Hatutan.com, (12 Novembru 2021), Dili—Lalenok United FC sei joga kontra adversáriu Assalam FC iha jogu kontinuasaun primeira divizaun iha Domingu (14/11/2021).

Treinadór Lalenok United FC, Gaspar Amaral ho kapitaun Lalenok United FC, Francisco da Costa. Foto/Hatutan.com.

Ekipa rua iha ambisaun hakarak rekolla vitória iha jogu ne’e tanba halo ona preparasaun másimu durante fulan ida, hahú hosi inisiu bainhira órgaun Liga anunsiu kona-bá liga primeira divizaun époka 2021.

Notísia iha Relasaun: Emanuel FC Hakat ba Finál Segunda Divizaun

Liu hosi konferénsia imprensa iha edifísiu LFTL Bairro dos Grilhos Dili, treinadór Lalenok United FC, Gaspar Amaral hateten maski jogadór intimu lubuk ida mak oras-ne’e reforsa hela selesaun nasionál iha jogu AFF SUZUKI Cup époka ne’e iha Singapura, maibé sei halo esforsu hodi enfrenta jogu ne’e ho matéria jogadór ne’ebé iha.

“Ami optimista ho matéria jogadór ne’ebé maske ami tenke lakon jogadór seluk tanba reforsa hela selesaun nasionál,” Gaspar Amaral, hateten.

Lalenok United FC oras-ne’e reforsa hosi jogadór estranjeiru na’in-tolu no jogadór nasionál sira ne’ebé antes ne’e reforsa ona Lalenok United FC iha ápoka kotuk.

Lalenok United FC mós sei fó oportunidade barak liu ba nia jogadór suplente sira ne’ebé antes ne’e la hetan oportunidade tanba jogadór intimu sira sei auzénsia ho razaun reforsa selesaun nasionál.

“Ami sei fó oportunidade ba jogadór sira ne’ebé antes ne’e hanesan suplente no buka halo kombinasaun ida di’ak ba jogadór sira iha kada liña hodi bele konkista vitória iha primeiru jogu ne’e,” Gaspar Amaral hatutan.

Iha fatin hanesan kapitaun ekipa Lalenok United FC, Francisco da Costa hateten, nia  iha konfiansa ba nia maluk jogadór sira atu konkista vitória iha jogu dahuluk kontra adversáriu Assalam FC maske jogadór balun foun.

Treinadór Assalam FC, Adu Namimor Marques Namiroro. Foto/Hatutan.

Iha parte seluk, treinadór Assalam FC Adu Namimor Marques Namiroro hateten durante ne’e Assalam FC halo preparasaun ida kompletu iha parte fiziku no mós tékniku atu bele enfrenta jogu iha Domingu ne’e.

Klubu hotu iha ambisaun atu rekolla vitória iha jogu ikus, nune’e mós ho Assalam FC tanba ne’e sei halo preparasaun ida di’ak atu bele atinje mehi ne’ebé iha.

“Ami nia preparasaun másimu no ami iha ambisaun hakarak manan maibé jogu iha noventa minutus mak sei termina se mak manan,” Treinadór ne’e hateten.

Assalam FC iha esforsu makás hodi halo mós kontratu ho jogadór estranjeiru hamutuk na’in-lima iha kada liña, nune’e bele lori kor diferente ba Assalam FC hodi bele konkista vitória iha kada jogu.

Ekipa rua entre Lalenok United FC no Assalam FC sei joga iha Domingu (14/11/2021) iha estádiu munisipál Dili.

Jornalista: Vito Salvadór