Hatutan.com, (06 Outubru 2021), Díli-Xefe Estadu Maiór Jenerál  FALINTIL-Forsa Defeza Timor-Leste (F-FDTL),  Tenente Jenerál Lera Anan Timur, bolu atensaun ba membru F-FDTL hotu atu kuida patrimóniu Estadu ne’ebé atribui ba sira ida-idak atu halo serbisu Estadu nian.

Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lera Anan Timur. Foto/Hatutan.com

“Uza sasán  ka patrimóniu Estadu la ho kuidadu, sei hasai sira husi forsa. Ita hein rezultadu investigasaun,” Tenente Jenerál Lere Anan Timur afirma lia-hirak ne’e ba jornalista sira iha Palásiu Prezidensiál, Díli, kuarta (06/10/2021).

Hafoin hasoru malu ho Prezidente Repúblika, Francisco Guterres “Lú Olo” iha Palásiu Prezidensiál, Tenente Jenerál Lere Anan Timur afirma, situasaun ikus-ikus ne’e karreta F-FDTL nian baku-fila, inklui asidente foin lalais iha Merkadu Becora, Díli, ne’ebé membru F-FDTL ida uza karreta F-FDTL nian soke lixeira to’o kondisaun karreta at.

“Prosesu kona-ba dezastre karreta sira nian ne’e la’o. Ba membru sira ne’ebé ho ignoránsia no neglijénsia ka tamba nia beik halo Estadu nia sasán aat ne’e, ha’u nu’udar komandante konsidera  krime no la’ós kazu indixiplina bai-bain tamba ne’e prosesu kriminál tenke iha,”  Lere Anan Timur afirma tan.

Nia hatutan parte komandu sei husu responsabilidade ba membru F-FDTL hirak ne’ebé estraga patrimóniu  eEtadu nian atu sira iha responsabilidade ba aktu hirak ne’ebé akontese iha terrenu no lori imajen la-di’ak ba iha instituisaun F-FDTL.

Komandu F-FDTL sei halo desizaun bazeia ba rezultadu investigasaun ne’ebé oras ne’e lao hela. Tamba tuir prosedimentu Polísia Militár mak sei halo investigasaun no hafoin ida ne’e entrega ba iha parte jurídiku F-FDTL nian atu ikus mai komandu iha desizaun final bazeia ba faktu ne’ebé iha.

“Tamba de’it o lanu, o estraga karreta ida ho folin $30,000 too $ 40,000, ne’e krime. Prosesu investigasaun lao hela no ita seidauk iha desizaun maibé hanesan ha’u dehan bei-beik ona hahalok hanesan  ne’e ita sei la tolera nein ema ida tamba ne’e krime,” Lere subliña tan.

Asidente karreta F-FDTL nian ne’ebé soke lixeira iha Merkadu Becora, Domingu (03/10/2021), purvolta tuku 00:00 kalan, deskonfia membru F-FDTL kondús karreta refere ho kondisaun lanu no halai ho velosidade, nune’e lakon kontrolu hodi rezulta asidente. (bit)