Hatutan.com, (03 Dezembru 2021), Dili—Parlamentu Nasionál (PN) liu hosi Partidu Unidade Dezenvolvimentu Demokrátiku (PUDD), husu ba Primeiru Ministru (PM) VIII Konstitusionál, Jenerál Taur  Matan Ruak atu fó atensaun no tetu didi’ak kona-bá desizaun hodi delega membru Governu sira utiliza osan Estadu, nadodon ba Expozisaun Dubai tinan 2020.

Membru Governu sira ne’ebé partisipa iha Expo Dubai 2020. Foto/Espesiál Expo Dubai TL.

Prezidente bankada PUDD, António de Sá Benevides lamenta tanba membru Governu na’in-hitu kedan mak  rame-rame ho delegasaun ema na’in atus-ida-rua-nulu (120), ba partisipa iha Expo Dubai lori osan povu nian hosi fundu mina-rai ba gasta ‘saguati de’it’ iha ema nia nasaun. 

Notísia iha Relasaun:Membru Governu Na’in-Hitu Lori Ema Na’in-120 ‘Nadodon tán’ ba Dubai

PUDD aseita ho númeru delegasaun ne’ebé marka psrezensa iha Expo Dubai, liu-liu ho prezensa membru Governu ne’ebé partisipa, sai polémika, no defaktu mosu lamentasaun barak iha komunidade nia leet.

Ho situasaun COVID-19, no inundasaun ne’ebé nasaun TL hasoru, la devia ser Governu haruka ninia delegasaun ne’ebé boot tebes, ba partisipa iha eventu internasional boot hanesan Expo iha Dubai.

PUDD haree katak, ai-moruk vasina, TL hetan doasaun hosi rai seluk, osan ba konstrusaun estrada Governu deve hosi banku, osan ba edukasaun Governu hahú deve hosi banku.

“Maibé, ita nia osan mina-rai, ita hodi ba gasta iha Expo Dubai. Señor Primeiru Ministru, ida-ne’e in-aseitável. Sé ida ne’e ita hotu dehan di’ak hela, entaun ita labele ko’alia kona-bá polítika de poupansa. Politika de poupansa, labele tau de’it iha teória, propaganda, ou retórika, maibé presija tau iha prátika. Espera iha futuu, señor Primeiru Ministru sei tetu didi’ak molok autoriza membru Governu sira rame-rame ba partisipa iha eventu ruma,” António de Sá Benevides, hateten iha intervensaun ikus nivel bankada, iha ámbitu diskusaun jeneralidade OJE 2022, iha plenária PN, Sesta (03/12/21).

Maibé, iha sikun seluk, deputadu PUDD ne’e haree katak, maski Governu hetan kritika barak, hosi sosiedade, maibe realidade iha parte pozitivu ne’ebé mak merese hetan Timoroan hotu nia rekoñesimentu.

Delegasaun Timor-Leste ho Uniaun Emiradu Árabe iha foto hamutuk pavillaun Expo Dubai 2020 iha selebrasaun loron nasionál Timor-Leste nian iha loron 18 Outubru 2021. Foto/Espesiál

Nia hakarak kongratula ba chief, Timoroan na’in-rua mak hanesan, António Sepeda, ne’ebé reprezenta INDMO (Instituto Nacional Dezenvolvimento Mão de Obra), no sentru formasaun sira iha Timor laran, liu-liu hosi sentru treinamentu juventude Komoro, no Cesar Agosto da Costa Lurdes.

“Ne’ebé reprezenta indústria restaurante Timor-Leste, sira na’in-rua konsege promove ita nia hahan lokál hanesan, hahan hakmerik, tukir no saboko, sai ona hahan internasional iha eventu Expo Dubai. Oras ne’e hahan hirak ne’e sai ona hahan ne’e rekoñesidu iha mundu,” Deputadu António de Sá Benevides, apresia.

Kona-bá preokupasaun ne’e, maski Primeiru Ministru (PM), Taur Matan Ruak, la fó resposta direta maibé Xefe Governu ne’e dehan, Governu hatene katak, mudansa hotu-hotu ne’ebé sei akontese iha TL, sei la fásil no sei bele akontese, bainhira iha kontribuisaun hosi Timoroan hotu nian.

Hanesan mudansa sira ne’ebé hala’o daudaun iha finansas públikas, hodi hili modelu orsamentu pur-programa no rezultadu sira sei ajuda tebes Governu atu uza nia rekursu sira ho forma ne’ebé sustentável hodi benefisia povu no nasaun iha tempu naruk.

“Goveru aponta preokupasaun hotu-hotu ne’ebé aprezenta hosi distintas no distintu deputadu sira durante debate no promete atu kontinua hametin parseria  ho Parlamentu Nasionál, sosiedade sivil no parseiru dezenvolvimentu sira hotu, tanba ita hotu partilla preokupasaun hanesan. Hametin pás, haburas dezenvolvimentu umanu, no dudu kresimentu ekonómiku hodi hadi’a padraun moris povu Timor nian,” Primeiru Ministru, Taur Matan Ruak, responde preokupasaun sira.

Iha 14 Outubru 2021, VIII Governu Konstitusionál ne’ebé lidera hosi Primeiru Ministru (PM), Taur Matan Ruak, delega ekipa ida kompostu hosi ema na’in 120, inklui membru Governu na’in-hitu, hodi ba partisipa mós iha expozisaun Dubai.

Membru Govenu sira ne’ebé lidera hosi Ministru MKAE, Joaquim Amaral halo ankontru bilateral iha Dubai. Foto/Espesiál

Expozisaun Dubai hola parte iha expozisaun mundiál ida ne’ebé país-sira halo, no iha  tinan 2021 organiza hosi nasaun Uni Emiradu Árabe, ne’ebé konvida nasaun hotu-hotu.

Membru Governu ne’ebé dezloka ho ekipa mak hanesan, Ministru Koordenadór Asuntu Ekonómiku (MKAE), Joaquim Amaral, Ministru Petróleu no Minerais (MPM), Víctor da Conceição Soares,  Ministru Transportes no Komunikasaun (MTK), José Agostinho da Silva, Ministru Agrikultura no Peska (MAP), Pedro dos Reis, Ministru Turízmu Komérsiu no Indústria (MTKI), José Lucas do Carmo da Silva, Vise Ministru Negósiu Estranjeiru no Kooperasaun (MNEK), Juliăo da Silva no Vise Ministru Turizmu Komérsiu no Indústria (MTKI), Domingos Lopes Antunes.

Orsamentu no Preparasaun

Iha loron 13 fulan Setembru, Ministériu Turizmu Komérsiu no Indústria (MTKI), hamutuk ho Autoridade Nasionál TL ba Expo Dubai 2020, husik delegasaun hamutuk na’in 14, arranka uluk ba Dubai Emiradu Árabe Unidu, hodi halo preparasaun.

Expozisaun ne’e realiza ona iha loron 01 fulan Outubru 2021 to’o 31 Marsu 2022, no TL partisipa hodi aprezenta produtu 50-resin no komersializa produtu 100-resin kompostu hosi produtu agríkola, artezanatu, minerál no tais.

Iha espozisaun ne’e mós TL hetan espasau espesiál gratuita ba aprezentasaun ho nia luan metru 250. Área ba espozisaun ne’e iha ektare 438 iha Dubai exebition Center  ne’ebé partisipa hosi nasaun 192 hosi mundu tomak.

Orsamentu ba preparasaun expo Dubai mai hosi Orsamentu Jerál Estadu (OJE) 2021, ho totál millaun $1-resin (30%) no millaun $2-resin ho nia ekivalénsia 70%  nu’udár apoiu hosi estranjeiru.

Jornalista: Rogério Perei Cárceres