Hatutan.com (22 Outubru 2021), Díli—Jogu kontinuasaun grupu A iha Liga Futebol Timor Leste, entre ekipa FC Porto Taibesse ho As Marca, termina ho vitória ba FC Porto Taibesse.

FC Porto Taibesse. Foto/FFTL.

Situasaun ne’e obriga As Marca hela iha zona me’an grupu A no FC Porto Taibesse provizoriamente lidera grupu A ho pontus neen (6).

Notísia iha Relasaun: Lica-Lica Lemorai ho Kablaki FC Fahe Pontus iha Jornada Daruak

FC Porto Taibesse hatudu nia superioridade iha primeira parte bainhira árbitru hú apitu sinál jogu hahú FC Parto Taibesse hola kedan inisiativa hodi halo atake ba área As Marca.

Inisiativa FC Porto Taibesse ne’e halo ho intensaun atu bele hetan vitória hodi asegura sira nia klasifikasaun iha tabela grupu A.

Tama ba minutu 9, jogadór FC Porto Taibesse Marcelino Fernandes, obrigadu tenke simu kartaun me’an tanba lori liman dudu bola.

Oportunidade ba FC Porto Taibesse mai nafatin, Jogadór Jerónimo Freitas halo ameasa dala barak ba As Marca, maibé falla iha parte finalidade tanba bola ne’ebé nia suta sempre salva hosi baliza.

As Marca la nonok hodi buka oportunidade liuhosi kontra atake iha avansadu Ivan Araújo no Ezequiel da Cruz koko aproveita oportunidade hosi asisténsia Alvaro Kefi iha liña klaran, maibé la fó ameasa signifikativu no Portu Taibesse nafatin domina bola ho ritmu jogu rasik.

Molok tun ba deskansa iha minutu 32, jogadór FC Porto Taibesse Lázio Piedade simu kartaun kinur tanba komete erru hasoru jogadór As Marca.

Jogu primeira parte remata no ekipa rua fahe pontus hodi mai deskansa molok kontiniua jogu segunda parte.

Iha segunda parte FC Porto Taibesse hola inisiativa hodi halo kedan subtituisaun ba nia jogadór, hasai Marcelino Fernandes no hatama José Pereira.

Subtituisaun ne’e lori kedan rezultadu ne’ebé iha minutu 46 João Pereira hatama kedan golu ida hodi muda skore ba 1:0.

As Marca la lakon esperansa, maski joga iha udan laran, sira nafatin esforsu no tama ba minutu 49 avansadu As Marca, Carol de Araújo muda skore ba 1:1 liuhosi golu ne’ebé nia prodús tanba hetan asisténsia hosi Teófilo Barros.

Udan halo ekipa rua joga ho intesidade as. Udan halo ekipa rua simu matak malirin hosi natureza hodi kontinua sira nia esforsu.

Tamba ne’e, As Marca no FC Portu Taibesse idaidak defende nia ekipa no halo kontra atake ba malu maibé la rezulta golu ruma hodi muda skore iha tabela.

Tama ba minutu 63, jogadór As Marca, David Mendonça simu kartaun kinur hafoin komete erru.

As Marka nafatin halo substituisan ba nia jogadór ho intensaun bele rekopera fíziku ekipa nian, maibé subtituisaun ne’e la efetivu no FC Porto Taibesse konsege aproveita parte fraku hosi As Marca ne’ebé halo erru iha nia área parte liman loos.  Falta ida ne’e obriga Teófilo Barros tenke simu kartaun kinur.

Aproveita oportunidade ne’ebé iha, Eujevio Almeida ne’ebé hetan fiar hodi ezekuta bola falta konsege marka golu hodi muda skore ba 2:1 iha minutu 87.

Jogadór FC Porto Taibesse Thomas Elo, simu kartaun kinur iha minutu 89 no halo As Marca fó ameasa ikus ba nia ekipa, maibé la rezulta golu ruma.

Rezultadu ne’e obriga As Marca tenke hakruk ba FC Porto Taibesse tanba to’o  tempu extra  minutu tolu remata, situasaun iha tabela nafatin hatudu vitória ba FC Porto Taibesse.

Treinadór As Marca, Edwin Belo rekoñese forsa ekipa adversáriu tanba ho situasaun udan nune’e As Marca la konsege halo antisipasaun ho di’ak ikus mai tenke derrota duni.

Ekipa ne’e sei hadi’a tátika iha jogu tuir-mai maski As Marca laiha ona oportunidade atu bele hakatliu ba jogu primeira divizaun iha tinan oin.

Treinadór FC Porto Taibesse, José Moniz Gomes, konsidera vitória ne’e loke ona dalan ba ekipa ne’e atu hakat ba jogu primeira divizaun iha tinan oin.

Jornalista: Vito Salvadór