Hatutan.com, (04 Novembru 2021), Dili—Atletico Ultramar FC susesu konkista vitória kontra nia adversáriu Santa Cruz FC ho skoree 1:0 iha kuarta jogu grupu B segunda divizaun.

Jogu entre Atletico Ultramar FC kontra Santa Cruz FC, Kinta (04/11/21). Foto/LFTL.

Vitória ne’e lori hikas Atletico Ultramar FC fila hikas ba primeira divizaun Liga Futeból Timor Leste (LFTL) époka 2022.

Notísia iha Relasaun:Nagarjo FC Halo ‘Supreza’ ba Santa Krúz FC

Bainhira arbitu Francisco Perreira hu apitu sinál jogu hahú ekipa Santa Cruz FC halo kedan jogu ho kuidadu atu bele asegura vitoria hodi hakman sira nia hakat ba pasu tuir mai.

Iha minutu sira uluk bola sei iha kontrollu Santa Cruz FC, ho domina no kontrolu ne’ebé iha jogadór Santa Cruz FC hahú halo ameasa hodi buka oportunidade atu bele hata uluk golu.

Jogadór Atletico Ultrama FC Albertinho Ribeiro sofre aleiza no obriga treinadór tenke halo substituisaun hodi hatama avansadu Arsenio Amaral iha minutu 6, substituisaun ne’e halo ho intensaun bele rekopera ekipa hodi hadi’a jogu iha minutu sira tuir mai.

Atletico Ultramar FC halo ameasa ba iha Santa Cruz FC liu hosi bola as (longshoot), esforsu ne’e lori duni rezultadu iha minutu 16, hafoin simu bola hosi liña kotuk avansadu Elvis da Silva lansa kedan golu ida hosi dook hodi muda skore ba 1:0.

Golu ne’e lori motivasaun ba Atletico Ultramar FC no halo Santa Cruz FC hela iha presaun nia laran.

Situasaun ne’e bele haree hetan bainhira jogadór sira hosi Santa Cruz FC sempre falla iha passa bola ne’ebé obriga sira tenke hela iha risku nia laran.

Florindo Soares jogadór Atletico Ultramar FC simu kartaun kinur hafoin halo falta hasoru jogadór Santa Cruz FC.

Atu sai hosi risku Santa Cruz FC halo primeiru substituisaun ba nia jogadór nune’e atu halo mudansa ba taktika no asegura liña kotuk Santa Cruz FC halo substituisaun ba jogadór hodi hasai Denilson dos Santos no hatama  Jacinto da Silva ho intensaun bele hadi’a defeza iha minutu 35.

Esforsu ne’ebé iha Santa Cruz FC konsege lansa atake ba iha parte Atletico Ultramar FC maibé la rezulta golu ruma hodi muda skore iha tabela.

Tama ba tempu adisionál primeira parte nian Santa Cruz FC kontinua halo substituisaun hodi hatama avansadu Alexandre Corsino no hasai Emiliando Soares maibé to’o arbitu hu apitu ikus laiha mudansa ba tabela skore.

Tama ba segunda parte ekipa rua nafatin ho formatu antes no la halo mudansa ba jogadór iha kada liña.

Tama ba minutu jogadór Atletico Ultramar Arsenio Amaral halo falta hasoru jogadór Santa Cruz FC Willian Quintas Vong iha área proividu ne’ebé obriga arbitu hatudu ba penalidade.

Oportunidade ne’ebé Santa Cruz FC iha liu let de’it tamba Liborio Geronimo falla ezekuta penaltu. 

Santa Cruz FC nafatin halo esforsu atu bele asegura ekipa hosi derrota no obriga jogadór Jaserlito Soares tenke simu kartaun kinur tamba komete erru hasoru jogadór ekipa adversáriu liu deit minute lima iha jogadór Lexy Romariu Atok simu mos kartaun kinur.

Hafoin failansu hirak ne’e ekipa treinadór hosi parte Atletico Ultramar FC halo substituisaun ba nia jogadór hodi hasai Arsenio Amaral no hatama Noel dos Santos iha minute 63.

Ho substituisaun ne’e halo ekipa rua nafatin halo kontra atake ba malu. Tama ba minutu 66 jogadór Atletico Ultramar FC Jaserlito de Jesus obrigadu tenke simu kartaun mean tamba satan bola ho liman uainhira ekipa adversáriu halo atake.

Hosi kartaun mean ne’ebé iha obriga Atletico Ultramar FC tenke asegura nia ekipa hosi atake ne’ebé Santa Cruz FC halo.

Oportunidade lubuk ida ne’ebé Santa Cruz FC iha maibé avansadu hosi ekipa ne’e falla marka golu no Atletico Ultramar FC koko sai hosi presaun hodi halo ameasa ida liu hosi jogadór Florindo Soares maibé la konsege marka golu tanba Octavio Ximenes falla uza oportunidade ne’e.

Jogadór Santa Cruz FC Nelson dos Reis simu kartaun kinur hafoin halo falta hasoru jogadór Atletico ultramar Lexy Junior Atok iha minutu 71.

Santa Cruz FC nafatin halo atake ba iha Atletico Ultramar FC maibé ekipa adversáriu disipliña no konsege halo defeza ho rigor hodi asegura nia reze hosi golu.

Tama ba minute 78 Santa Cruz FC halo substituisaun ba nia jogadór hodi hasain Jacinto da Silva no hatama Januario Abel Cabral hodi reforsa meiu kampu atu bele halo atake ida rigor hodi bele hetan vitoria maibé sedidauk iha mudansa no tama ba minutu 85 kontinua ho substituisaun hodi hatama Venancio Martins no hasai Nelson dos Reis.

Subtistuisaun hirak ne’e la lori rezultadu pozitivu ba ekipa Santa Cruz FC no situasaun ne’e obriga santa Cruz FC tenke halo esforsu hodi hadau villete ida ba primeira divizaun iha tinan oin.

Enkuantu ekipa Atletico Ultramar ho vitória ne’e sira asegura ona fatin ida iha primeira divizaun tinan oin.

Observasaun jornalista Hatutan.com nota Maske Atletico Ultramar FC joga deit ho jogadór na’in sanulu hahú iha minutu 66 maibé konsege asegura sira nia ekipa hosi derrota no halo defeza ida metin hodi lafo fatin atu ekipa adversáriu bele halo impata ba vitória ne’ebé Atletico ultramar iha.

Ho vitória ne’ebé iha halo ekipa Atletico Ultramar FC  lidera tabela klasifikasaun grupu B no otomatikamente promovidu ba Primeira divizaun iha epoka oin.

Treinadór Atletico Ultramar FC Moises da Silva expresa nia sentiment kontente no satisfasaun ba rezultadu jogu ne’ebé nia ekipa atinze tamba ho vitória ne’e Ultramar pasa ona ba primeira divizaun tinan oin.

Ekipa ne’e sei halo esforsu hotu hodi enfrenta jogu ikus kontra kontra Emanuel FC hodi hadau tikete ida ba final segunda divizaun nian.

Jornalista: Vito Salvadór