Hatutan.com (24 Setembru 2021), Díli—Prezidente Partidu Congresso Nacional Reconstrução Timorense (CNRT), Kay Rala Xanana Gusmão, hato’o mensajen pezár no kondolénsia ba família José António Gomes da Costa ‘Ma’huno Bulerek Karathayano, hafoin hakotu-iis, iha Sesta (24/09/21).

“Ohin ha’u lakon tán ha’u nia alin ida, José António Gomes da Costa ‘Ma’huno Bulerek Karathayano’, ne’ebé hamutuk ho ha’u mak sobre-vivente Comité Central FRETILIN (CCF), hosi 1980 ne’ebé re-organiza-fali rezisténsia forsa armada, iha primeira konferénsia nasionál, Marsu 1981, iha Lalini,” Xanana Gusmão, fó-sasin hosi Pante-Makasar, Rejiaun Administrativa Espesiál Oe-cusse Ambeno (RAEOA).

Iha konferénsia ne’e maka Xanana ho ‘Ma’huno Bulerek Karathayano’ orienta kuadru-sira ne’ebé partisipa iha ne’ebá, hodi eleze fali membru CCF foun, hanesan Nino Konis Santana no seluk-seluk tan, ne’ebé balun mate iha funu laran iha kedan 1981, iha operasaun kikis ne’ebé inimigu hala’o iha rejiaun Sentrál.

Xanana hatutan, Lere Anan Timur mós eleitu hanesan membru CCF, no sai Komissáriu Polítiku iha Rejiaun ‘Haksolok’ fronteira Súl no iha 1984 mak sai hosi kargu polítiku no assume kargu hanesan komandante. Ohin loron membru CCF hosi jerasaun 1981, hela de’it ona Komandante Lere Anan Timur.

Hosi fali jerasaun CCF 1975 ne’ebé la rende no sei moris, maka ‘Ma’huno Bulerek Karathayano’ ho Xanana Gusmão-rasik maibé ohin ‘Ma’huno Bulerek Karathayano’ liu tiha ona.

Iha 1999, Kompañeiru ‘Ma’huno Bulerek Karathayano’ hetan tiha stroke no terus ho moras ida-ne’e to’o ohin nia husik ona mundu.

“Nu’udár Prezidente partidu CNRT, hodi partidu tomak, kuadrus no militante-sira nia naran, ha’u hakarak presta ami-nia ondra ba fundadár ida partidu CNRT nian. Nune’e mós Prezidente Partidu CNRT, no nu’udár mós pesoál, ha’u hato’o sentidu pésames, ba kompañeira Terezinha Viegas, ba família tomak hosi kompañeiru ‘Ma’huno Bulerek Karathayano,” Líder nasionál ne’e, hato’o.

Xanana Gusmão mós reza ba Na’i Maromak atu simu hela nia, iha Ninia Kadunan Santu, hodi husu mós atu ‘Ma’huno Bulerek Karathayano’ bele ta’u-matan no akompaña ita hotu, iha situasaun difísil ida-ne’e.
Nune’e mós atuál Sekretáriu Jerál Partidu istóriku FRETILIN, Mari Bim Amude Alkatiri, hato’o ninia sentidu lutu, ba maluk as’uain, ne’ebé husik mundu.

“Ita-hotu hatais lutu ohin. Balun lutu-metan, balun mutin. Maibé, hotu-hotu tanis no triste. Balun matan been sulin, no hotu-hotu bele haree. Balun tanis hosi fuan, hosi klamar, hosi isin lolon tomak, iha ne’ebé matan-been laiha. Ha’u hanoin no halo reflesaun. ‘Ma’huno Bulerek Karathayano’ husik hela saida de’it mai ita no saida mak ‘Ma’huno Bulerek Karathayano’ lori ho nia. Saida mak ita bele kaer hanesan nia memória, atu hela ba ami nia istória koletiva hanesan Fundadores FRETILIN?,” Alkatiri iha ninia reflesaun.

Nia hatutan, agora daudaun ‘Ma’huno Bulerek Karathayano’ ba ona, hosi jerasaun sira nian, jerasaun Fundadores, menus ida tan no menus ba beibeik. Aban se’e mak tuir la importa tanba ne’e mak realidade vida.
“Importa atu labele husik ita-nia istória kolektiva, tuir dalan negasaun ba istória rasik. COVID-19 bele mai atu habadak ita-nia moris. Tanba ne’e, tempu ba memória atu hametin istória. ‘Ma’huno Bulerek Karathayano’ Camarada! Descansa em Paz. Aluta kontinua!,” nia hakotu.

Memória iha FALINTIL, ‘Ma’huno Bulerek Karathayano’ Sekretáriu Rejiaun III FALINTIL, Xefe Estadu Maiór FALINTIL (1992–1993). Memória iha Polítika, ‘Ma’huno Bulerek Karathayano’ hanesan Sekretáriu Jerál FRETILIN (1990–1992), hanesan Prezidente FRETILIN (1992–1993), hanesan Vise-Prezidente Partidu CNRT (2017–agora) (bit)