Hatutan.com, (06 Outubru 2021), Dili—Polísia Nasionál Timor-Leste (PNTL), liuhosi Komandu Munisípiu Díli, Eskuadra Dom Aleixo, detein feto ida ho inisiál AMS iha Dili laran, tanba deskonfia durante ne’e halo kobransa illegál, hodi bosok joven-sira ba servisu iha Austrália.

Prosesu detensaun ne’e hala’o iha Kuarta (06/10), tanba polísia simu keixa hosi ekipa Sekretáriu Estadu Formasaun Profisionál no Empregu (SEFOPE), dehan katak, deskonfia suspeitu AMS falsifika dokumentu no halo kobransa illegál.

Notísia iha Relasaun:SIK Detein Suspeitu na’in-tolu Loke Bola Guling Ilegál 

Advertisement

Polísia Nasionál Timor-Leste (PNTL), detein suspeitu ida iha Dili laran, tanba deskonfia durante ne’e halo kobransa illegál, hodi bosok joven-sira ba servisu iha Austrália. Foto/Hatutan.com.

“SEFOPE mak vítima, tanba suspeitu halo asinatura falsa, no PNTL hanesan Estadu ninia aparellu prontu halo servisu ida-ne’e. Maibé, ida-ne’e sei iha prosesu identifikasaun. Bainhira konklui maka sei deklara vítima ne’e suspeitu ka la’e,” Komandante Eskuadra Dom Aleixo, Inspetór Xefe Polísia, Américo Fátima da Costa, hateten iha rezidénsia AMS.

Bainhira iha prosesu identifikasaun deskobre iha indísiu ruma forte, polísia sei halo detensaun ba suspeitu durante oras 72, no sei rekomenda ba Ministériu Públiku (MP).

Iha fatin hanesan, Diretór Nasionál Empregu Exteriór (DNEE), SEFOPE, Filomeno Soares, afirma, Governu nia knaar importante ida maka halo kontratu ba traballadór Timoroan-sira ne’ebé atu ba servisu iha rai-liur.

Tanba ne’e, laiha tan ajénsia privada no organizasaun sivíl ruma mak trata kona-bá asuntu empregu exteriór, ligadu ho atividade mobilidade laborál ba Austrália ka Koreia, sei hetan tratamentu hosi Governu liuhosi SEFOPE.

“Atu evita sasan sira-ne’e maka ohin ami halo detensaun ba alin feto ida-ne’e, tanba ami hetan evidénsia liuhosi vítima-sira ne’ebé nia halo kobransa. Nia uza tan ha’u-nia naran, asina falsu hodi dehan katak ha’u mak haruka. Ho evidénsia ne’ebé agora iha ha’u-nia liman, ha’u hakarak deklara ba públiku, agradese boot ba komandante eskuadra Komoro,” nia deklara.

Filomeno Soares mós hetan informasaun komprovativu-sira hanesan chating facebook hosi vítima-rasik, ho suspeitu ne’ebé hanesan mós funsionáriu públiku, dekara katak, nia mak trata dokumentu ba kualkér joven ne’ebé atu ba serbisu iha estranjeiru.

Advertisement

Otélia Gonçalves, nu’udár vítima haktuir, antes ne’e sira hasoru-malu, suspeitu AMS ko’alia ho sira dehan, bainhira hakarak ba servisu iha Austrália, bele trata de’it dokumentu liuhosi nia.

“Nia mai fó hatene dehan, imi hakarak ba Austrália mai tuir ha’u de’it. Maibé tenke hatama osan, foto, ho kartaun eleitorál, depois imi hein de’it. Ha’u husu ba nia, ita atu ba nasaun seluk, la presija pasaporte? nia dehan, liuhosi ha’u la uza pasaporte,” Otélia konta-tuir.

Durante halo negosiasaun, suspeitu husu atu kada ema hatama osan hahú hosi $300 to’o $500, nune’e Otélia hamutuk ho nia-alin feto no alin mane hatama ona $1.200 ba suspeitu iha tinan kotuk.

“Nia promete dehan imi hein de’it 02 juñu arranka ba Austrália, ikus-mai la konsege no nia promote fali dehan loron 23 juñu mak ba maibé la konsege nafatin. Ami husu nia sei dehan tan 29 juñu ikus mai la konsege. Ha’u husu nafatin, nia dehan 04 Outubru imi asina, no dia 06 imi arranka. Ohin 06 Outubru ona, ami hein rezultadu laiha,” nia konta-tuir tan.

Nune’e mós vítima José Maria dos Santos, ejize ba suspeitu AMS atu entrega fila-fali osan ne’ebé molok ne’e hatama ona, no halo mós prosesu tuir lei ne’ebé vigora. (ger)

Advertisement