Hatutan.com, (28 Setembru 2021), Díli—Estadu Timor-Leste (TL), valoriza ona Saudozu José António João Gomes da Costa, ho naran revolusionáriu  ‘Ma’hunu Bulerek Karathayano’ nia isin-mate, hodi haloot iha Jardín eroi Metinaro, tanba fó kontribuisaun másima ba luta libertasaun nasionál.

Xefe Casa Civíl, Francisco Maria de Vasconselhos, reprezente PR Lú-Olo fó omenazen ikus ba Saudozu Ma’Hunu iha Jardím Eroi Metinaro, Díli, Tersa (28/09/2021). Foto/Hatutan.com

“Estadu Timor-Leste, hamutuk ho família rasik, no família boot, harii no hametin iha tempu luta-nian. Haloot eroi nasionál ida, kamarada no kompañeru, Saudozu ‘Ma’hunu Bulerek Karathayano’, koñesidu iha tempu uluk nu’udár Manekas, no iha tempu luta ba ukun rasik-an,” Prezidente Repúblika (PR), Francisco Guterres Lú-Olo, hato’o liuhosi diskursu ne’ebé lee hosi Xefe Casa Civíl, Francisco Maria de Vasconselhos, durante serimónia funerál, Tersa (28/09).

Saudozu Ma’hunu ninia kontribuisaun ba vitória TL, boot tebes. Estadu TL rekoñese, no valoriza liuhosi kondekorasaun orden Boaventura, iha 2018 ho naran Estadu TL nian, Francisco Guterres ‘Lú-Olo’ rasik nu’udár Prezidente Repúblika, kondekora erói nasionál ne’e ho orden TL, ‘Grau Colár’.

Ma’hunu nu’udár lider polítiku ida ne’ebé fó kontribuisaun as tebes ba luta libertasaun nasionál, tanba nia halo parte núkleu fundadór, jerasaun ida ne’ebé fanun ema hotu iha tempu rezisténsia, hamriik ho orgullu nu’udár povu ida ne’ebé iha kbiit atu ukun rasik an.

Foho Ramelau, foho tutun as liu iha TL, nakfilak ba símbolu forsa povu maubere-nian, atu hamri’ik duni, ho brani no determinasaun iha tinan 24 nia laran, pedidu kompatriota Bucar, nunka hasees an hosi nia ideál luta atu liberta pátria.

Ma’hunu nia kontribuisaun tama iha istória, luta libertasaun da pátria TL, nu’udár fundadór Asosiasaun Sosial Demokrátika Timorense (ASDT) no Frente Revolusionáriu Timor-Leste Independente (FRETILIN), membru Comite Central FRETILIN (CCF), Xefe konsellu polítika militár Frente Armada, Sekretáriu komisaun diretiva FRETILIN, komandante Falintil, no Sekretáriu Rejiaun III, protagonista prinsipál ida, nomós ba prosesu reorganiza luta iha 1981.

Ma’hunu ninia kargu politico ikus-liu molok Referendum iha 1999, maka Segundu Vise Koordenadór Konsellu Prezidensiál FRETILIN, iha frente klandestina, simu iha konferénsia nasionál estraordináriu FRETILIN, sira iha 1998 iha Sidney Austrália, ho partisipasaun sira hotu nian liuhosi telefone satélite.

Importante atu fó hanoin, katak  ohin, TL hafoin sai hosi kadeia, biar iha situasaun mate laran, Ma’hunu buka dalan oin seluk atu kaer metin nafatin ninia ideál harii nasaun TL, hamutuk ho kombatente-sira seluk iha frente luta hothotu.

Ohin, 28 Setembru 2021, Estadu no povu TL tomak haloot Saudozu Ma’hunu nia-isin, maibé la haloot ninia istória brani, ninia determinasaun, ninia dedikasaun, nia espíritu sakrifísiu, iha ideia ideal atu kore povu tomak hosi mukit iha rai Timor-Leste, livre no independente.

Inovasaun moris di’ak ba povu tomak, mai mós hosi jerasaun ‘Mahudo’ nian, núkleu fundadór nasionalista dahuluk iha TL, Timoroan hotu iha devér atu haktuir sira-nia mehi no hakarak.

Fatin haloot erói no martir-sira, hanaran ohin loron nu’udár Jardím dos Herois da Pátria, hodi fó hanoin ba Timoroan hotu atu mantein jardím nia funan hela de’it, ho prinsípiu no valór sira ne’ebé hametin ida, durante luta liberta pátria.

Xefe Estadu hato’o nia hakuak boot ba família tomak iha Lautém, hosi espoza dahuluk, saudozu Julieta da Costa, hakuak boot ba mós familia tomak iha Manatuto, no fatin sira seluk hosi Ma’hunu rasik, no espoza daruak, señora Terezinha Viegas.

Haku’ak espesiál ba oan mane boot ‘Lerehokon’ no oan tolu tan Xanana, Techy ho Cesar. Viva erói nasionál, keredíssimu kompatriota Bucar. Onra no glória ba nia memória! (ger)