Hatutan.com (26 Setembru 2021), Díli—Ma’huno Bulerek Karathayano, nu’udár naran revolusionáriu hosi Komandante FALINTIL, José António Gomes da Costa ne’ebé hakotu-iis iha Sesta (24/09/2021), hafoin sofre moras fuan, iha Hospitál Nasionál Guido Valadares (HNGV).

Saudozu Komandante Ma’huno Bulerek Karathayano. Foto/Kontribuidór Eugénio Pereira

Saudozu moris iha loron 14 Abríl 1949, nu’udár Komandante FALINTIL ne’ebé hamutuk ho komandante lubuk, liuliu Komandante Em-Xefe, Kay Rala Xanana Gusmão, dedika sira-nia vida tomak ba luta ukun rasik an dezde tinan 1975 to’o 1999.

Naran revolusionáriu no reziténsia Ma’huno signifika Funu-na’in, Bulerek ne’e naran própriu rate ida iha área Laleia no, Karatayano nu’udar naran sagrada ida ne’ebé foti hosi rai ulun ka fatin lulik ka hali-hun ida, iha área ka baze rezisténsia Sepelata, Suku Bauro, Postu, Lospalos-Lautém.

Dadus ne’ebé hakerek hosi istoriadór-sira no oras-ne’e konserva iha Arkivu Muzéu Rezisténsia Timorense (AMRT), deskreve katak, naran kódigu Ma’huno Bulerek Karathayano, nu’udár naran lulik ka sagrada, ne’ebé mosu dahuluk no bolu hosi as’uain FALINTIL hanesan forsa naturál (jimat) ne’ebé sira fiar katak, sei proteze sira durante halo gerrilla iha ai-laran.

Naran ne’e konsidera sagrada hanesan mós naran kódigu hosi líder-sira seluk nian, ne’ebé balun foti hosi uma lisan no balun foti hosi rai no fatuk lulik-sira.

Maski saudozu remata ona peregrinasaun iha mundu, maibé obra luta no mehi-sira atu lori Timor-Leste ba moris di’ak, sei sai nafatin inspirasaun ba Timoroan hotu atu kontinua luta hamutuk hodi implementa iha futuru.

Oráriu prestasaun omenajen ikus ba korpu prezente, iha Domingu (26/09), mate-isin sei transporta hosi rezidénsia Praia dos Coqueiros, Dili ba tau iha sede Partidu Congresso Nasionál Reconstrução Timorense (CNRT) iha Bairo dos Grilhos, no sei liu mós ba Sede Comite Centrál FRETILIN.

Mate-isin sei kontinua lori ba tau iha AMRT hodi bele fó tempu ba órgaun soberania, sosiedade sivíl, korpu diplomátiku no Timoroan tomak bele ba presta omenajen.

Antes haloot iha 28 Setembru iha Jardim dos Herois Metinaro, família sei lori mate-sisin ba vizita ikus iha saudozu nia uma-lisan Wabororenraha, Bairru Uma Rentaun, suku Lifau, Postu Administrativu Laleia, Munisípiu Manatuto. (fya)