Hatutan.com, (28 Outubru 2021), Díli-Dadus provizóriu hosi Sekretariadu Tékniku ba Administrasaun Eleitorál (STAE) to’o iha loron 22 fulan-Outubru,  tinan ne’e, hatudu katak eleitór iha territóriu Timor-Leste no diaspora hamutuk 855,630.

Komunidade sira forma hodi ba vota iha eleisaun jerál ne’ebé organiza hosi STAE no superviziona hosi CNE. Foto/Dok.Espesiál

“Prosesu sei kontinua la’o hela, iha nivel postu administrativu sira no mós iha rai-li’ur ka diaspora no prosesu sei to’o iha loron 14 fulan-Janeiru 2022,” Diretór Jerál STAE, Acilino Manuel Branco, informa ba Hatutan.com iha kna’ar fatin, Caicoli, Díli, Kinta (28/10/2021).

Hosi númeru atualizasaun baze dadus no resenseamentu eleitorál ne’e, kompostu hosi rai-laran nian iha eleitór 849,94, no iha rai-li’ur ka diaspora iha eleitór 6,536.

Dadus eleitór hirak ne’e, sei provizóriu, tanba  atendimentu ba prosesu ne’e sei la’o to’o iha loron 14 fulan-Janeiru 2022, no STAE sei kontinua atualiza rezultadu no progresu sira iha kada semana ka semana rua.

Kona-bá efetividade preparasaun ba kalendáriu tentativa ne’ebé STAE rasik ho Komisaun Nasionál ba Eleisaun (CNE-sigla Portugués), propoin ona data tentativa katak eleisaun Prezidente Repúblika (PR) nian ne’ebé sei akontese iha 19 Marsu 2022  no STAE ho CNE nia preparasaun atinje ona 60%.  

“Ida ne’e efetivu, preparasaun kuaze kompletu tiha ona. Data tentativa STAE mak sei propoin para depois Prezidente Repúblika dekreta,”  nia tenik.

Hafoin termina tiha resenseamentu eleitorál nian, STAE sei tama iha faze rekrutamentu ofisiál eleitorál sira no ikus mak sei haree oinsá atu bele halo regulamentasaun sira ne’ebé sei diskute iha semana oin nune’e bele konklui.

Jornalista : Rogério Cárceres