Hatutan.com, (31/10/2021), Baucau-Igreja Katedrál Baucau ne’ebé foin halo re-konsagrasaun iha loron 15 fulan-Agostu 2020 liubá, sai hanesan fatin deskansa ikus nian bá Saudozu Dom Basílio do Nascimento, bispu Dioseze Baucau.

Notísia iha Relasaun : Dom Basílio Husik-iis Tanba Moras Fuan iha Suai

Sarani sira hahú prepara fatin deskansa ikus ba Saudozu Dom Basílio do Nascimento, iha Igreja Katedrál Baucau nia laran. Foto/Hatutan.com

Hahú Domingu kalan  (31/10/2021), tuku 18:24 Otl, sarani sira, liuliu juventude mane-sira  pertense ba Dioseze Baucau no Parókia Santo António Baucau nian, komesa lori ekipamentu boor-fatuk ka jack hammer, enxada, karau-dikur, kanuru suru-rai, karrosa ki’ik sira, no fasilidade balun tan, kee ona ko’ak ka fatin atu haloot Saudozu Bispu Basílio do Nascimento.

Fatin deskansa ikus ne’ebé sarani sira Parókia no Dioseze Baucau prepara daudaun ne’e iha kedas fatin konfesionáriu nian, iha  liman-loos iha oda-matan boot atu tama ba Igreja-laran.

Fatin ne’e, molok Igreja re-konsagrasaun, nu’udar fatin konfesionáriu nian, ne’ebé molok re-konsagrasaun mós tau Estátua Sagradu Korasaun de Jesus.   

Sarani sira hamutuk ho nai-padre no  nai-madre sira Parókia no Dioseze Baucau nian, komesa halo preparasaun iha Igreja laran; halo ornamentu ba fatin Saudozu Dom Basílio nian no ornamentu iha Altar Santu hodi prepara simu Maktoban Dom Basílio, ne’ebé sei lori hosi Díli mai Baucau, segunda aban (01/11/2021).

Tuir oráriu ne’ebé fó sai hosi Dioseze Baucau  no Parókia Santo António Baucau nian katak,  loron funeral Maktoban Dom Basílio do Nascimento, sei hala’o iha loron 04 fulan-Novembru 2021, hafoin selebrasaun misa funeral.  

Daudaun ne’e mós koordenadór ba serimónia funerál no omenajen ikus  ba Maktoban Dom Basílio nian, Pe. Manuel  da Silva Ximenes, SDB ho Vise-Xanselér Dioseze Baucau,  Diákonu Deonísio F.D.G. Soares,  distribui ona  oráriu misa no velada  ba korpu prezente Dom Basílio do Nascimento nian, hahú hosi loron 01 to’o loron 04 fulan-Novembru 2021, nu’udar loron ikus ka loron funeral Maktoban Dom Basílio do Nascimento.

Preparasaun fatin deskansa ikus ba Saudozu Dom Basílio do Nascimento iha Igreja Katerál Baucau nia laran. Foto/Hatutan.com

Oráriu ne’e  fahe tuir instituisaun no grupu relijiozu sira atu halo velada no omenajen ikus ba Maktoban Dom Basílio do Nascimento, ne’ebé fahe ba parte haat, hahú hosi loron 01 to’o loron 04 fulan-Novembru ne’e.

Bispu Dioseze Baucau, Dom Basílio do Nascimento husik-iis (mate) iha Ospitál Nasionál Guido Valadares (HNGV), iha loron 30 fulan-Outubru 2021, tanba sofre moras fuan ka infarto cardiac.  

Dom Basílio hetan atake moras ne’e iha Suai-Covalima iha kalan 29 fulan-Outubru 2021, no evakua urjente ho aviaun hosi Suai mai Díli hosi lori liubá halo tratamentu intensivu iha HNGV, maibé esforsu hotu médiku sira-nian hela ho esforsu, nune’e Dom Basílio husik-iis iha meiudia tuku 12: 30 Otl, iha HNGV.

Maktoban Dom Basílio do Nascimento nu’udar Bispu dahuluk iha Dioseze Baucau, ne’ebé harii hosi Papa João Paulo II iha loron 19 fulan-Maiu 1997.

Saudozu Dom Basílio moris iha Suai, iha loron 14 fulan-Juñu 1950, simu Ordenasaun episkopál nu’udár Bispu iha loron 6 fulan-Janeiru 1997 hosi Papa João Paulo II. Simu Ordenasaun ba Nai-Lulik iha loron 25 fulan-Juñu 1977.

Notísia iha Relasaun : Xefe Estadu Konsidera TL Lakon Patriota ho Formasaun Intelektuál Exelente

 Jornalista : Francisco Belo Simões