Hatutan.com, (23 Novembru 2021), Dili—Ministru Koordenadór Asuntu Ekonómiku (MKAE), Joaquim Amaral, deklara katak, prezensa Timor-Leste nian iha Expo Dubai, ‘seidauk’ bele garante atu dada investór sira mai ‘kedan’ investe iha rai laran.

Ministru Koordenadór Asuntu Ekonómiku (MKAE), Joaquim Amaral. Foto/MKAE.

Expo Dubai, sai nu’udár eventu internasionál ida ne’ebé atu lori TL ba mundu atu bele hatene kona-bá potensialidade saida mak rai ka Estadu ida iha, liu-liu iha pavilium ne’ebé expo Dubai fó ba TL.

Notísia iha Relasaun:Membru Governu Na’in-Hitu Lori Ema Na’in-120 ‘Nadodon tán’ ba Dubai

Informasaun kona-bá investimentu ne’e, nesesáriu duni ba TL atu bele ema mai investe iha rai laran.

Advertisement

Maibé, hanesan informasaun, investidór sira mós iha sira nia maneira rasik atu halo croos chek, verifika informasaun ne’ebé fó, hafoin bele foti desizaun bisnis.

“Tanba ne’e, ita bele iha enkontru, maibé desizaun atu halo investimentu ne’e prosesu ida tán. Tanba ida ne’e la’os dehan ita ohin hasoru-malu, depois aban prosesu ne’e kedan sira sei haree,” Ministru Koordenadór ba Asuntu Ekonómiku (MKAE), Joaquim Amaral, hateten ba jornalista sira, hafoin sorumutu ho Prezidente Repúblika, Francisco Guterres Lú-Olo, iha Palásiu Prezidensiál, Ai-tarak laran, Tersa (23/11/21).

TL iha kondisaun lubuk ida, maski bele iha poténsia hanesan kafé, maibé mós tenke iha infraestrutura seluk atu apoia hodi halo

Bidu biti ne’ebé delegasaun Timor Leste aprezenta iha Expo Dubai 2020. Foto/Facebook.

investimentu ida ba iha plantasaun kafé, ka investimentu iha sosa kafé nian.

Situasaun ida-ne’e investidór sira presija mós tempu oitoan atu bele foti desizaun. Informasaun TL nian ne’ebé fó iha expo Dubai, bele cross cheek hosi ajénsia sira ne’ebé TL rasik iha, hanesan Trade Invest, inklui iha ministériu sira seluk ne’ebé iha relasaun ho setór produtivu sira.

Ministru Joaquim hatutan, maski investidór sira investe to’o ona iha nível Association of South East Asean Nation (ASEAN) ho Austrália, maibé sira presija nafatin hetan informasaun serteza molok foti desizaun.

Advertisement

“Ita lalika pesimista, importante ita optimista. Tanba investimentu ne’e labele hanoin osan, investimentu ba reputasaun ne’e mós investimentu ida, informasaun ne’ebé ita fó sai ne’e investimentu ida, ema koñese ita mós investimentu ida, inklui ema lori osan mai, ne’e di’ak liután,” Ministru Joaquim Amaral, afirma tan.

Tuir nia haree katak, produtu ne’ebé TL tau iha Expo Dubai, diferente ho produtu seluk ne’ebé nasaun barak iha.

TL hatudu produtu kafé ida ne’ebé ho baze ba orgániku, no nia presija merkadu ida ne’ebé espesiál tebes.

Delegasaun Timor-Leste ho Uniaun Emiradu Árabe iha foto hamutuk pavillaun Expo Dubai 2020 iha selebrasaun loron nasionál Timor-Leste nian iha loron 18 Outubru 2021. Foto/Espesiál

Iha loron 13 fulan Setembru, Ministériu Turizmu Komérsiu no Indústria (MTKI), hamutuk ho Autoridade Nasionál TL ba Expo Dubai 2020, husik delegasaun hamutuk na’in 14, arranka uluk ba Dubai Emiradu Árabe Unidu, hodi halo preparasaun.

Expozisaun ne’e realiza ona iha loron 01 fulan Outubru 2021 to’o 31 Marsu 2022, no TL partisipa hodi aprezenta produtu 50-resin no komersializa produtu 100-resin kompostu hosi produtu agríkola, artezanatu, minerál no tais.

Iha espozisaun ne’e mós TL hetan espasau espesiál gratuita ba aprezentasaun ho nia luan metru 250. Área ba espozisaun ne’e iha ektare 438 iha Dubai exebition Center  ne’ebé partisipa hosi nasaun 192 hosi mundu tomak.

Advertisement

Orsamentu ba preparasaun expo Dubai mai hosi Orsamentu Jerál Estadu (OJE) 2021, ho totál millaun $1-resin (30%) no millaun $2-resin ho nia ekivalénsia 70%  nu’udár apoiu hosi estranjeiru.

Timor-Leste nia partisipasaun iha Expo Dubai, sei remata iha 31 marsu 2022.

Jornalista: Rogério Pereira Cárceres

Advertisement