Hatutan.com, (30 Agostu 2021), Kabul—Forsa Estadus Unidus Amérika (EUA) halo atake drone ka aviaun laho pilotu (pesawat tak berawak) ba karreta ida ne’ebé nakonu ho materiál  esplozivu ka bomba hosi membru grupu Estadus Izlámiku ka ISIS-K iha Kabul, Afeganistaun, domingu (29/08/2021).

Atake ne’e rezulta membru ISIS-K mate no deskonfia forte ema ne’e maka autór ba planu atu halo atake ba Aeroportu Internasionál Hamid Karzai iha Kabul, Afeganistaun.

Fontes konfirmadu hosi Estadus Unidus Amérika, hateten katak atake ne’e nu’udar atake ba da-ruak hosi forsa EUA hafoin grupu ISIS-K halo esplozaun bomba suísida besik iha Aeroportu Internasionál Hamid Karzai, Kabul, Afeganistaun, kinta (26/08/2021). 

Fontes importante no emboot hosi Estadus Unidus Amérika ne’e mensiona mós  katak atake drone ne’e aserta ba alvu karreta ida ne’ebé lori materiál esplozaun ka bomba.

Sasin sira ne’ebé haree ho matan haktuir esplozaun ne’e halo nakdoko área sira besik Aeroportu Hamid Karzai no televizaun sira mós fó sai suar metan boot sa’e ba kalohan.

Komandu Sentrál Amérika   nian rekoñese atake drone ne’e no kontinua buka hatene no buka tuir ema sivíl maka sai vítima iha atake ne’e.

“Atake direta ba karreta ne’e tanba transporta materiál esplozaun ne’ebé  bele rezulta vítima aumenta,” hateten fontes Komandu Sentrál Amerika nian  hanesan haktuir hosi Reuters.

“Vítima sira hosi atake drone ne’e la’ós de’it membru ISIS-K maibé ema sivíl balun mós mate, kompostu hosi labarik nain tolu no ema adultu na’in neen,” sasin sira haktuir ba Al Jazeera ne’ebé Hatutan.com sita.

Komandu Sentrál Estadus Unidus Amérika (Centcom) hateten no hatene vítima ema sivíl hafoin atake drone no komesa halo hela investigasaun.

Atake hosi Forsa Estadus Unidus Amérika ne’e nu’udar atake da-ruak nian hafoin membru ISIS-K halo atake bomba suisídiu besik iha aeroportu Hamid Karzai, Kabul, Afeganistaun, iha loron 26 Agostu 2021, ne’ebé rezulta vítima ema na’in-175 inklui Forsa Estadus Unidus Amérika nian.

Fontes importante hosi Estadus Unidus Amérika hateten ba Ajénsia Notisioza Associated Press (AP) katak membru ISI-K nian nain rua sai alvu iha atake drone da-uluk Forsa Estadus Unidus Amérika nian  no sasin sira mós dehan, esplozaun boot akontese besik karreta para fatin.

Família vítima, Dina Mohammadi hateten ba AP katak ema lubuk ida maka mate iha atake drone militár Amérika nian ne’e, inklui labarik sira, maibé   Dina Mohammadi rekuza atu fó sai vítima sira-nia naran ka identidade. (Reuters/Al Jazeera/AP/bit)

Notísia iha Relasaun : Forsa Amérika lansa atake drone ba ISIS iha Afeganistaun