Hatutan.com (11 Novembru 2021), Díli—Liga Futebol Timor Leste (LFTL) liu hosi ezekutivu, deside hodi muda jogu daruak iha primeira jornada, primeira divizaun entre DIT FC no AD SLB Laulara ba Tersa (23/11/2021).

Desizaun muda oráriu ne’e  tanba klube AD SLB Laulara nia jogadór sira reforsa hela ekipa selesaun nasionál sub-23 foin dadauk iha kualifikasaun AFC iha singapura, no oras ne’e seidauk to’o Timor.

Notísia iha Relasaun:Emanuel FC Hakat ba Finál Segunda Divizaun

Advertisement

Tuir regulamentu Federation International Football Association (FIFA) no Asian Football Confederation (AFC), kada klubu ne’ebé nia jogadór liu haat ka lima ba reforsa selesaun nasionál iha eventu internasionál ruma, oráriu jogu klube iha liga nasionál sei muda automatikamente hodi realiza hikas jogu iha tempu tuir-mai tuir biban ne’ebé iha.

Diretór Verifikasaun no Lisensamentu Klubu José Carvalho, hateten haree ba plantel jogadór hosi AD SLB Laulara ne’ebé maioria reforsa selesaun nasionál no to’o oras-ne’e seidauk to’o Timor-Leste tanba iha difikuldade ho transporte Aero, nune’e órgaun liga deside hodi adi’a jogu.

“LFTL konfirma ona ho ekipa rua liuliu DIT FC no sira aseita hodi adia jogu ne’e ba iha loron ne’ebé liga termina,”  José Carvalho hateten ba jornalista sira iha knaar LFTL, Bairru Grilos, Dili, Kinta (11/11/21).

Ho mudansa ne’ebé iha, la lori impaktu ba iha jogu em jerál tanba enkaixa de’it jogu ne’e ba iha terseira jornada, maibé nia hahú antes ona molok jogu sira iha jornada datoluk hahú.

Ho mudansa ne’ebé iha, órgaun liga deside ona atu iha Sábadu sei laiha jogu hodi husik mamuk, nune’e oráriu sira tuir-mai bele la’o normál no la lori efeitu negativu ruma ba jogu sira tuir-mai.

Advertisement

“Ita haree katak mudansa ne’e sei la fó impaktu ba oráriu jogu sira seluk. Tanba ne’e agradese ba parte hotu nia kolaborasaun atu ita hala’o jogu primeira divizaun époka ne’e ho kompetitivu no respeita nafatin espiritu Fair Play,” José Carvalho subliña.

Tuir oráriu fiksu hosi FFTL katak, jogadór selesaun nasionál sira hosi ekipa AD SLB Laulara, sei to’o Timor iha Tersa (16/11/2021) hodi hamutuk ho sira nia ekipa enfrenta jogu sira ba liga iha époka ne’e.

LFTL suspende jogadór estranjeiru Muhamad Mumi

Haree ba disputa entre klubu rua Lalenok United FC no As Ponta Leste ne’ebé laiha seriedade hodi hakotu problema disputa ba jogadór estranjeiru Muhamad Mumi, LFTL iha ona desizaun própriu atu suspende Jogadór ne’e hosi liga iha époka ne’e.

Suspensaun ne’e hodi hein klubu rua nia solusaun ikus tanba ne’e liga husu atu klubu rua rezolve nia problema interna hodi fó biban ba Jogadór refere.

Advertisement

“Ita iha ona desizaun atu Jogadór Mumi labele defende ekipa rua ne’e ho razaun nia disputa seidauk rezolve,” José Carvalho, informa.

To’o oras-ne’e parte klubu rua nafatin halo karta reklamasaun ba liga, hodi mantein sira nia pozisaun atu defende jogadór estranjeiru ne’e bazeia ba sira nia razaun ne’ebé iha.

Tamba ne’e, Liga mós iha dalan rasik tuir situasaun ne’ebé iha, nune’e labele prezudika klubu rua.

To’o notísia ne’e publika parte klubu seidauk iha ida mak fó komentáriu no sira entrega nafatin ba órgaun Liga, atu tetu desizaun hirak-ne’e liu hosi parte juridisaun.

Jornalista: Vito Salvadór

Advertisement