Hatutan.com, (05 Novembru 2021), Dili—Hafoin enfrenta jogu dala tolu tutuir-malu iha grupu A segunda divizaun Liga Futeból Timor-Leste (LFTL), As Marca FC rekolla vitória dahuluk hodi hetan pontu tolu no sai hosi zona mean grupu A, hodi tuur iha kuarta klasifikasaun ho pontu tolu.

Ekipa As Marca FC selebra vitória. Foto/LFTL.

Vitória ne’e hatudu rezultadu hosi As Marca FC nia sakrifisiu no esforsu durante preparasaun molok enfrenta jogu ne’e.

Notísia iha Relasaun:Atletico Ultramar FC Promovidu Dahuluk ba Primeira Divizaun Époka 2022

As Marca FC hasoru Fitun Estudante FC mai ho idaidak nia kualidade jogu ho objetivu atu konkista vitória hodi sai hosi zona okos iha tabela klasifikasaun grupu A.

AS Marca FC hola inisiativa hodi lansa kedan atake ho intensaun bele lidera uluk jogu, nune’e bele iha fleksibilidade ba jogu iha minutu sira tuir-mai.

Tama ba minutu 7 jogadór Fitun Estudante FC Alberto Martinho sofre aleiza iha parte oin tanba hadau malu bola kantu ho adversáriu iha área proividu.

Ho aleiza ida ne’e treinadór halo kedan substituisaun hodi hasai Alberto Martinho no hatama Napoleão da Conceição.

Ho esforsu ne’ebé iha, As Marca FC kuaze domina jogu hodi halo atake liu hosi médiu Alvaro Kefi ne’ebé sempre halo ameasa liu hosi bola falta ne’ebé iha.

Kontra atake entre ekipa As Marca FC ho Fitun Estudante FC. Foto/LFTL.

Fitun Estudante FC mós halo esforsu hodi buka oportunidade liu hosi failansu ne’ebé As Marca FC halo iha liña klaran hodi halo ameasa maibé nafatin laiha rezultadu.

Ekipa rua nafatin ho ritmu jogu ne’ebé iha hodi lansa atake ba malu atu bele lidera uluk iha tabela skore.

Fitun Estudante halo substituisaun ba daruak nian hodi hasai Teonino Lopes no hatama Nelson Boavida iha minutu 31.

Estatistika jogu hatudu As Marca iha liu oportunidade liu hosi ameasa lubuk ne’ebé iha maibé kuaze avansadu hosi ekipa As Marca laiha ‘Naluri’ atu hatama golu maske mesak ho baliza.

Jogadór As Marca FC Januario Sarmento simu kartaun kinur hafoin halo falta hasoru avansadu Fitun Estudante FC Pedro Pires iha minutu 24.

Ekipa rua halo jogu no sorte monu los ba As Marca FC liu hosi Jogadór Ezequel da Cruz ne’ebé marka golu dahuluk ba nia ekipa tanba hetan asisténsia hosi Abel Martins iha minutu 41. Golu ne’e halo As Marca FC lidera provizóriu ho skore 1:0 iha primeira parte.

Tama ba segunda parte, ekipa Fitun Estudante FC hola kedan inisiativa hodi halo atake ba área As Marca FC nune’e bele duni atrazu ne’ebé iha.

As Marca FC la fó oportunidade hodi hadia liña no halo substituisaun ba jogadór iha liña klaran hodi hasai José Piu no hatama Teofilo Barros iha minutu 50.

Substituisaun ne’e halo ho intensaun bele hadi’a rezisténsia liña klaran hodi bele asegura vitória ne’ebé iha.

Ekipa Fitun Estudante FC hola risku iha minutu 58 hodi hasai defeza Hermelo Conceição no hatama avansadu Deonizio Lopes atu bele halo atake maximu ba iha ekipa As Marca FC hodi duni atrazu ne’ebé iha.

Rekoñese ho forsa ne’ebé iha As Marca FC halo tan substituisaun ba nia jogadór iha liña médiu hodi hatama Francisco Gama no hasai avansadu Abel Martins iha minutu 59.

Fitun Estudante FC hahu hetan nia ritmu no halo ameasa barak ba iha ekipa adversáriu maibé seidauk rezulta golu ruma hodi halo impata.

As Marca FC kontinua halo subtitiisaun iha minutu 71 hodi hasai hikas Teofilo Baerros no hatama Janiel Fernandes.

Liu deit minutu balun As Marca FC kontinua halo substituisaun tanba jogadór sofre aleiza iha minutu 73 hodi hasai Duarte Leite no hatama Elisio de Jesus.  

Fitun Estudante FC nafatin hatudu ameasa liu hosi atake ne’ebé iha maibé falla iha finalidade nune’e As Marca FC aproveita hodi halo kontra atake ne’ebé lori risku boot ba Fitun Estudante FC.

Tama ba minutu 80 Fitun Estudante FC halo substituisaun ba nia jogadór hodi hasai Napoleão da Conceição no hatama Domingos Maia.

Tabela Klasifikasaun Provizoriu.

Iha minutu sira ikus jogu tensi sa’e no jogadór As marca Fransisco Gama tenke sinu kartaun kinur no situasaun hanesa ba mós jogadór Atletico Ultramar Pedro Pires tanba halo falta hasoru ekipa adversáriu.

Tama ba minutu 88 As Marca FC halo substituisaun ikus ba nia jogadór hodi hasai Ezequiel da Cruz no hatama Ivan Araújo ho intensaun bele asegura vitória ne’ebé iha.

To’o jogu remata laiha tán mudansa iha tabela skore no vitória ba As Marca FC.

Kapitaun ekipa Fitun Estudante FC Bernardino Vaz hateten maske lakon iha jogu datoluk nian maibé sei esforsu atu treinu hodi enfrenta jogu ikus kontra Portu Taibesse FC.

Iha parte seluk treinadór As Marca FC Edwin Belo hateten vitória ida ne’e nu’udár rezultadu hosi esforsu jogadór sira nian tanba ne’e hanesan ekipa tékniku orgullu no fó parabéns ba jogadór sira hotu tantu hosi As Marca FC no mós ekipa Adversáriu.

Jornalista: Vito Salvadór