Hatutan.com, (25 Agostu 2021), Baucau-Sarani sira Dioseze Baucau nian, kuarta (25/08/2021), tuku 10:00 Otl, halibur malu iha Igreja Katedrál Dioseze Baucau, hodi hola parte iha misa funeral ba Vigáriu Jerál Dioseze Baucau, Padre Francisco Pinheiro e Silva, ne’ebé fila hikas ona ba Aman Maromak Nia Kadunan iha loron 24 agostu 2021.  

Amu Francisco Pinheiro e Silva, ne’ebé koñesidu ho naran Amu Sico Pinheiro, moris iha loron 16 Outubru 1963, iha Suku Hola-rua, Aldeia Urufou, Postu Administrativu Same, Munisípiu Manufahi.

Bispu Dioseze Baucau, Dom Basílio do Nascimento, reza hela ba Amu Sico Pinheiro nia isin-mate. Foto-Espesiál

Biografia badak ne’ebé Hatutan.com asesu hosi dokumentu Dioseze Baucau nian, hakerek nune’e; matebian Amu Sico Pinheiro, nu’udar oan hosi Luis de Araujo e Silva ho Julieta da Silva e Pinheiro.

Matebian Amu Sico Pinheiro simu Sakramentu Batizmu iha fulan Novembru 1963, Sakramentu Krizma hosi Mgr. Martinho Lopes iha Misaun Fatumaka.

Amu Sico Pinheiro, frekuente Ensino Primaria, segunda no terseira klase iha tempu Portugés no iha tempu invazaun indonéziu nian mai Timor Portugés iha tinan 1975 to’o 1978, Amu Sico Pinheiro ho família tomak evakua ba Foho Kablaki.

Hafoin finaliza iha Eskola Téknika  Fatumaka, Baucau (1979-1985), Amu Sico Pinheiro  kontinua estudu iha Pendidikan Guru Agama Katolik (PGAK) iha Balide, Dili, hosi tinan 1985 to’o tinan 1988.

Baze ba pedidu hosi Bispu Emeritus Mgr. Carlos Filipe Ximenes Belo, SDB nian, Amu sico Pinheiro, kontinua nia estudu iha  Semináriu Propedêutiko nian, iha Semináriu Menór Lahane, hosi tinan 1988 to’o tinan 1989.

Amu Sico Pinheiro kontinua formasaun espirituál iha Malang- Indonézia hahú hosi tinan 1989 to’o 1990 ho nia espesialidade filozofia no teolojia iha Seminari Tinggi
Filsafat dan Teologi (STFT) Widya Sasana, Malang-Indonesia iha tinan 1990 to’o 1994.

Halao nia estájiu nu’udar Frater iha Parókia Ainaro hosi tinan 1994 to’o 1995 no fila fali ba Semináriu Malang hodi konklui ninia estudu filozófiku no teolójiku iha tinan 1995-1997.

Amu Sico Pinheiro simu Ordenasaun Diakonál iha Igreja Katedrál Malang, hosi Mgr. Herman Pandoyo, O’Carm, Bispu Diocese Malang, iha loron 22  Fevereiru1997.

Liu tiha loron balun, Amu Sico Pinheiro fila hikas mai Timor no hala’o nia estájiu Diakonál nian  iha Parókia Soibada, Manatuto.

Iha loron 23 fulan Novembru  1997, Amu Sico Pinheiro, simu Ordenasaun Saserdotál  hosi Bispu Diocese Baucau, Mgr. Basílio do Nascimento, iha Igreja Katedrál Baucau.

Amu Sico Pinheiro kontinua servisu iha Parókia Soibada hanesan Segundu Vigáriu ne’ebé
responsavel ba Estasaun Misionáriu Laclubar.

Iha tinan 2000,  Amu Sico Pinheiro muda Parókia Ossu, Viqueque nu’udar Vigáriu Parokiál. Liu tinan balun de’it, Dom Basílio kontinua nia kursu espesialidade iha área Historia da Igreja, iha Universidade Gregoriana-Roma iha tinan 2001to’o tinan 2004.

Fila hosi Roma, Amu Sico Pinheiro simu provisão hosi Bispo  Basílio nu’udar pároku iha Parokia Ossu iha tinan 2004 to’o tinan 2006.

Iha tinan 2006, hetan nomeasaun nu’udar Vigáriu Jerál Dioseze Baucau nian to’o hakotu iis no hola knaar  mós hanesan Dosente iha Instituto Superiór  Filozofia no Teolojia Dom Jaime Garcia Goulart, Fatumeta, Dili.

Liuhosi Konferénsia Episkopál Timorense (CET)  nomeia Amu Sico Pinheiro nu’udar prezidente exekutivu ba Comissão Nacional da Educacão Católica de Timor Leste (CONECTIL) to’o ohin loron. Adeus Amu Sico Pinheiro, deskansa ho hakmatek! (bit) 

Notísia iha Relasaun : Vigáriu Jerál Dioseze Baucau hakotu iis