Hatutan.com, (14 Fevereiru 2023), Díli—Prezidente Repúblika (PR), José Ramos-Horta apoia nesesidade bázika ba família vítima insendiu uma-ka’in 17 iha suku Becora.

Prezidente Repúblika, José Ramos-Horta fahe nesesidade bázika iha Fatin Inséndiu Becora, Tersa (14/02/2023).

Totál vitima ne’ebé afeitadu hosi insendu ne’e hamutuk familia 17 ho totál ema 101, labarik idade ne’ebé kiik liu fulan 8 to’o tinan ida hamutuk rua, labarik kiik ho idade tinan 4 to’o 5 iha na’in 15, labarik ne’ebé eskola iha Pré-Sekundária hamutuk 15, iha nivel Ensinu Sekundária na’in 19 no iha nível universitáriu na’in 23 no estudante hirak ne’e eskola iha universidade sira iha kapitál Díli.

Lee Mós: Ema Na’in-rua Mate Tanba Inséndiu no Ai Hanehan

Ramos-Horta konsidera ida-ne’e la’ós Prezidente Repúblika nia responsablidade, maibé ne’e instituisaun Estadu nian, hanesan Sekretáriu Estadu Protesaun Sivil (SEPS), Ministériu Solidariedade Sosiál no Inkluzaun (MSSI) inklui Autoridade Munisípiu Dili nia servisu.

Advertisement

Tanba ne’e, ohin lori de’it tulun ruma hosi orsamentu Prezidénsia Repúblika, hotu-hotu hatene orsamentu ba mandatu la’ós ba ida-ne’e maibé nu’udár Xefe Estadu bele buka no haree orsamentu mai hosi Orsamentu Jerál Estadu atu kolabora ho Governu no Estadu.

“Ha’u sei haree, agora lori ajuda oitoan maibé agora fila ba Palasiu Prezidensiál bolu kedan emprezáriu privadu balun atu fó apoiu. Prezidénsia Repúblika bele selu, sira mai limpeza didi’ak, empreza ida ne’ebé profesionál halo servisu di’ak atu hamoos di’ak liu tan bairru ne’e, la’ós lixu de’it mai hosi inséndu ne’e atu hamenus tiha moras dengue,” Ramos-Horta hateten iha Fatin Inséndiu Becora, Tersa (14/02/2023).

Kona-bá dokumentu sira hanesan kartaun eleitorál Xefe Estadu husu bá STAE atu bele haree, maibé balun lakon dokumentu hotu-hotu tenke trata fila-fali Billete Identidade, sei orienta atu funsionáriu sira Palásiu Prezidensiál haree ida-ne’e, nune’e sira labele lakon direitu hodi partisipa eleisaun Parlamentár.

Prezidente Repúblika, José Ramos-Horta fahe nesesidade bázika iha Fatin Inséndiu Becora, Tersa (14/02/2023).

“Sei haree mós atu ajuda sira ho uma temporáriu, pelumenus iha kalen atu halo uma foun ba sira, ha’u sei haree ho governu tanba iha orsamentu 2023 boot loos Governu tenke haree tau prióridade ida iha inséndu ne’e,” nia subliña.

Iha fatin hanesan, Koordenadora Bairru Bekusi Sentru Joaninha da Costa haktuir, inséndu ne’e akontese ema sai hotu no bainhira nia to’o iha klaran ahi sa’e tiha ona, labele halo buat ida.

“Entaun, ha’u hakilar ba komunidade atu bele salva an, labele hanoin liu ba sasán estraga vida,” nia hateten.

Advertisement

Koordenadora ne’e mós haktuir katak, antes ne’e iha loron (09/02/2023) tuku 11:00 kalan Pároku hosi Parokia Becora mak to’o uluk lori hahan báziku ba komunidade ne’ebé sira tahan netik ba sira nia moris.

Vítima Inséndiu hela iha fatin provizóriu Becora, Tersa (14/02/2023).

Iha momentu ne’e kedan hosi grupu orasaun Adma Balide liu hosi parte Bekora sira mak ajuda uluk, depois kompañia Lotaria lori hahan báziku mai, nune’e mós kompañia Pretamina Internasionál Timor sira lori hahán, ema ida-idak ne’ebé iha sentimentu ba inséndu ida-ne’e sira ida-diak lori mai buat ne’ebé sira iha.

Iha loron (10/02/2023) Autoridade Munisipiu Dili ho Sekretáriu Estadu Protesaun Sivil (SEPS) mai ho sasán ho pakote entrega ba vitima inséndu.

Iha fatin hanesan, Vítima inséndu Fernanda Floriana de Oliveira hateten, iha momentu akontese inséndu nia ho oan ne’ebé sofre defisiénsia fíziku iha uma laran, nune’e labele rona saida mak akontese iha li’ur.

“Ha’u nia sasan uma laran la salva, dokumentu ida mós la lori sai. Ami sai ho hena iha isin lolon, ha’u salva mak ha’u nia oan defisiente ne’e,” Fernanda Floriana de Oliveira haktuir.

Jornalista: Vito Salvadór

Advertisement