Hatutan.com (21 Outubru 2021), Dili—Ekipa Futeból Lica-Lica Lemorai, obrigadu tenke fahe pontus ho Kablaki FC iha jornada daruak grupu B Liga Futeból Timor-Leste.

Tabela klasifikasaun.

Situasaun ne’e obriga Lica-Lica Lemorai okupa pozisaun da-haat iha klasifikasaun grupu B, tanba rekolla de’it pontus rua no Kablaki FC nafatin hela iha jona mean ho pontu ida.

Notísia iha Relasaun:Atletico Ultramar ‘Hakoi’ Mehi Nagarjo FC ba Primeira Divizaun

Iha jogu loraik ne’e, ekipa rua hatudu jogu ida atrativu no furak iha adeptus sira nia matan, bainhira árbitru fó sinál liu hosi hú árbitu jogu primeira parte hahu ekipa rua idaidak tun ho nia ritmu.

Advertisement

Kada liña hosi ekipa rua mantein sira nia jogu. Jogadór hosi Kablaki FC koko halo penetrasaun hosi liña kotuk, liu husi so’e bola as maibé esforsu ne’e hetan antesipasaun másimu hosi Lica-Lica Lemorai hodi hada’u tiha bola ne’e.

Haree no estuda hosi tátika ne’ebé Kablaki FC iha, Lica-Lica Lemorai buka kedan solusaun hodi joga hosi ain ba ain no konsege domina tiha bola iha klaran iha jogadór  médiu Nilton de Calvalhi no Miguel Barreto nia ukun, maski nune’e Kablaki FC buka meius hotu hodi halo kontra atu bele asegura sira nia ekipa hsi derrota.

Tama ba minutu 38, ekipa Lica-Lica Lemorai halo ameasa ida perigu tebes liu hosi jogadór Nelson da Costa, ne’ebé aproveita bola livre hodi halo sutu ida, maibé bola ne’ebé nia lansa kona de’it iha besi rin parte leten no obriga baliza tenke halo esforsu atu asegura nia rede.

Liu de’it minutu lima, ekipa Lica-Lica Lemorai muda kedan skore ba 1:0 liu hosi nia jogadór  Manuel do Carmo, ne’ebé simu asisténsia hosi Elder Kiko.

Golu ne’e lori Lica-Lica Lemorai ukun Kablaki FC iha primeira parte no jogu primeira parte termina ho skore 1:0.

Advertisement

Tama ba segunda parte, Kablaki FC halo esforsu atu bele sai hosi presaun nia laran no tenta atu muda skore hodi asegura sira nia pozisaun iha tabela klasifikasaun grupu A.

Nafatin halo jogu ho tátika no instrusaun ne’ebé mai hosi treinadór Kablaki FC halo ameasa no tenta atu hatama golu liu hosi avansadu Pedro da Cruz no Oligório Ximenes, maibé sorte seidauk iha tanba baliza Lica-Lica Lemorai sei antesipa no salva ho di’ak tebes.

Lica-Lica Lemorai no Kablaki Fc halo subtituisaun ba jogadór iha kada liña atu bele asegura no hadi’a tátika jogu.

Hafoin iha mudansa ba jogadór, ekipa rua hasa’e tensi jogu liu hosi kontra atake ne’ebé iha. Lica-Lica Lemorai sei nafatin ukun no domina jogu maske hetan kontra atake makas hosi Kablaki FC.

Esforsu ne’ebé Kablaki FC halo hamosu duni rezultadu, jogadór Angelito Oliveira, ne’ebé foin tama iha minutu 64 oferese golu dahuluk ba Kablaki FC iha minutu 75 liu hosi kolaborasaun ne’ebé halo ho jogadór Acoli Maia, situasaun ne’e halo skore nakfilak ba 1:1.

Advertisement

Hafoin jogu termina treinadór Lica-Lica Lemorai Nelson Soares, hateten nia ekipa konsege manan iha primeira parte, maibé lakon iha segunda parte tanba falla iha tékniku no adversáriu sira hatene no aproveita fakeza iha liña kotuk ikus mai prodúz golu ida hodi halo impata.

Iha parte seluk treinadór Kablaki FC, João Fernandes, orgullu ho jogadór sira tanba bele halo tuir instrusaun ne’ebé iha, hodi rekolla pontus ida hosi jogu loron ohin hasoru Lica-Lica Lemorai.  

Jornalista: Vito Salvadór

Advertisement