Hatutan.com, (24 Agostu 2021), Baucau– Igreja lokál Dioseze Baucau, lutu-todan tanba lakon ona bibi-atan di’ak, Padre Francisco Pinheiro e Silva.

Vigáriu Jerál Dioseze Baucau hosi Kongregasaun Diosezanu ne’e hakotu iis iha  tersa madrugada (24/08/2021), tanba sofre moras infesaun respiratóriu alta (ISPA).

Konvite hosi Dioseze Baucau kona-ba misa funerál ba Amu Francisco Pinheiro e Silva.

Bispu Dioseze Baucau, Mgr. Basilio do Nascimento, konfirma katak, iha loron sira liubá nia ba vizita duni amu Sico Pinheiro, (naran estimadu ba matebian Francisco Pinheiro e Silva) ne’ebé ho kondisaun moras uitoan, maibé iha faze rekuperasaun kompara ho semana ida antes hasoru malu.  

“Ha’u ba haree nia (amu Sico-red) iha Uatulete, Tirilolo, Baucau, nia oin sei aat nafatin, maibé di’ak uitoan kompara ho nia kondisaun semana ida liubá,” Dom Basilio do Nascimento, haktuir ba jornalista sira iha Planaltu, Baucau.

Iha hasoru malu ho matebian, Amu Basilio koloka pergunta báziku ba matebian hodi husu ba ona ospitál ka seidauk? Rona lia hirak-ne’e, matebian Amu Sico Pinheiro, hatán de’it dehan, buat hotu di’ak hela.

Iha fatin hanesan Vigáriu Episkopál Asuntu Pastorál Dioseze Baucau, Padre Arlindo Leonardo Sequeira da Silva, fó sasin katak, iha segunda liubá, matebian sente hanesan mal dispostu uitoan, maibé tuir retiru iha Madre Kanosiana sira no loron tuir mai matebian ne’e la partisipa ona retiru anuál ba Amu-Lulik  sira Dioseze Baucau nian.

 “Ami hanoin, amu Sico Pinheiro moras simples. Nune’e, halo  tratamentu simples  hodi hemu ai-moruk, hemu ai-lia de’it,” Amu  Arlindo haktuir.

Iha Segunda kalan, komesa atrapalla sente grave, loloos iha kalan ne’e kedas lori ona ba ospitál, maibé amu Sico Pinheiro  (matebian) rasik mak dehan atu lori ba ospitál iha  tersa dadeer ne’e, depois la to’o dadeer Amu Sico Pinheiro hakotu iis.

Tuir oráriu ne’ebé fó sai hosi Dioseze Baucau katak, iha kuarta (25/08/2021), tuku 10:00 dadeer,  sei marka misa funeral iha Igreja Katedrál Baucau, ne’ebé sei prezide rasik hosi Bispu Dioseze Baucau, Dom Basilio do Nascimento.   

Novidade Amu Sico Pinheiro nia mate, lori hakfodak boot ida ba sarani sira hotu iha Timor-Leste, inklui nia amigu ka belun sira ne’ebé eskola hamutuk.

Virgílio da Silva Guterres, atuál prezidente Conselho de Imprensa Timor Leste espera nia sentimentu triste liuhosi nia kronolojia Facebook, katak nia hakfodak ho novidade ne’e.

Virgílio Guterres, hakerek iha nia kronolojia Facebook nune’e:

“Descanse em Paz Chiquito!

Chiquito, hakfodak rona ó hakat uluk,

Dadeer sedu de’it. Ita hasé-malu ikusliu iha Lecidere, hafoin eukaristia ida.

Virtude ne’ebé Maromak haraik mai ita ida-idak iha moris, halo ita la dun hasoru-malu.

Ami alumni ST (Sekolah Teknik) Fatumaka angkatan terakhir lakon ami nia “maskot” iha moris saserdósiu nian. Hosi ita na’in sanulu resin, ó mesak mak deside sai padre.

Adeus Chiquito, agradese ba disponibilidade atu selebra missa ba ha’u nia matrimóniu iha 7 Juñu 2008.

Ha’u lakon parseiru diálogu ida.” (bit)