Hatutan.com, (14 Outubru 2021), Dili—VIII Governu Konstitusionál ne’ebé lidera hosi Primeiru Ministru (PM), Taur Matan Ruak, delega ona ekipa ida tán kompostu hosi ema na’in 120, inklui membru Governu na’in-hitu, hodi ba partisipa mós iha expozisaun Dubai.

Ministru Koordenadór Asuntu Ekonómiku (MKAE), Joaquim Amaral. Foto/MKAE.

Expozisaun Dubai hola parte iha expozisaun mundiál ida ne’ebé país-sira halo, no iha  tinan 2021 organiza hosi nasaun Uni Emiradu Árabe, ne’ebé konvida nasaun hotu-hotu, fó mós oportunidade durante loron ida tomak atu bele selebra ida-idak nia loron nasionál.

Tuir planu, Timor-Leste (TL) sei selebra loron Proklamasaun Independénsia 28 Novembru 1975, inklui halo aprezentasaun kona-bá dansa kulturál sira, nu’udár identidade nasionál.

“Delegasaun TL, hamutuk ho membru Governu no sira ne’ebé atu halo aprezentasaun kulturál, ita ba expo Dubai atu selebra ita nia loron nasionál iha ne’ebá. Ita iha de’it loron nasionál mak 28 Novembru nu’udár loron independénsia,” Ministru Koordenadór Asuntu Ekonómiku (MKAE), Joaquim Amaral, hateten iha Sala VIP, Aeroportu Komoro molok dezloka ba Dubai ho aviaun Citilink, Kinta (14/10/21).

Tuir kalendáriu, TL sei selebra loron nasionál iha 18 Outubru 2021, ho atividade Isaar Bandeira nasionál, sei halo mós aprezentasaun dansa kulturál ho númeru boot, tanba presija hatudu diversidade kulturál ne’ebé TL rasik iha.

Governante ne’e konsidera expozisaun ne’e hanesan oportunidade diak ida ba país partisipante-sira atu hatudu sira-nia rikeza no potensialidade ne’ebé sira iha.

Tanba ne’e, iha fulan Juñu  nia laran, país partisipante-sira bele organiza momentu sira-ne’e, hodi aprezenta potensialidade ne’ebé iha.

Delegasaun ne’e sei halo aprezentasaun kulturál lubuk ida, inklui kulinária, forum bisnis hosi ministériu sira sei halo aprezentasaun kona-bá potensialidade setór mina no setór sira seluk.

Forum sira balun sei hala’o iha Novembru ho Dezembru, ne’ebé sei tenta atu prienxe kalendáriu-sira ne’ebé komisaun organizadora expo fó ona.

Delegasaun ne’e hamutuk ema na’in 120, ho durasaun tempu semana ida iha Dubai, hahú hosi loron 14 to’o 21 Outubru sei fila hikas mai TL.

Membru Governu ne’ebé dezloka ho ekipa mak hanesan, Ministru Koordenadór Asuntu Ekonómiku (MKAE), Joaquim Amaral, Ministru Petróleu no Minerais (MPM), Víctor da Conceição Soares,  Ministru Transportes no Komunikasaun (MTK), José Agostinho da Silva, Ministru Agrikultura no Peska (MAP), Pedro dos Reis, Ministru Turízmu Komérsiu no Indústria (MTKI), José Lucas do Carmo da Silva, Vise Ministru Negósiu Estranjeiru no Kooperasaun (MNEK), Juliăo da Silva no Vise Ministru Turizmu Komérsiu no Indústria (MTKI), Domingos Lopes Antunes.

Orsamentu no Preparasaun

Iha loron 13 fulan Setembru, Ministériu Turizmu Komérsiu no Indústria (MTKI), hamutuk ho Autoridade Nasionál TL ba Expo Dubai 2020, husik delegasaun hamutuk na’in 14, arranka uluk ba Dubai Emiradu Árabe Unidu, hodi halo preparasaun.

Expozisaun ne’e realiza ona iha loron 01 fulan Outubru 2021 to’o 31 Marsu 2022, no TL partisipa hodi aprezenta produtu 50-resin no komersializa produtu 100-resin kompostu hosi produtu agríkola, artezanatu, minerál no tais.

Iha espozisaun ne’e mós TL hetan espasau espesiál gratuita ba aprezentasaun ho nia luan metru 250. Área ba espozisaun ne’e iha ektare 438 iha Dubai exebition Center  ne’ebé partisipa hosi nasaun 192 hosi mundu tomak.

Orsamentu ba preparasaun expo Dubai mai hosi Orsamentu Jerál Estadu (OJE) 2021, ho totál millaun $1-resin (30%) no millaun $2-resin ho nia ekivalénsia 70%  nu’udár apoiu hosi estranjeiru.

Horta Hetan Konvite

José Ramos Horta. Foto/Hatutan.com.

Iha semana kotuk, Premiadu Nobel ba Pás, José Manuel Ramos Horta hetan konvite hosi liurai boot Abudaby hodi vizita expozisaun ne’e tanba Sekretáriadu ba Prémiu Internasionál ne’e iha Abudaby.

“Klaru buat hotu-hotu tuir sira, maibé iha ne’ebá, tanba expo iha, ha’u labele falta atu ba vizita ita nia expo. Ha’u haree expo simples, tanba orsamentu ne’ebé Governu tau mós la’ós boot. Sira halo buat ne’ebé sira bele,” Horta hateten ba jornalista-sira iha Aeroportu Komoro, hafoin fila hosi Dubai, Kinta (14/10/21).

Durante iha Dubai, Horta hasoru direta ho ekipa TL nian ne’ebé fulan lubuk ida nia laran serbisu ba ida-ne’e no konsege hetan hetan komentáriu di’ak hosi vizitante balun ne’ebé nia rasik koñese hosi ema Dubai rasik.

“Ema hosi rai sira seluk, ha’u tuur han ho sira, no komenta  katak, timoroan sira  servisu di’ak ho dedikasaun, dixiplina, simu bainaka ho di’ak, iha servisu kalan-loron,” Horta konta tuir.

Jornalista: Rogério Cárceres