Hatutan.com, (09 Setembru 2021), Díli-Laureadu Nobel  da Pás 1996,  José Ramos-Horta, iha nia rezidénsia Metiaut, Díli, kuarta (08/09/2021), sumu audiénsia jornalista Hatutan.com nian ne’ebé lidera hosi Xefe Redasaun, Vito Salvador Baptista Magalhães.

Iha hasoru-malu ne’ebé termina ona hahú tuku 09:00 Otl, Vito Salvador Baptista Magalhães ho Gabriel Nelson do Nascimento (videografu),  to’o ona iha Ramos-Horta nia rezidénsia tuku 08:25 Otl.

José Ramos-Horta. Foto/Dok.privadu

Prezidente Repúblika (PR) períodu 2007-2012 ne’e hakat mai hodi hasé tuir tradisaun foun iha situasaun foun pandemia COVID-19. Taka-liman hakaruk ba malu hodi kumprimenta malu.

“Bom dia, tuur tiha no saida mak imi hakarak ko’alia,” José Ramos-Horta lia-tun iha entrada hasoru malu ho jornalista Hatutan.com sira.  

Advertisement

Hafoin halo tiha entrevista eskluzivu besik oras ida, jornalista Hatutan.com husu mensajen ikus ba José Ramos-Horta kona-ba ezisténsia mídia komunikasaun foun ne’e nian. Nune’e, Ramos Horta, hateten, iha sékulu XXI mosu plataforma mídia sosiál ne’ebé lori nia vantajen no dezvantajen.

Mídia ho plataforma online sira integra mós iha mídia sosiál ne’ebé lori vantajen boot ba sosiedade tanba ema hotu fasil tebes atu asesu ba informasaun no fó opiniaun atu bele hadi’a sosiedade ne’e. Maske nune’e, Ramos-Horta hateten, sei mosu nafatin informasaun falsu sira iha rede sosiál Facebook ne’ebé mós lori influensia direita no indireta ba moris sosiedade ida-ne’e.

“Hatutan.com tenke fasilita ema atu hetan informasaun sira ne’ebé loos no kredivel. Uluk ho de’it mídia tradisionál, ema difisil loos atu asesu ba informasaun, maibé oras ne’e, buat hotu moderniza no  tanba ne’e, ita hotu iha asesu informasaun oin-oin iha meius komunikasaun oioin,” hateten Ramos-Horta.

“Parabens ba kompañia ka grupu  Hatutan ba inisiativa foun ida-ne’e. Ita-boot sira ho esperiénsia profisionál, hatene étika, regra de ontolojia atu ita-boot sira labele sai fali hanesan mídia sosiál ne’ebé atu fahe informasaun falsu,” Ramos-Horta tenik.

Lider nasionál ne’e akresenta, Hatutan.com sei sai mídia online ne’ebé mai ho nia integridade rasik no nia ritmu rasik atu hatudu kualidade profisionál iha área jornalizmu nian hodi hakonu sosiedade ida-ne’e ho informasaun ne’ebé edukativu atu bele muda ema nia sensibilidade hodi kontribui ba dezenvolvimentu nasionál.

Advertisement

“Ha’u koñese ita-boot jornalista sira, ha’u koñese Sr. Raul Lemos.  Hatutan sei hatudu kualidade no integridade, kontribui kle’an ba informasaun, edukasaun no formasaun ita-nia sosiedade. Parabéns,”  Ministru Negósiu Estranjeiru no Kooperasaun períodu 2002-2006 ne’e afirma tan.

Hatutan.com hahú nia ezisténsia iha loron 20 fulan-Agostu 2021, nu’udar meiu komunikasaun sosiál  hosi órgaun RAYA MEDIA & ENTERTAINMENT, Unipessoal, Lda.

Iha loron 03 fulan-Setembru 2021), Hatutan.com submete dokumentu komprovativu ba Conselho de Imprensa de Timor Leste, hodi hetan sertifikasaun nu’udar órgaun no meiu komunikasaun sosiál. (**)

Notísia iha Relasaun : Ramos-Horta ko’alia kona-ba COVID-19 no rekuperasaun ekonómika 

                                       Hatutan.com submete dokumentu rejistu ba Conselho de Imprensa

Advertisement