (FTTL) ne’ebé hala’o fulan hirak liubá hodi eleitu prezidente foun FTTL períodu 2020-2025, Gabriel da Costa, husik hela “ain-le’ut” ne’ebé rezulta kontroversu iha FTTL nia postura organizasaun.

Laiha udan no laiha anin, Prezidente Eleitu Gabriel da Costa, hasai despaixu suspensaun ba Angelo Neves, nu’udar membru FTTL no nu’udar mós responsavel Dojang (ramu/ranting) Ponte Comoro III, Díli.

Karta suspensaun ne’ebé asina direta hosi prezidente eleitu FTTL, Gabriel da Costa, iha loron 30 jullu 2021, bandu Angelo Neves, hanesan mós fundadór FTTL halo atividade ne’ebé uza naran Taekwondo durante tinan haat, fulan rua, hahú hosi loron 01 Agostu 2021 to’o 30 Setembru 2025.

Ho autoridade nu’udar prezidente FTTL nia hatuka mós karta suspensaun hasoru Angelo Neves ne’e nu’udar koñesimentu ba Sekretáriu Estadu Juventude no Desportu (SEJD) Abrão Saldanha ho Prezidente Konfederasaun Desportiva Timor-Leste (CDTL, sigla portugés), Afrânio Xavier Amaral.

Refere ba dokumentu karta suspensaun ne’e, Hatutan.com, foin lalais ne’e, iha Dili, konfirma ho prezidente FTTL, Gabriel da Costa, hodi dehan, suspensaun ne’ebé nia foti hasoru Angelo Neves, baze ba rezultadu enkontru ordináriu entre nia ho membru ezekutivu ho fundadór FTTL nian, exeptu Angelo Neves, tanba konsidera Angelo Neves, nia aktu balun viola artigu 23 Estatutu FTTL.

Iha artigu 23 Estatutu FTTL nian ne’e hateten bainhira iha membru Federasaun ruma iha intensaun atu harahun ka hafahe no destroi FTTL sei hetan sansaun bazeia ba erru ne’ebé nia komete.

“Desizaun ne’e feitu ona no bainhira Angelo Neves la satisfás bele rekorre ba parte relevante ka ba Tribunál. FTTL prontu enfrenta risku saida de’it bainhira Angelo Neves hakarak rekorre tuir dalan legal,” Gabriel da Costa afirma.

Oinsá maka to’o hamosu desizaun ne’e? informasaun ne’ebé Hatutan.com rekolla hosi fontes oioin iha FTTL nia laran katak Angelo Neves, la satisfás ho rezultadu kongresu FTTL nian ne’ebé nia rasik mós re-kandidata an, maibé la manan.

Ho nune’e, Angelo Neves ho inisiativa rasik funda fali Asosiasaun Profisionál Taekwondo Timor Leste (APTTL).

Dirijente no fundadór sira hotu iha FTTL konsidera prezensa APTTL ne’e laho intensaun di’ak ba FTTL. Katak sai fali rival ba FTTL ka hamosu dualizmu federasaun iha Taekwondo Timor-Leste.

Prezidente eleittu FTTL, Gabriel da Costa. Imajen/Espesiál

“Ami la konsidera APTTL tanba APTL ilegál,” Gabriel da Costa fundamenta tan. Mezmu nune’e, hosi FTTL nia parte buka ona APTTL atu halo “rekonsiliasaun” hodi buka solusaun. Maibé parte Angelo Neves nian la kolabora no mantein avansa ho APTTL.

Dualizmu federasaun iha postura Taekwondo Timor-Leste bele sai ameasa boot ida ba legalidade FTTL nian iha Federasaun Internasionál Taekwondo ka Word Taekwondo Federation (WTF).

“Ita hotu iha lei nia okos no Tribunál de’it mak ita bele hetan lia-loos,” Gabriel da Costa afirma tan.

Angelo Neves, nu’udar fundadór FTTL hola nia pozisaun firme ona katak nia la simu karta suspensaun ne’e no nia rasik konsidera karta suspensaun ba nia ne’e ilegál no laiha baze fundamentasaun.

“Karta ne’e la iha forsa legalidade tanba karta hand over hosi presidente sesante ba presidente eleitu FTTL, ha’u rasik mak seidauk asina no automatikamente tuir prosedimentu legal nia prezidente eleitu seidauk iha podér absoluta atu hola desizaun, tanba ne’e sira nia ezisténsia mai ha’u konsidera ilegál,” Angelo Neves lia tun hodi responde Hatutan.com

Fundadór FTTL, Angelo Neves. Imajen/Espesiál

Iha nia rezidénsia iha Fomento, Dili, Angelo Neves nu’udar mós jurista ka advogadu ida iha Timor-Leste deklara katak karta suspensaun ne’e ofende nia hanesan fundadór FTTL ne’ebé durante ne’e kontribui no luta maka’as ba kreximentu FTTL no lori FTTL adere ba iha WTF.

“Ami dezenvolve Taekwondo, promove Taekwondo no loke tan Taekwondo nia liras iha munisipiu sira, ida ne’e signifika ami harahun, hafera no sobu Taekwondo iha TL,” Angelo Neves afirma.

Nia konsistente ona prosesa dezentendimentu ne’e ba Tribunál tanba nia konsidera Gabriel da Costa, halo abuzu podér.

“Ami ko’alia ona ho advogadu hodi prodús asaun deklarativa ida atu iha tempu besik lori ba rejistu iha Tribunál,” Angelo Neves tenik.

Iha prosesu legál ne’e maka fó vantajen ba Angelo Neves, maka nia sei reklama naran di’ak ka bom nome hodi reklama mós atu estrutura ezekutivu atuál ne’ebé lidera hosi Gabriel da Costa rezigna-an hodi hatuur loloos fali natureza FTTL nian sai mahon ba atleta Taekwondo sira hotu.

CDTL: Bele hamosu dualizmu

Prezidente CDTL, Afrânio Xavier Amaral. Imajen/Dok.SEJD

Presidente CDTL Afrânio Xavier Amaral, rekoñese nia simu karta koñesimentu kona-ba desizaun prezidente FTTL, Gabriel da Costa hodi suspensaun Angelo Neves hosi membru FTTL.

CDTL konsidera desizaun ne’e razoavel tanba labele iha dualizmu federasaun ka organizasaun iha organizasaun mahan ba atleta Taekwondo sira.

“Tuir lei baze desportu kada federasaun iha asosiasaun 13 no se iha asosiasaun ruma ne’ebé mosu ka hamriik laiha koñesimentu hosi federasaun no kontra estatutu federasaun nian ne’e konsidera ilegál,” Afrânio Xavier Amaral konfirma via telefónika ba Hatutan.com iha Dili.

Ko’alia kona-ba baze legal estrutura FTTL ne’ebé lidera hosi Gabriel da Costa, CDTL haree katak estrutura atuál FTTL legal tanba eleitu liuhsi asemblei jerál federasaun nian no kongresista sira mak depozita sira nia konfiansa atu estrutura hodi assume responsabilidade no hetan ona kongratulasaun hosi Federasaun Mundial Taekwondo.

Nu’udar prezidente CDTL, Afrânio Xavier Amaral husu ba parte Angelo Neves atu evita kahur sasán atu ho rajaun seidauk hand over kompeténsia hosi estrutura sesante ba estrutura atuál.

CDTL nia pozisaun klaru katak parte sira tenke hamutuk lori Taekwondo Timor Leste ba oin no durante ne’e konfederasaun sempre esforsu atu apoiu federasaun hotu, inklui mós FTTL atu bele konkretiza mehi atleta sira-nian atu hetan prestasaun iha kualkér jogu ne’ebé sei partisipa.

CDTL lakohi “tau kanuru tohar” ba konflitu FTTL nian, importante maka parte hotu tenke obedese ba estatutu Federasaun nian. Se la nune’e, Afrânio Xavier hateten, susar atu dezenvolve Taekwondo ho di’ak.

SEJD Abrão Saldanha : Presiza atensaun

Sekretáriu Estadu Juventude no Desportu (SEJD), Abrão Saldanha mós rekoñese nia parte simu ona karta koñesimentu kona-ba desizaun suspende Angelo Neves hosi FTTL.

SEJD Abrão Saldanha. Imajen/Dok. SEJD

SEJD haree katak asosiasaun sira mosu atu kompleta no haboot federasaun, maibé se nia hamriik ho intensaun atu hanesan ho federasaun hodi hamosu dualizmu lideransa ne’e problema foun ne’ebé presiza tau iha atensaun, atu nune’e, labele lori risku ba dezenvolvimentu Taekwondo iha Timor Leste.

“APTTL mai hanesan asosiasaun ita konsidera, maibé ho intensaun hakarak sira nia nivel ne’e hanesan ho federasaun ne’e labele, tanba federasaun iha ierarkia no asosiasaun iha federasaun nia okos tuir lei hateten,” Sekretáriu Estadu Abrão Saldanha responde Hatutan.com iha nia servisu fatin iha Dili.

Nia hateten, atu lori malu ba dalan legal ida-ne’e parte rua mak hatene no fila fali ba iha regra interna federasaun oinsá.

APTTL sente hanesan vítima sira iha liberdade atu rekorre tuir dalan legal, maibé federasaun ka asosiasaun hotu iha lei nia okos no rejimentu ka estatutu interna organizasaun nia mak kesi membru hotu.

Iha kada tinan SEJD sempre apoiu federasaun hotu hodi halo atividade ne’ebé sei akumula asosiasaun sira hosi munisipiu hotu, atu bele halo selesaun ida di’ak ba atleta sira ne’ebé sei reprezenta Timor-Leste iha eventu rejionál no internasionál sira. (bit)