Hatutan.com, (27 Outubru 2021), Dili—Komandu Polísia Nasionál Timor-Leste (PNTL), hametin liután parseria ho Fundu Nasaun Unida ba Populasaun, iha Timor-Leste (UNFPA-TL), ne’ebé foka ba asuntu saúde, liu-liu prevene HIV no moras hada’et oioin ba membru-sira.

Serimónia asinatura nota entendimentu entre Komandate Jerál PNTL, Komisáriu Polísia, Faustino da Costa ho Reprezentante UNFPA, Ronny Lindstrom iha Suai Room, Timor Plaza, Kuarta (27/10/21). Foto/UNFPA.

Parseria ne’e hala’o durante tinan sia (9) ona, no ohin formaliza ho sira nia misaun mak haree liu ba asuntu saúde no reprodutiva sexuál ba populasaun hotu-hotu, oinsá bele hasees aan hosi moras hada’et sira inklui HIV-SIDA.

UNPFA konsege estabelese ona Unidade Asisténsia Médika ka klínika ida iha komandu jerál PNTL, liuhosi departamentu saúde, atu bele haree kona-bá kondisaun saúde membru sira-nian, bainhira sofre moras ruma.

“Agradese ba UNFPA ne’ebé servisu hamutuk hodi apoia PNTL. Akordu ida-ne’e ami halo, tanba dezde klinika PNTL ne’e hari’i, iha servisu ne’ebé sira halo, deteta katak presija duni tanba membru PNTL barak mós afetadu ho moras ida hanesan ne’e, no ida-ne’e mak ami hakarak atu hato’o liu-liu liga ba moras hada’et hanesan HIV-SIDA,” Komandate Jerál PNTL, Komisáriu Polísia, Faustino da Costa hateten iha Suai Room, Timor Plaza, Kuarta (27/10/21).

Advertisement

Atividade ne’ebé hala’o dezde 20211 mak hanesan, sensibilizasaun, semináriu, workshop, inklui fasilita formasaun ba membru sira iha nível formadór kona-bá prevensaun ba moras hada’et.

Servisu ida-ne’e, hetan apoiu hosi UNFPA, Ministériu Saúde, Marry Stopes Internasionál, atu bele konkretiza servisu sira ne’e hodi hametin liután dokumentu própriu, tanba ne’e maka ohin halo akordu ida ne’e, nune’e ba futuru, servisu ida ne’e kontinua nafatin.

PNTL mós iha programa hadomi vida, atu loke tán espasu diak, nune’e atividade ida kona-bá sensibilizasaun moras hada’et no la hada’et ba familia PNTL, hodi bele sai mós programa nasionál ida ba membru sira iha munisipiu no baze.

Durante tinan 2020 no 2021, PNTL sosa ona ekipamentu balun hanesan transporte hodi fasilita membru sira, maibé hetan mós apoiu hosi Governu liuhosi MS ho UNFPA.

“Ami iha doutór hamutuk na’in-hitu, maibé ami iha enfermeiru mós na’in-10, ne’ebé agora daudaun atu dezloka ba munisípiu hodi fahe informasaun ba membru sira hotu,” nia hateten.

Advertisement

Problema boot ne’ebé ekipa médiku PNTL sira hasoru maka menus transporte, atu ajuda fasilita sira hala’o atividade kampaña vasina COVID-19 nian, no dala-ruma sempre hetan ajuda hosi MS no UNFPA.

Reprezentante UNFPA, Ronny Lindstrom, konsidera akordu ne’ebé halo entre parte rua, sei hametin liu tán lasu kooperasaun, no UNFPA rasik iha komitmentu atu hala’o treinamentu ba membru-sira iha área prevensaun ba moras hada’et.

Tuir dadus hosi Komisaun Nasionál Kombate HIV-SIDA Timor-Leste, hahú hosi tinan 2003 to’o fulan juñu 2021, rejista ema ho moras HIV-SIDA hamutuk 1.374.

Hosi númeru ne’e, iha na’in 155 mak mate, na’in 656 mak hala’o tratamentu intensivu no restu seidauk hala’o tratamentu tanba hela iha área rurál no dook hosi fasilidade saúde.

Sira ne’ebé sofre moras ne’e, maioria ho idade joven, hahú hosi 14 to’o 50. Tanba ne’e, Organizasaun barak mak serbisu hamutuk ho Minsitériu Saúde (MS), hanesan Estrela+ no Esperansa, hodi hala’o tratamentu no halo akompañamentu ba pasiente na’in 565.

Advertisement

Jornalista: Rogério Cárceres