Hatutan.com, (01 Marsu 2023), Díli—Prezidénsia Repúblika kontinua assegura hela vítima inséndiu hosi área Tasi-Tolu, aldeia Terra Santa, Suku Madohi, Postu Administrativu Dom Aleixo, munisípiu Díli, iha Coby House Palásiu Prezidensiál Bairru-Pité hodi hein apoiu rekoperasaun hosi Governu.

Prezidénsia Repúblika kontinua assegura hela vítima inséndiu hosi área Tasi-Tolu, aldeia Terra Santa, Suku Madohi, Postu Administrativu Dom Aleixo, munisípiu Díli, iha Coby House Palásiu Prezidensiál Bairru-Pité hodi hein apoiu rekoperasaun hosi Governu. Foto/Média PR.

Inisiativa hodi asegura vítima hirak ne’e, hafoin Prezidente Repúblika (PR), José Ramos-Horta hamutuk ho líder Karismátiku Kay Rala Xanana Gusmão tuun hodi hala’o obsevasaun direta bá fatin inséndiu iha kuarentena Terra-Santa (26/02/2023).

Dadus ne’ebé Hatutan.com asesu hosi Prezidénsia Repúblika, vítima sira ne’ebé antes ne’e transporta ba estasaun bombeirus Comoro no kontinua assegura iha coby house Prezidénsia Repúblika iha uma-ka’in 43.

Durante loron hirak nia laran iha fatin provizóriu ne’e, vítima sira hetan asisténsia hosi Prezidénsia Repúblika no hetan mós asisténsia médika hosi pessoál saúde sira, liu-liu inan isin-rua no labarik sira.

Advertisement

Xefe Estadu husu vítima sira atu hela provizóriu iha fatin seguru ne’ebé ekipa prepara, hodi hein intervensaun governu.

“Ha’u ho Avó Nana vizita ona imi nia fatin haree ahi han mutuk, imi bele muda fali lai ba fatin ne’ebé ekipa prepara provizóriu hodi asegura inan no labarik sira,” Hatutan.com sita komunikadu.

Antes ne’e, Xefe Aldeia Terra Santa, Esperança de Jesus reprezenta vítima sira agradese bá Prezidente Repúblika, José Ramos-Horta no Kay Rala Xanana Gusmão ne’ebé vizita hodi haree rasik vítima sira nia kondisaun inklui buka ona solusaun provizóriu.

Autoridade lokál ne’e kontinua koordena ho Xefe Suku Madohi no mós governu atu hamoos hikas fatin ne’ebé ahi han mutuk iha tempu besik.

Jornalista: Vito Salvadór

Advertisement