Hatutan.com, (30 Outubru 2021), Dili— Jogu kontinuasaun Liga Futebó Timor Leste (LFTL) segunda divizaun Grupu B, Nagarjo FC ho susesu lori fila pontu tolu hosi nia adversáriu Santa Krúz FC ne’ebé provizoriamente hanesan runner-up grupu B ho pontu neen.

Jogadór Nagarjo FC ho susesu lori fila pontu tolu hosi nia adversáriu Santa Krúz FC. Foto/LFTL.

Ho vitória ne’e loke hikas oportunidade ba Nagarjo FC atu kompete ho ekipa sira seluk hodi hadau billete ida ba primeira divizaun époka 2022.

Notísia iha Relasaun:Porto Taibesse FC ho Academica FC Fahe Pontu iha Jornada Datoluk

Nagarjo FC nia jogu loraik ne’e lori hikas esperansa ba públiku liuliu adeptu Nagarjo FC tanba ho vitória ne’e loke hikas naroman ba Nagarjo FC no Santa Krúz FC iha presaun nia laran, hodi enfrenta jogu rua tuir-mai kontra Atletico Ultramar FC no Lica-Lica Lemorai FC.

Vitória ba Nagarjo FC hahú hosi penalidade iha minutu 10 bainhira defeza sentrál Santa Krúz FC halo falta hasoru avansadu Chiquito do Carmo iha área proividu, falta ne’e obriga António de Carvalho fó penalidade no Bendito Ximenez atu ezekuta penalidade ne’e ho susesu hodi muda skore ba 1:0.

Santa Krúz FC la hatudu jogu diak ho kualidade hanesan jogu rua antes tanba ne’e Nagarjo FC kontinua domina bola no ikus mai rezulta tán golu ida iha minutu 39 liu hosi jogadór Julião Ximenes.

Atu asegura derrota iha primeira parte, Santa Krúz FC halo substituisaun ba nia jogadór iha minutu 33 hodi hasai  Alberto Fernandes no hatama Deonisio Maia.

Substituisaun ne’e la lori mudansa no Nagarjo FC ne’ebé nafatin domina bola no halo jogu liu hosi médiu hodi halo auto kontrolu ba bola hodi halo atake ne’ebé ikus mai obriga Santa Krúz FC tenke simu tán golu ida iha minutu 41.

Terseiru golu ba Nagarjo FC ne’e marka hosi Ricardo Pereira. Golu ne’e halo skore iha tabela muda ba 3:0.

Julinho da Costa jogadór Santa Krúz FC tenke simu kartaun kinur tanba halo falta. Tama ba tempu adisionál hodi terminan primeira parte jogadór Nagarjo FC Chiquito do Carmo no Santa Krúz FC Nelson dos Reis tenke simu kartaun kinur tanba komete erru iha kampu laran.

Tama ba segunda parte ekipa rua halo esforsu hotu atu bele asegura pozisaun ne’ebé iha tuir saida mak hakerek hela iha tabela skore nian.

Maski udan, Santa Krúz FC koko halo mudansa ba iha jogu  liu hosi tátika ne’ebé iha ikus mai hetan duni oportunidade ida liu hosi penalidade iha minutu 54 João Paulo de Sousa halo duni nia servisu ho di’ak hodi muda skore iha tabela ba 1:3.

Hafoin golu ne’e ekipa rua obrigadu tenke joga iha udan laran, situasaun ne’e hanesan lori matak malirin ba ekipa Nagarjo FC no tama ba minutu 59 Julião Ximenes halo segundu golu ba nia ekipa Nagarjo FC hodi muda skore ba 4:1.

Santa Krúz FC halo subtistusaun ba daruka hodi hatama Januário Cabral no hasai Julinho da Costa ho intensaun bele duni atrazu ne’ebé iha, maibé la konsege no Nagarjo FC nafatin domina jogu ho taktika ne’ebé iha.

Santa Krúz FC nafatin buka meius ho esforsu oioin maibé Nagarjo FC la fó biban. Santa Krúz FC tenta halo tan substituisaun iha liña kotuk hodi hasai Danilo Menezes Alves no hatama Jacinto da Silva.

Substituisaun ne’e nafatin la lori rezultadu. Jogadór Nagarjo FC Bovio Soares tenke simu kartaun kinur iha minutu 66 hafoin halo falta hasoru jogadór Santa Krúz FC.

Tama ba minutu 83 jogadór Santa Krúz FC Erloy Braz sala halo antesipasaun ba bola ne’ebé ikus mai obriga nia tenke halo auto golu ba nia baliza rasik hodi muda skore ba 5:1.

Ho auto golu ne’e halo Nagarjo FC kontente no festeza liu hosi selebrasaun jogadór sira nian. Tama ba minutu 85 Nagarjo FC halo substituisaun ba nia jogadór hodi asegura vitória ne’ebé iha hodi hasai Ricardo Pereira no hatama Rique Alves.

Liu de’it minutu ida Nagarjo FC halo tán substituisaun hodi hatama Luis Ribeiro no hasai Chiquito do Carmo.

Santa Krúz FC nafatin halo esforsu liu hosi substituisaun jogadór iha minutu 89 hodi hatama Denilson Soares no hasain Elroy Braz.

Laiha mudansa pozitivu ho substituisaun ne’ebé iha obriga Santa Krúz FC tenke kontinua ho subtituisaun iha tempu adisionál iha minutu 90+3 hodi hasai Deonidio Maia no hatama Divio da Krúz.

Iha minutu hanesan Nagarjo FC halo substituisaun ba nia jogadór hodi hasai Marco Gismão no Jeninho Soares.

Vitória ida ne’e Nagarjo FC hetan tanba halo esforsu lubuk ida liu hosi preparasaun ka treinu  durante semana ida.

Atu fó hanoin mós katak, antes ne’e ekipa Nagarjo FC derrota dala-rua tututuir malu iha jogu kontra Emanuel FC no Atletico Ultramar FC.

Oras ne’e Nagarjo FC hetan pozisaun iha kuarta klasifikasaun grupu B ho pontu tolu no pozitivu bola rua, enkuantu Santa Krúz FC nafatin okupa segunda klasifikasaun ho pontu neen.

Jornalista: Vito Salvadór