Hatutan.com, (07 setembru 2021), Díli—Dezde Federasaun Futeból Timor Leste (FFTL) sai membru Federation of Association Football (FIFA) iha tinan 2004, kada tinan, FFTL  simu fundu hosi FIFA ho AFC  (Asian Football Confederation ) purvolta $1,000,000.  Maske nune’e,  ema barak  duvida ho transparénsia ezekusaun fundu hosi  FIFA ho AFC nian ne’e tanba rezultadu pozitivu ba dezenvolvimentu futeból iha Timor-Leste sei dook hosi espetativa.

Dokumentu relatóriu FFTL nian  iha tinan 2019 ne’ebé Hatutan.com asesu hosi fonte importante iha FFTL hatudu katak  durante tinan 2019 AFC, AFF (ASEAN Football Federation) ho FIFA fó  montante  $1,933,815.90 ba FFTL hodi finansia programa no atividade FFTL nian ho baze dezenvolvimentu futeból iha Timor-Leste.

Relatóriu finansas FFTL nian iha tinan 2019 kontempla katak fundu hosi kanál AFC ba FFTL iha tinan ne’ebá ho valor $611,662.50,  hosi AFF ($276,080.9) no hosi FIFA rasik $1,001,320.84.

Fontes importante iha FFTL ne’e mós informa katak hosi apoiu sira-ne’e ezekuta ba  programa, atividade sira, no saláriu vensimentu nian.

Relasiona ho saláriu vensimentu nian,  estrutura ezekutivu FFTL nian, hahú hosi Prezidente FFTL ho nia vise-rezidente nain tolu (3) no Sekretáriu Jerál, inklui tezoureiru hetan saláriu kada fulan entre $1,000.00 to’o $4,000.00 (másimu liu saláriu prezidente nian). 

Sekretáriu Jerál FFTL, Nelio Isaac Sarmento. Foto/Hatutan.com

Ho baze transparénsia kona-ba  orsamentu ne’ebé aloka ba hosi FIFA, AFC ba FFTL ne’e , foin lalais ne’e,   Hatutan.com, hakat to’o edifísiu FFTL, Díli, hodi halo konfirmasaun  ho Sekretáriu Jerál FFTL, Nelio Isaac Sarmento, maibé Nelio Isaac, dezmente atu fó sai ezekutivu FFTL nia saláriu.

“Ema barak dehan FFTL ne’e iha osan barak, maibé sira la intende regra no prosedimentu legais sira ne’ebé FIFA no AFC iha, ikus mai ita deskonfia malu de’it no ita la to’o ba iha verdade ida” Nelio Isaac klarifika.

Infelizmente to’o oras ne’e FFTL foin hetan fundus infraestrutura dala ida, no hosi fundus ne’ebé iha konsege hari edifísiu Xanana Sport Centre inklui kampu sintétiku ba treinamentu selesaun nasionál.

“Ita-nia konsentrasaun hosi orsamentu ne’ebé apoiu hosi FIFA no AFC fahe ba parte boot tolu hanesan fundus operasionál, ne’ebé haree ba asuntu operasionál FFTL nian liga direita ho saláriu funsionáriu FFTL nian no subsídiu mensal ba jogadór selesaun nasionál hotu hahú husi sub-16 to’o ekipa seniór feto no mane, ida seluk mak fundus infraestrutura ne’ebé kobre área tomak infraestrutura nian, no parte ida seluk mak fundus ba apoiu atividade Futeból hahú husi nivel asosiasaun,” Nelio Isaac esplika.

Sekretáriu Jerál FFTL ne’e subliña kada tinan orsamentu ne’ebé FIFA no AFC aloka mai FFTL la inklui ho fundus infraestrutura no traveling ba jogu internasionál sira.

“Fundus infraestrutura ne’e ita hatama pedidu mak foin bele simu, hanesan mós ba fundus traveling nian, kuandu ita partisipa eventu ka jogu internasionál sira mak ita foin hetan.”

Tinan ne’e, FFTL mós hatama ona pedidu atu halo alargamentu no renovasaun ba kampu federasaun no sei kompleta ho fasilidade hanesan tribune no ahi ka lampu-sorot hodi fasilita atividade federasaun nian.

FFTL mós halo gastu ba preparasaun selesaun nasionál nian, inklui mós ho akomodasaun ba jogadór sira durante training center no sosa ekipamentu liu-liu farda no fasilidade seluk ba treinu ne’ebé presiza.

“Relatóriu FFTL nian ne’ebé ita aprezenta kada tinan iha kongresu annual hetan auditóriu direta husi FIFA no AFC, inklui ho auditóriu internal ne’ebé FFTL rasik mak deside atu bele garante transparente,” Nelio Isaac hateten.

FFTL iha mehi boot ida oinsá atu lori futeból iha Timor-Leste ba mundu liuhosi kria kondisaun ba asosiasaun sira iha munisípiu atu hahú investe ba jogadór juvenile sira. Alem de ida-ne’e, FFTL mós iha ona hanoin atu organiza kompetisaun regular ne’ebé bele sai hanesan alvu atu halais dezenvolvimentu futeból iha Timor-Leste.

“Asosiasaun sira iha subsídiu annual husi FFTL tamba ne’e ita hanoin kada asosiasaun iha obrigasaun atu halo treinamentu no kria kondisaun hodi lori futebolista sira husi munisípiu mai partisipa iha kompetisaun regular ne’ebé FFTL planeia ona atu implementa. Tinan ne’e seidauk tanba ita iha situasaun COVID-19 maibé tinan oin se situasaun lao normal ita sei realiza.”

Fó ba asosiasaun sira kada fulan $1,000

Hosi sorin seluk Hatutan.com halo entrevista mós ho prezidente Asosiasaun Futeból Munisípiu Baucau, Marito Belo, hodi buka hatene kona-ba lala’ok servisu no programa Asosiasaun Futeból Munisípiu nian, oinsá atu dezenvolve futeból iha munisípiu.  

Prezidente Asosiasaun Futeból Baucau, Marito Belo. Foto/Espesiál

Marito Belo informa kada fulan FFTL fó subsídiu ho montante $1,000.00 hodi finansia atividade asosiasaun nian.  Hosi total orsamentu ne’e, asosiasaun  uza ba selu funsionáriu sira no balun hodi finansia atividade desportiva ne’ebé asosiasaun iha, inklui sosa farda no ekipamentu treinu ba jogadór sira ne’ebé asosiasaun ne’e akomoda.

“Ita-nia subsídiu ne’ebé mai husi FFTL ita uza porsentu 40 ba iha bens de servisu hanesan selu vensimentu ba funsionáriu asosiasaun nian no porsentu  60 aloka ba iha atividade asosiasaun nian hodi finansia atividade futeból ne’ebé akumula jogadór sira feto no mane,” Marito Belo haktuir  via telefónika.

Prezidente asosiasaun ne’e afirma apoiu hosi FIFA no AFC mai FFTL, asosiasaun futeból hotu husi munisípiu informadu no hatene tanba kada tinan FFTL liuhusi komité exco realiza kongresu anuál ne’ebé halibur asosiasaun membru sira.

“Ami hatene tanba iha kongresu anuál ezekutivu sira sempre ko’alia iha relatóriu FFTL nian,” Marito Belo hateten.

Dau-daun ne’e  Asosiasaun Futeból Baucau  halo hela preparasaun atu kompete iha kompetisaun sub-16 ne’ebé sei organiza husi FFTL hodi akumula asosiasaun futeból munisípiu hotu. Alem de ne’e, iha klube futeból feminina ne’ebé reprezenta Baucau (AS Baucau) hodi kompete iha kompetisaun liga feto iha segundu divizaun.

Funsionáriu na’in rua iha sekretariadu Asosiasaun Futeból Baucau; funsionáriu administrasaun no finansa  kada ema simu saláriu kada fulan $150.00 no security na’in ida selu insentivu $75.00 no ba treinadór  asosiasaun nian ida selu insentivu $75.00.   

Total funsionáriu iha Asosiasaun Futeból Baucau  hamutuk nain neen (6), inklui ho ezekutivu federasaun nian, maibé to’o oras ne’e,  Asosiasaun Futeból Baucau seidauk iha edifísiu rasik no sei utiliza estádiu Baucau hodi hala’o servisu administrativa asosiasaun nian tanba FFTL rasik laiha orsamentu atu halo edifísiu própriu ba iha asosiasaun munisipál sira.

Asosiasaun  Futeból sira ne’ebé eziste iha Timor-Leste hamutuk 14, kompostu hosi 12 iha munisípiu, inklui RAEO  no  Dili rasik iha asosiasaun rua; Asosiasaun Futeból Díli Leste ho Asosiasaun Futeból  Díli Oeste.  

Lori futeból to’o ba munisípiu

Prezidente FFTL, Francisco M.C.P Jerónimo. Foto/Media MAPKOMS

Prezidente FFTL, Francisco M.C.P Jerónimo, hafoin eleitu ba prezidente FFTL periodu 2019-2022, afirma kedas iha nia diskursu katak ninia vontade atu dezenvolve futeból hamutuk ho organizasaun membru sira sai ‘icon’desportu iha Timor-Leste.

Liuhosi publikasaun pájina FFTL   loron 27 Jullu 2021,  Jerónimo hakarak mós iha nia lideransa lori futeból to’o ba iha munisípiu no mós postu administrativu sira. Ambisaun ida-ne’e kontempla mós iha Planu FFTL 2019-2022.

“Ita hotu hakarak atu dezenvolve futeból. Ita hotu hakarak atu futeból sai duni icon [desportu] ba timoroan hotu. Bainhira simu kna’ar nu’udar prezidente FFTL, ha’u afirma kedas katak hakarak lori futeból ba territóriu tomak. No hakarak nafatin atu kontinua lori futeból ba iha territóriu tomak. Nune’e futeból la’ós ema sente de’it iha sidade Dili, maibé mós to’o ba iha sidade munisipál sira,” Jerónimo hateten ne’ebé Hatutan.com sita hosi pájina  ofisial FFTL.

Iha ninia lideransa Jerónimo hakarak realiza futeból ne’ebé profisionál ba povu Timor-Leste. Votante ida ne’e hatudu iha programa sira ne’ebé realiza durante ne’e, FFTL halo esforsu maka’as hodi dezenvolve rekursu umanu hahú husi treinadór, árbitru no mós ba match commissioner ne’ebé realiza iha fevereiru 2021, ho forma virtuál. Formasaun ba match commissioner hatudu loloos vontade atu organiza kompetisaun futeból ho profisionál iha futuru.    

Jerónimo mós rekoñese futeból ladún dezenvolve di’ak durante tinan hirak liubá, no liu-liu, bainhira Timor-Leste mós afeta pandemia COVID-19. Maibé FFTL konsege realiza programa sira ba dezenvolvimentu rekursu umanu no organiza mós kompetisaun iha tinan 2020. Asosiasaun Futeból sira,  ne’ebé FFTL finansia,  mós organiza kompetisaun sira iha munisípiu hodi kontinua promove futeból.  

FFTL konsege realiza atividade futeból; iha kampionatu juvenile, formasaun ba treinadór, formasaun ba arbitrajen, FFTL Cup, Taça Rosa Muki Bonaparte, Liga Feto, Liga Futsal  no mós kompetisaun sira-ne’ebé asosiasaun futeból sira realiza iha munisípiu.

Maske nune’e, Jeronimo mós rekoñese  dezenvolvimentu infraestrutura futeból seidauk hatudu progresu, maibé FFTL kontinua esforsu atu konvense nafatin doadór sira liuliu AFC no FIFA atu finansia mós projetu dezenvolvimentu infraestrutura futeból iha Timor-Leste. Tanba kondisaun estádiu sira-ne’ebé eziste ladún favorese atu organiza jogu rejionál sira iha Timor-Leste. (bit)