Hatutan.com, (23 Outubru 2021), Díli—Santa Cruz FC susesu lori fila pontu tolu hosi nia adversáriu Emanuel FC, hafoin konkista vitoria ho 2:0 liuhosi jogu minutu sia nulu (90) iha estádiu munisipál Dili, Sábadu (23/10/21).

Santa Cruz FC. Foto/LFTL.

Treinadór João Campos hateten, jogu minutu sia-nulu mak sei determina se mak iha direitu ba pontu tolu. 

Notísia iha Relasaun:FC Porto Taibesse ‘Hanehan’ As Marca ba Zona Me’an

Emanuel FC iha liu oportunidade atu konkista vitória ba jogu loraik ne’e, maibé Santa Cruz iha liu sorte hodi manan maski estatístika hatudu jogu Santa Cruz FC la másimu tanba sempre hetan presaun hosi Emanuel FC.

“Maski hetan presaun makás hosi parte adversáriu, maibé jogadór sira disiplina nafatin  hodi antesipa oportunidade ne’ebé iha, ikus-mai hetan vitória liu hosi golu rua ne’ebé prodús iha lorokraik ne’e,” João Campos hateten.

Iha parte seluk asistente treinadór Januário Almeida hateten jogadór sira falla totál atu aproveita oportunidade ne’ebé iha, maski estatístika hatudu Emanuel FC domina liu jogu durante minute 90.

“Estatístika hatudu Emanuel FC domina iha jogu, maibé falla atu halo golu tanba jogadór-sira la hatene aproveita oportunidade ikus-mai tenke sofre derrota,” Januário Almeida, subliña.

Iha jogu, adeptu sira bele nota saida mak treinadór sira haktuir, jogu foin hahú Santa Cruz FC lansa kedan ameasa ida ba Emanuel FC liu hosi jogadór Alexandro Corsino iha minutu 2.

Ekipa rua nafatin mantein sira nia tátika ho ritmu jogu ne’ebé iha, hodi halo kontra atake ba malu atu hetan golu.

Tensi jogu hahú sa’e no jogadór sira Santa Cruz FC sempre halo falta, enkuantu Emanuel FC aproveita situasaun ne’e hodi fó presaun ba ekipa Santa Cruz FC, maibé laiha ameasa signifikativu ruma.

Koko livre hosi presaun ne’ebé iha, tama ba minutu 8 jogadór Santa Cruz FC Libório Jerónimo aproveita asisténsia hosi Alexandre Corsino hosi parte karuk, hodi marka kedan golu ida no muda skore ba 1:0.

Emanuel FC nafatin hadi’a liña hodi buka oportunidade atu bele asegura sira nia ekipa hosi derrota.

Kapitaun Hosi Santa Cruz FC no Emanuel FC. Foto/LFTL.

Emanuel FC nafatin domina jogu hodi halo presaun barak ba iha Santa Cruz FC maski oportunidade hirak ne’e seidauk rezulta golu.

Iha kada minutu Emanuel FC sempre hamosu oportunidade maski falla iha finalidade, tama ba minutu 16 Emanuel FC halo subtituisaun ba nia jogadór hodi hasai Angelito Tilman no hatama Alexandre Morreira.

Ho subtituisaun ne’ebé iha la hatudu mudansa signifikativu ba iha ekipa Emanuel FC no tabela provizóriu hatudu Santa Cruz FC ukun iha primeira pate.

Tama ba segunda parte, Emanuel FC hola kedan inisiativa hodi halo atake ba iha ekipa Santa Cruz FC liu hosi jogadór Mário Quintão no Filomino Sávio.

Emanuel FC nafatin halo esforsu hodi  halo substituisaun iha liña defeza, hasai Vidal Correia no hatama Bernardino Sena.

Atu responde ba saida mak Emanuel FC iha, Santa Cruz FC mós halo subtituisaun ba nia jogadór iha liña oin hodi dada sai Emiliano Soares no hatama Alito da Cruz.

Santa Cruz FC nia subtituisaun ne’e lori duni rezultadu. Alito da Cruz konsege halo jogu hodi ultrpasa defeza Emanuel FC, maibé defeza Jovito Moniz halo falta no rezulta kartaun kinur.

Bola falta ba Santa Cruz FC, aproveita oportunidade ne’e jogadór Santa Cruz FC João Paulo de Sousa hiit bola falta ne’e no aproveita hosi Alexandre Corsino hodi marka kedan golu ida liu hosi ulun no muda skore ba 2:0.

Ho atrazu 2:0 obriga Emanuel FC tenke halo esforsu extra atu bele duni-tuir pontu hosi adversáriu.

Emanuel FC kontinua halo substituisaun hodi hasai defeza Juvito Moniz no hatama avansadu Luis Gusmão ho intensaun bele halo jogu hodi duni atrazu ne’ebé iha.

Jogadór Santa Cruz FC Julinho da Costa simu kartaun kinur iha minutu klaran hafoin la respeita regra fair play hodi abandona bola iha kampu ninin ho intensaun dada oras.

Emanuel FC nafatin aumenta halo subtituisaun iha liña klaran hodi hasai kapitaun ekipa Zeferino Nheu no hatama Carlos Soares atu bele halo armonizasaun iha liña klaran.

Alito da Cruz hosi Santa Cruz FC obrigadu tenke simu kartaun me’an hafoin halo falta ba oportunidade ne’ebé Emanuel FC hetan liu hosi defeza Bernardino Sena.

Atu asegura vitória ne’ebé iha, Santa Cruz FC halo substituisaun hodi hasai avansadu Alexandre Corsino hodi hatama médiu defensivu Jacinto da Silva.

To’o jogu segunda  parte termina laiha mudansa ba iha tabela no vitória ida-ne’e lori Santa Cruz FC ba lidera grupu B ho pontus neen (6) iha Liga Futeból Timor-Leste.

Jornalista: Vito Salvadór