Hatutan.com, (12 Outubru 2021), Dili—Polísia Nasionál Timor-Leste (PNTL), liuhosi Servisu Investigasaun Kriminál (SIK) Komandu Munisipiu Dili, halo detensaun ba suspeitu na’in-haat ho inisiál JBP, MS, FMD, RDC, iha sela detensaun Kaikoli, tanba loke jogu ilísitu ‘bola guling’ laiha lisensa ka ilegál.

Ema na’in-haat ne’e hetan detensaun iha área BTN III, Tasi-tolu, aldeia Terra Santa, Suku Madohi, Postu Administrativu Dom Aleixo, Munisípiu Dili, bainhira joga hela bola guling, iha Domingu, tuku 22:30 otl.

Notísia iha Relasaun:SIK Detein Suspeitu na’in-tolu Loke Bola Guling Ilegál

Evidénsia

SIK halo detensaun ba susperitu na’in-haat ne’e bazeia ba evidénsia hanesan osan ho bola guling, iha fatin akontesimentu.

Suspeitu na’in-haat ne’e, SIK halo detensaun tanba deskonfia kontra lei 06/2016, 26 Abríl kona-bá rejime jurídiku lisensiamentu no esplorasaun tradisionál, no kontra kódigu penál, artigu 322 kona-bá esplorasaun ilísitu bola guling ne’ebé Governu bandu.

“Agora daudaun, suspeitu na’in-haat iha hela sela detensaun, hodi kompleta oras 72 atu bele kompleta prosesu, nune’e aprezenta ba Ministériu Públiku (MP),” Komandante PNTL Munisípiu Dili, Superintendente Xefe Polísia, Henrique da Costa, hateten iha Kaikoli, Tersa (12/10).

Hafoin SIK halo kapturasaun, suspeitu sira tenta atu fó subornu, liu hosi fó osan ba polísia ho valór $100, atu bele livre hosi situasaun ne’e.

“Polísia kaptura kedan, sira selu tan, lori mai hatama iha sela no agora daudaun ita kontinua halo investigasaun,” Henrique da Costa, hateten.

Antes ne’e, iha kinta (30/09), SIK mós detein uluk ona suspeitu na’in-tolu, ho inisiál JDS, JPD, ho JFDS, tanba komete kazu ne’ebé hanesan, iha área Ai-meti laran, Aldeia Săo José, Suku Komoro, Postu Administrativu Dom Aleixo. (ger)