Hatutan.com, (12 Outubru 2021), Díli-Autoridade Inspesaun Fiskalizasaun Atividade Ekonómiku Sanitária Alimentár (AIFAESA) enkamiña ona infrasaun empreza Burger King nian ba ekipa jurídiku atu estuda hodi hasai notifikasaun no prosesa tuir Lei ne’ebé vigora iha Timor-Leste.

Diretór Operasionál AIFAESA, Gabriel da Costa. Foto/Hatutan.com

AIFAESA fó medida rigór ne’e ba Burger King relasiona ho inspesaun ne’ebé halo hosi  Departamentu Operasionál  AIFAESA halo ba empreza Burger King ne’ebé deteta na’an manu “ayam potong” iha kaixa hamutuk 14 inklui balun falun ho plástiku hamutuk neen (6) iha Restaurante Burger King Timor Plaza ho Colmera expire ka liu ona prazu.

“AIFAESA hosi Departamentu Operasaun la tolera no  sei prosesu no  submete ona ba parte jurídiku atu haree nia sirkunstánsia tuir Lei,” Diretór Operasionál AIFAESA, Gabriel da Costa, hateten hodi responde  Hatutan.com, iha knaar fatin Matadoru, Díli, segunda (11/10/2021).

Parte jurídiku AIFAESA nian haree hela prosesu legal sira ne’e no sei fó notifikasaun empreza na’in entre loron 10 ka loron 15 atu ba hato’o sira nia razaun.

Iha momentu inspesaun ba Restaurante Burger King nian iha Timor Plaza ho Colmera, Díli, haree katak data variedade mate ona ka  liu prazu ona, tanba ne’e mak iha momentu ne’ebá kedas, inspetór hosi AIFAESA halo auto-apreensaun ba produtu sira ne’e, depois mós halo kedas auto-notísia.

Iha dekretu lei númeru 23/2009, 05 agostu, iha artigu 13, alínea (b) hateten, sasán sira ne’ebé mak liu prazu ona, sei hetan sansaun ka multa ho kuantidade osan hahú hosi $1000 no boot liu $5000.

Na’an manu “ayam potong” hirak ne’e empreza Burger King rasik mak tau ona iha plástiku no expire ona  (liu prazu)  hahú hosi fulan fevereiru to’o jullu 2021.

“Ne’ebé ami haree, ami tenke halo prosesu, tanba ne’e ami konsidera katak produtu ne’e liu prazu, tuir lei hatete,” nia afirma tan.

Produtu sira ne’ebé liu ona prazu, parte AIFAESA sei kria fali ajenda hodi halo programa destruisaun hotu iha lixu fatin Tibar.

 Burger King Dezvia  

Ayam Potong ne’ebé liu prazu iha Burger King. Foto/AIFAESA

Iha  Tersa dadeer, tuku 10:00 Otl, Jornalista Hatutan.com hakat to’o Restaurante Burger King iha Colmera, Díli, hodi ba hasoru Jestór Burger King nian. Infelizmente staff sira orienta Hatutan.com ba hasoru Jestór ho nasionalidade ema estranjeiru ne’e iha Edifísiu East Timor Trading Group, iha Delta Nova nia oin.

To’o iha edifísiu refere, pesoál resepsionista Edifísiu Burger King nian  ne’e husu hela Hatutan.com nia númeru kontaktu ka telefone. Nune’e promete atu kontaktu iha tuku 14:00 Otl.

Iha minutu balun ema ne’ebé deskonfia jestór Burger King ne’e  telefone ba Hatutan.com  hodi dehan, nia la’ós responsavel Empreza Burger King, maibé nia Jestór Glorya Jeans.

Hatutan.com kontinua husu ba pesoál ne’ebé dehan nia Jestór Glorya Jeans ne’e atu bele fasilita hela númeru kontaktu Jestór Burger King nian ho loloos. Nune’e nia promete atu fó. Infelizmente to’o agora nia la fó.

Hatutan.com kontinua halo verifikasaun ba númeru ne’e ba funsionáriu sira Empreza Burger King nian, konfirma katak, númeru kontaktu 3312*** ne’e ofisial edifísiu Sentrál Burger King nian iha   East Timor Trading Group.

Hosi sorin seluk, staff balun Burger King nian hateten, to’o agora sira seidauk hetan informasaun follow-up hosi AIFAESA  kona-ba apreensaun na’an ayam potong ne’ebé expire iha Restaurante Burger King.  

“Tanba informasaun ofisiál hosi AIFAESA seidauk iha, maka ami la bele espalla lai informasaun ruma ba públiku ka ba mídia,” pesoál Restaurante Burger King Colmera ne’ebé lakohi publika nia identidade ne’e haktuir. (ger/car)