Hatutan.com, (13 Outubru 2021), Dili—Inspesaun Jerál Traballu (IJT) ne’ebé tutela ba Ministériu Koordenadór Asuntu Ekonómiku (MKAE), halo mediasaun no rezolve ona dezintendimentu traballadór na’in 21 iha Portu Baia Tibar ho ajénsia fornesedór forsa traballu 2WJ, ba empreza China Harbour Timor,Lda.

Inspetór Jerál Traballu, Rofino Lopes dos Reis. Foto/Hatutan.com

Mediasaun ne’ebé IJT hala’o bazeia ba kompeténsia atu rezolve greve, ne’ebé atribui iha Lei númeru 5/2012.

Notísia iha Relasaun: Durante pandemia COVID-19, Timor-oan 779 lakon servisu

“Greve ne’e hetan ona solusaun. Sira iha de’it dezintendimentu kona-bá artigu 55 Lei Traballu, ne’ebé koa’lia kona-bá indemizasaun,” Inspetór Jerál Traballu (IJT), Rofino Lopes dos Reis, hateten ba Hatutan.com iha Serbisu Fatin, Dili, Kuarta (13/10/2021).

Tuir Lei Traballu ne’e hateten, katak, bainhira traballadór sira ezerse sira-nia durasaun tempu servisu tama ona tinan tolu, iha direitu ba aplikasaun artigu ne’e ka  selu direitu indemizasaun.

Menus hosi tinan tolu, bele hetan de’it ninia saláriu fulan ikus-nian, subsídiu anuál ka saláriu-13, iha overtime karik simu de’it ida-ne’e, inklui sertifikadu.

Dadus hosi IJT katak, traballadór hirak-ne’e kontratu remata iha 08 Outubru 2021, maibé tanba informasaun ladún klaru ba sira no sira hanoin katak, tenke hetan indemizasaun, nune’e sira halo greve.

Bainhira ekipa tékniku hosi IJT halo esplikasaun loloos no detallada kona-bá aplikasaun lei ne’e, traballadór sira konsege iha entendimentu, no oras-ne’e daudaun traballadór-sira iha Portu Baia Tibar hala’o atividade hanesan baibain.

Hafoin entendimentu, ajénsia 2WJ prepara hela atu halo pagamentu ba traballadór hirak ne’ebé kontratu remata ona, inklui atribui sertifikadu.

Ohin dadeer tuku 9:00 otl, traballadór timoroan ativu hamutuk 1000-resin fó solidariedade ba maluk traballadór na’in 21 ne’ebé kontratu remata ona iha 08 Outubru 2021, liu hosi halo greve iha Portu Tibar.

Portavóz, Ercio Camilo Fernandes Xavier, hateten traballadór na’in 21 ne’e durante ne’e servisu ativu no la kontra regra, maibé balun kontratu remata ona no kompañia la estende.

Alende ne’e, iha balun ne’ebé kompañia hapara hosi servisu dezde períudu serka sanitária, no parte kompañia la bolu to’o agora.

“Sira nonok de’it, entaun ami hamutuk ho kolega sira ne’ebé mak ativu hela ne’e, hato’o sentidu solidariedade ba sira, atu ezije hodi hetan esplikasaun ruma. Ami evita atu labele akontese mós ba ami iha futuru,” Ercio Camilo Fernandes Xavier, hateten.

Nune’e mós Responsável Ajénsia 2WJ, Sebastião Perreira rekoñese katak, loos duni iha traballadór hamutuk na’in 21 mak kontratu remata ona iha 08 Outubru, no Ajénsia labele estende tanba haree ba projetu ne’ebé oras-ne’e serbisu komesa menus ona no la presija ona traballadór barak.

Kontratu ba traballadór sira ne’e mós determinadu no temporariamente de’it, nune’e bainhira kontratu remata kompañia bele deside hakotu bazeia ba nesesidade.

Tuir dadus, oras-ne’e daudaun iha traballadór hamutuk 1000-resin, no tuir planu Portu ne’e sei inaugura iha tinan 2022.

Investimentu ba konstrusaun portu internasionál ne’e, ezekuta hosi Timor Port S.A ne’ebé hetan suporta hosi sub-kontratór sira ho modalidade Parseria Públiku Privada (PPP).

Konstrusaun ne’e Governu aloka millaun $130, Timor Port no Bolloré aloka hamutuk millaun $140, ne’ebé totál millaun $270 ba faze inísiu.

Tuir planu, totál investimentu orsamentu ba Portu Tibar to’o tinan 30 ho valór millaun $500-resin.

Jornalista: Rogério Cárceres